Qurban Qurbanov: “Mənim üçün bu oyunda tempə dözmək çox vacib idi”

“Qarabağ”ın baş məşqçisi Qurban Qurbanov Konfrans Liqasının pley-off mərhələsi çərçivəsində Belçikanın “Gent” komandasına qarşı keçirdikləri ilk oyunu şərh edib.

Futbolinfo.az xəbər verir ki, o, Bakıda baş tutan və 1:0 hesabı ilə qalib gəldikləri oyundan sonra jurnalistlərə açıqlamasında bunları söyləyib:

“Futbolçularıma təşəkkür etmək istəyirəm. Meydanda sona qədər mübarizə aparan kollektiv gördüm. Azarkeşlərimiz soyuq havada, siz jurnalistlər bizim yanımızdasınız. Minnətdaram.

Bu oyun həm klub, həm də futbolçular üçün çox önəmli idi. Çox möhkəm komandaya qarşı oynadıq. Mənə həmişə belə oyunlar çox xoş olub. Çox sürətli və dinamik oynayırdılar. Bu gün fürsətdən istifadə edə bildik. Sona qədər mübarizə apara biliriksə, futbolçularda da inam artır. Cavab oyunu qarşıdadır.

Yeni gələn futbolçularımdan da razı qaldım. Optimal formalarından hələ uzaqdırlar. Ümumiyyətlə, işlər pis getmir. Çox məsuliyyətli futbolçulardır. Meydanda olan hər bir oyunçu qalibiyyət üçün mübarizə apardı.

İlk hissə çox risk etmədik. Rəqib 90 dəqiqə aqressiv pressinq edirdi. Onlar geriyə addım atmırdı. Yalnız irəliyə doğru gedirdilər. Hücum potensialları çox yaxşı idi.

İstəyirəm ki, futbolçularımın hamısı sağlam olsun. Mənim üçün həmişə narahatlıq yaradan amil bu olub. Heyətdə çox dəyişiklik olub. Kadi, Ovusu, Vadji artıq komandadan gedib. Mənim üçün bu oyunda tempə dözmək çox vacib idi. Bəzi texniki səhvlər məni çox narahat etmir. Leandro Andradenin oyunundan razı qaldım. Onu Kadi ilə müqayisə etmək istəməzdim”.

Qurbanov son çempionat oyunlarında Amin Ramazanovu oynatdığı halda, avrokubok görüşünə Luka Quqeşaşvilini buraxmasına da aydınlıq gətirib: “Bəzən oyundan-oyuna hər futbolçunun psixoloji durumuna nəzər yetirirsən. Elə futbolçu var ki, hansısa oyunda yana bilər. Hətta qarşıdakı oyunlarda ona təsir edə bilər. Amində həyəcan çox idi. Doğrudur, o, istəkli idi. Biz Aminə güvənirik. Qarşıdakı oyunlarda onun meydana çıxmaq ehtimalı var. Bəzi məqamlar var ki, deməyim düzgün olmaz”.

Baş məşqçi bu oyunda penaltini boşa verən Ramil Şeydayevdən də söz açıb: “Ramilin psixoloji durumu indi normaldır. Soyunub-geyinmə otağında onunla danışdım. 4-cü və ya 5-ci penalti olsaydı, bəlkə də, o, dəqiq ola bilərdi. Qarşıdakı matçlarda onun motivasiyası daha da yaxşı olacaq”.