Ölkə futbolu
Qayıbovun diqqətinə: Bağırpasand necə azərbaycanlı oldu?
AFFA-da, Sumqayıt İcra Hakimiyyətində, “Azərkimya”da dövlət siyasətindən anlayan biriləri varmı? Yəni, onlar da Riad Rəfiyevin əməllərində siyasi səhvin olduğunu görmür, detallara varmır? “Sumqayıt”ın menecer-prezidenti pul hərisi olan işbazdı, anladıq, amma dövlət maraqlarını bu dərəcədə ucuz tutmaq, şəxsi mənafeyi naminə hər şeyi tapdalamaq olmaz axı.
Bu gedişlə Sumqayıtda İranın konsulluğunu açmaq lazım gələcək. Farslar, qeyri-azərbaycanlı iranlılar bu şəhərdə asanlıqla azərbaycanlılaşdırıla bilirsə, gərək belə addım atılsın. Mehdi Şərifi, Əli Qurbani, Hoccət Haqverdi və indi də Səid Rza – bunlar “kimyaçılar”ın son iki ildə milliləşdirdiyi farslardı. Sözügedən komandada Peyman Babayi kimi əsl cənubi azərbaycanlı da oynayıb, lakin öncəki cümlədə adını sadaladıqlarımızın bizimlə heç bir kök bağlılığı yoxdu.
Bu oyunçular gətirilir, bir günün içində milliləşdirilir və azərbaycanlı sayılır. Əcəba, Azərbaycan pasportu bu qədərmi ucuzdu? 30-31 yaşlı futbolçuları “milli komandanın maraqları naminə” azərbaycanlılaşdırmağın nə mənası var? Axı, onlar da Riçard Almeyda, Filip Ozobiç kimi azı 5 il ölkəmizdə oynamalı, sonra bu haqqı almalıydılar, AFFA rəhbərliyi Riad Rəfiyevin himayədarlarıdı deyə, qanunlara göz yumulmalıdırmı?
“Səbail” və “Sumqayıt”ın yaradılma, onların SOCAR-a bağlı qurumlar tərəfindən maliyyə ilə təmin olunma səbəbi milli komandalara futbolçu hazırlamaqdı. Rövnəq Abdullayevin oğlunun şərəfinə var edilən “dənizçilər” hazırda veteranlara möhtac qalıb. Əvvəllər millidə oynamış futbolçular indi işsiz qalmamaq üçün bura yerləşdirilir. Heyətin qalan hissəsini isə əcnəbilər tutur. “Sumqayıt” isə milli komandalara oyunçu verir, amma sumqayıtlıları yox, farsları, Rusiyada, Ukraynada, İsraildə yetişənləri. Vəzifə saxta yollarla yerinə yetirilir!
“Sumqayıt”da legionerlərin oynamasına icazə verilmir. Sponsorların absurd qərarıdı. Komanda yüksək yerlər, avrokuboklara vəsiqə uğrunda yarışırsa, iddialıdısa, belə bir qadağa olmamalıdı. “Kimyaçılar” da digərləri kimi əcnəbiləri gətirib legioner kimi oynatmalıdı. Onsuz da klub rəhbərliyi yalançı strategiyanı əyri yollarla ayaqlayır. Strategiyaya sadiqdilərsə, əməldə göstərsinlər.
İranlılar bir yana, “Sumqayıtda”kı Camaləddin Xocaniyazovun oyunçu profilində hətta “Azərbaycan” sözü yoxdu. Türkmən futbolçunun sənədlərdə əsl adı göstərilir – Dzhamaldin, biz isə onu Cəmaləddinə çevirmişik. Türkmən oyunçunun Rusiya vətəndaşlığı da var və o, ikili vətəndaşlığın icazə verilmədiyi ölkəmizdə yerli oyunçu statusu ilə oynayır. Məntiq varmı? Legionersiz “Sumqayıt”da fars, türkmən nə gəzir? Doğrudu, bu mövsüm PFL-in rəsmi saytında Xocaniyazov Rusiya vətəndaşı kimi göstərilib. O zaman başqa sual çıxır – bəs, bu klubda əcnəbi oynadılması qadağan olunmamışdı?
İranlılara gəlincə, milli komandamıza dəvət alan Höccət Haqverdi Məşhəddə, Əli Qurbani Mazandaranda doğulub və bu şəhərlərin əhalisinin mütləq əksəriyyəti farslardır. Onlar Azərbaycan dilində bir kəlmə də bilmirlər. Təzə gələn Səid Rza da onun kimi. Gilanın Ləngərud şəhərindən tapılan bu hüçumçunun da Azərbaycanla hansısa bağlılığı yoxdu. “Babasının babasının babası” nağıllarına inanmayın, Gilanın ümumi əhalisinin 85,9 faizi giləklərdi. Azərbaycanlılar ostanlıq üzrə cəmi 7,9 faiz təşkil edir, Səidin anadan olduğu Ləngərudda isə demək olar, yaşamırlar.
