Qurban Qurbanov: “Əvvəllər rəqiblər daha çox müdafiə olunurdular”

“Qarabağ”ın baş məşqçisi Qurban Qurbanov Premyer Liqanın 25-ci turunda səfərdə “Qəbələ”yə qarşı keçirdikləri oyunu şərh edib.

Futbolinfo.az xəbər verir ki, o, 3:1 hesabıyla qalib gəldikləri matçdan sonra baş tutan mətbuat konfransında bunları söyləyib:

“Çox vacib oyun idi və vacib 3 xal qazandıq. Gərgin və maraqlı matç izlədik. Futbolçularımdan razı qaldım. Sarı vərəqələrlə bağlı diqqətli olmalarını demişdim. Ancaq bu, oyunun gərginliyindən irəli gələn məsələdir. Bəzi oyunçularımızın olmamasına rəğmən, dinamik oyun göstərdik.

“Qəbələ” öz oyun üslübunu yaxşılaşdırıb. Onlar əks-hücumlarda təhlükəlidir. Xüsusilə də müdafiənin arxasına atılan toplarda çox təhlükəli olurlar. Bir neçə epizodda bunun şahidi də olduq.

“Qarabağ” nə vaxt pik formada olacağını deyə bilməyəcəyəm. Bizim düşünmədiyimiz hadisələr olur. Əlimdə dəyişiklik etmək üçün hücum xəttində oyunçu azdır. Adama Diakabi, Yassin Benzya zədəlidir. Futbolçular yaxşı formaya yaxınlaşırdılar. Çempionatın sonuna yaxın daha yaxşı komanda görə bilərik.

Çox qol buraxmağımızın əsas səbəbi bizim müdafiədə diqqətsiz olmağımız, rəqiblərin hücumda yaxşı oynaması ilə bağlıdır. Bütün komandalar hücumameyilli oynayır. Əvvəl bizə qarşı sıx müdafiə olunurdular. İndi isə daha çox hücum edirlər.

Qara Qarayevin əsas heyətdə yerini itirdiyini demək doğru olmaz. Onun oynadığı matçlar az olmayıb. Hər oyunçunun oynamaq ehtimalı var. Qarşıda Qaranın əsas heyətdə oynadığı matçlar olacaq”.