Qurban Qurbanov 2022-ci ilin ən yaxşı məşqçisi seçildi

Azərbaycanda 2022-ci ilin ən yaxşı futbol məşqçisinin adına aydınlıq gəlib.

Futbolinfo.az xəbər verir ki, Komanda.az saytının jurnalistlər arasında keçirdiyi ənənəvi sorğuda “Qarabağ”ın baş məşqçisi Qurban Qurbanov digər namizədləri böyük fərqlə qabaqlayaraq, birinci olub.

67 jurnalistin qatıldığı sorğuda 54 səs toplamaqla, Qurbanov 2022-ci ilin ən yaxşı məşqçisi seçilib. Bununla da, o, 12-ci dəfə Azərbaycanda ilin ən yaxşı məşqçisi adını qazanıb.

Sorğuda iştirak edənlərdən 7-si “Sabah” klubunun baş məşqçisi Murad Musayevə, 5-i Azərbaycan milli komandasının çalışdırıcısı Canni De Byaziyə, 1 nəfər isə “Zirə”nin baş məşqçisi Rəşad Sadıqova səs verib. Ötən mövsümün sonunda “Neftçi”yə Azərbaycan Premyer Liqasının gümüş medallarını qazandıran, hazırda “Sumqayıt”ın “sükanı arxasında” olan Samir Abasova səs verən olmayıb.

“Qarabağ” ötən mövsümdə Qurban Qurbanovun rəhbərliyi altında Azərbaycan Premyer Liqasında çempionluğu bayram edib, ölkə kubokuna sahib çıxıb. Ağdam təmsilçisi cari mövsümdə də Premyer Liqada lider mövqeyində qərarlaşıb. Bundan başqa, komanda Qurbanovun rəhbərliyi altında UEFA Çempionlar Liqasının pley-off mərhələsinə kimi irəliləyib, Avropa Liqasının qrup mərhələsində mübarizə aparıb. “Köhlən atlar” Konfrans Liqasının pley-off mərhələsində mübarizəsini davam etdirəcək.

İlin ən yaxşı məşqçisinin mükafatlandırma mərasimi dekabrın 16-da keçiriləcək. “Fairmont otel”in (“Üç alov qülləsi”) “Üzeyir Hacıbəyov zalı”nda təşkil olunacaq tədbir saat 18:00-da başlayacaq.