“Sumqayıt” saxtakarlığının fərqindədi və bu səbəbdən oyunçunu bəh-bəhlə cənubi azərbaycanlı kimi təqdim edərkən adını Səid Rza olaraq göstərib. Halbuki oyunçunun adı Saeid Bağırpasanddı, Bağırpasand isə fars soyadıdı. Bir illik müqavilə bağlanan 31 yaşlı oyunçu tezliklə əsas yığmaya da sırınacaq, əmin olun.
Azərbaycan Respublikasının vətəndaşlığı haqqında qanunda deyilir…
…Azərbaycan Respublikasının ərazisində son beş il ərzində fasiləsiz olaraq qanuni əsaslarla daimi yaşayan, qanuni gəlir mənbəyi olan, Azərbaycan Respublikasının Konstitusiyasına və qanunlarına riayət olunması barədə öhdəlik götürən, habelə Azərbaycan Respublikasının dövlət dilini bilməsi haqqında sənəd təqdim edən əcnəbi və vətəndaşlığı olmayan şəxs mənşəyindən, irqi və milli mənsubiyyətindən, cinsindən, təhsilindən, dinə münasibətindən, siyasi və başqa əqidələrindən asılı olmayaraq bu qanuna müvafiq surətdə öz vəsatəti ilə Azərbaycan Respublikasının vətəndaşlığına qəbul edilə bilər.
Səid Bağırpasandın və digər əcnəbilərin bu bəndə dəxli yoxdu. “Sumqayıt”ın yeni oyunçusunun ölkəmizdə yaşamasının hətta 5 günü tamam olmayıb.
…Əcnəbinin və ya vətəndaşlığı olmayan şəxsin Azərbaycan Respublikasının ərazisində daimi yaşama müddəti ona qanunvericiliklə müəyyən edilmiş qaydada daimi yaşamaq üçün icazə və ya qaçqın statusu verildiyi gündən hesablanır…
Ola bilsin ki, bu futbolçuların hamısı qaçqın kimi qeydiyyata alınır. İranda hərbi xidmətdən yayınmaq üçün belə variantlara əl atırlar. Bu legionerlər niyə, kimdən, necə qaçıb – bax, bunlar araşdırılmalıdı.
…Aşağıdakı hallarda əcnəbilər və vətəndaşlığı olmayan şəxslər bu maddənin birinci hissəsində göstərilən müddət nəzərə alınmadan Azərbaycan Respublikasının vətəndaşlığına qəbul edilə bilərlər:
1) şəxsin elm, texnika, mədəniyyət və ya idman sahələrində yüksək nailiyyətləri olduqda;
2) şəxs Azərbaycan Respublikası üçün xüsusi maraq kəsb etdikdə və digər müstəsna hallarda.
Bu hallarda əcnəbinin və ya vətəndaşlığı olmayan şəxsin Azərbaycan Respublikasının vətəndaşlığına qəbul edilməsinin məqsədəuyğunluğu müvafiq icra hakimiyyəti orqanı tərəfindən əsaslandırılmalıdır.
Şəxsin Azərbaycan Respublikasının qarşısında xüsusi xidmətləri olduqda o, bu maddənin birinci hissəsində göstərilən şərtlər nəzərə alınmadan Azərbaycan Respublikasının vətəndaşlığına qəbul edilə bilər…
Görəsən, Səid Bağırpasand və digər iranlılar bu maddələrin hansına uyğun gəlir? Öz sahələrində yüksək nailiyyətlər əsas götürülürsə, sözügedən hücumçunun ötən mövsüm 21 oyunda meydanda olduğunu və cəmi 3 qola imza atdığını xatırladaq – hücumçu üçün biabırçı göstəricidi. Bu adamlar ölkəmiz üçün xüsusi maraq kəsb edən şəxslər də deyil, deməli, tələblərin heç birinə cavab vermirlər. Bəs, bu oyunçular Azərbaycan vətəndaşlığını hansı yolla bu qədər rahat alırlar?
Qanunda da qeyd olunur ki,əcnəbilərin Azərbaycan Respublikasının vətəndaşlığına qəbul edilməsinin məqsədəuyğunluğu müvafiq icra hakimiyyəti orqanı tərəfindən əsaslandırılmalıdır. Həmin əsaslandırmanın təqdim edilməsini istəyir, tələb edirik. “Sumqayıt” zəhmət çəkib müvafiq orqanların əsaslandırmasını açıqlasın, biz də həmin orqanlardan bilgiləndirmə istəyək. Görək Bağırpasandı bu qədər dəyərli edən amil nədir?
Yeni gənclər və idman naziri Fərid Qayıbov da məsələni diqqətdə saxlamalıdı. Çünki əcnəbi idmançının milliləşdirilməsi, Azərbaycan vətəndaşlığına qəbulu üçün mütləq AGİN-dən məktub alınmalıdı. Həmin məktuba isə futbol bölməsinə rəhbərlik edən Fikrət Hüseynov imza atır. Araşdırılsa, onun illər boyunca nə qədər belə saxtakarlığa imkan verdiyi aydınlaşar.
Araşdırmamız davam edəcək…
FƏRİD