Ölkə futbolu
Qomeslə Məmmədovun faciəsi
Şənbə gün meydan sahibləri, ertəsi qonaqlar qələbə qazandı. Və bu nəticələrdən sonra turnir cədvəlində üçhakimiyyətlilik yarandı. İtirilmiş xallara görə “Qarabağ” öndə olsa da, Premyer Liqaya ardıcıl 3 turdu “Sumqayıt” başçılıq edir.
9-cu tur yekunlaşdı və komandalar millinin toplanışı üzündən yarım aylıq fasiləyə gedir. Bu dövr ərzində 3 komandanın ciddi silkələnməsinə, bəlkə də məşqçi dəyişməsinə ehtiyac olacaq. 4-cü pillədə olan “Neftçi” biabırçı məğlubiyyətə, “Sabah” ardıcıl 6 yenilgiyə görə islahat ərəfəsindədisə, “Qəbələ” özünə gələ bilmədiyindən rahat deyil.
“Sumqayıt”ın məğlubiyyətsiz oyunlar seriyasına “Səbail”in son qoyması gözlənilməz oldu. Amma eyni zamanda bunu gözləmək də gərəkirdi. Çünki heyət yetərsizliyi, xüsusilə hücumçu çatışmazlığı üzündən əziyyət çəkən “kimyaçılar” əvvəl-axır dayanmalıydı. Buna yüksələn qrafiklə çıxış edən Aftandil Hacıyevin yetirmələri nail oldu.
Şokdan ayılan “Keşlə”nin qələbəsinə daha çox “Qəbələ”nin özünün şərait yaratdığını deməliyik. Qonaqların saysız fürsətləri boşa verməsi azmış kimi, həlledici məqamda avtoqolla yadda qalan Asif Məmmədov faktiki, qalibi müəyyənləşdirdi. Qeyri-sabitlik Elmar Baxşıyevin postunu möhkəm laxladacaq. Heyət baxımından şikayət etmək şansı qalmayan məşqçi 9 oyuna cəmi 8 xal qazanmağın hesabatını verməli, öz bacarıqsızlığını etiraf etməlidi.
“Sabah”ın dərdi daha böyükdü. 6-sı ardıcıl olmaqla 7 məğlubiyyət ən yaxşı imkana malik klublardan birinə yaraşmır. Futbolçularla məşqçinin eyni ansambl olmadığını görmək üçün mütəxəssis olmağa ehtiyac yoxdu. İş o həddə çatıb ki, Visente Qomes taktikadan, oyun fəlsəfəsindən imtina edib, hansısa yolla qələbə qazanmalarının vacibliyini dilə gətirir. Yetirmələri isə hətta penaltini boşa verir, qapıçıdan qayıdan topu boş qapıya göndərə bilmir. Yəni, psixoloji çöküş bu qədər diqqət çəkir.
“Zirə”nin qələbəsinə kölgə salmaq doğru olmazdı. Rəşad Sadıqovun yetirmələri 3 xal üçün döyüşdü və buna nail oldu. “Qartallar” bunu hətta hakimlərin anlaşılmaz idarəçiliyi fonunda bacardı. Son dəqiqələrdə qonaqların qapıçısının qırmızı vərəqəylə oyundan qovulması, əlcəkləri hücumçu Ruslan Qurbanovun geyməsi qəribə idi. Rauf Cabbarov bu qədər “ucuz” vərəqə verməməliydi.
Ötən tur “Keşlə”yə 6 qol vuran “Qarabağ” bu dəfə “Neftçi”ni darmadağın etməklə ilk dövrədəki yenilginin təsadüf olduğunu isbatladı. Avropa Liqasında xalsız qalan ağdamlıların ölkənin aparıcı komandalarına bu qədər aşkar fərqlə qalib gəlməsi həm də ölkə futbolunun mənzərəsidi. “Qarabağ” avrokuboklarda xalsız qalırsa, gör, onun darmadağın etdiyi çempionatımızın digər iştirakçıları hansı vəziyyətdədi?
Rəqiblərindən bir baş üstün olan, hətta əsas heyətdən tam istifadə etmədən əzəli rəqibinə 6:0 hesabıyla qalib gələn ağdamlıları müzakirə etməyə gərək yoxdu. Tarixinin antirekordlarını yeniləyən, bu rəqibi qarşısında ilk dəfə belə rəzil olan bakılılar növbəti dəfə çempionluq ümidlərinin üstündən erkən xətt çəkir. Arada cəmi 1 xal fərqininin olmasına aldanmaq lazım deyil, “Neftçi”nin oynadığı futbolla heç nəyə ümid etmək olmaz.
Paytaxt klubunun heyət problemi yoxdu. Ola bilsin, “Qarabağ”la müqayisədə zəifdi, amma fərq 0:6 ilə ölçülməməlidi. Sadəcə, baş məşqçi Füzuli Məmmədov hətta “Neftçi”nin adı altında əziləcək biridi. Müxtəlif futbolçularla zaman-zaman problem yaşayır, onların keyfiyyətlərindən yararlanmağı bacarmır, vahid oyun sistemi, üslubu yoxdu. Komandanı kapitan Emin Mahmudov ətrafında birləşdirmək əvəzinə, lideri 2 oyundu ehtiyatda saxlamaq düşüncəsizlikdi. Nəticədə həmin oyunlarda komanda qol vurmur, 5 xal itirir, orta sahə isə iflic olur.
“Qarabağ”ın vurduğu ilk qol rəqib üçün biabırçılıq idi. Öz cərimə meydançasında qapıçıdan ötürmə alan Filip Ozobiç sürətlə irəliləyib hesabı açırsa, 70-80 metrlik yürüş boyunca bircə oyunçu tərəfindən qarşılanmırsa, məşqçinin danışmağa sözü olmamalı, elə fasilədəcə istefa verməliydi. Füzuli bəy isə hələ rəhbərliyin qərarını gözləyir.
“Neftçi” üçün gec deyil. Fərq böyməyib, toparlanmaq, vəziyyətdən çıxmaq olar. Təcili uyğun məşqçi tapılmalıdı, “Neftçi” Məmmədovkimilərlə eksperiment aparılacaq komanda deyil. Turnir cədvəlinin zirvəsində qərar tutan komandaların baş məşqçiləri kimi çalışqan, daim axtarışda olan, üzərində işləyən biri tapılmalıdı. Rəhbərlik anlamalıdı ki, Roberto Bordin, Füzuli Məmədov 1, uzağı 2 dəfə qalxan olacaq, növbəti uğursuzluqlarda artıq onlardan hesab sorulacaq. Hələ gec deyil, 0:6-dan şoka düşmək yox, ciddi nəticə çıxarmaq lazımdı.
FƏRİD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Milli komanda2024-04-12 18:00
Millinin Gürcüstanla oyunlar üçün heyəti açıqlandı