Ölkə futbolu
Rəfiyev üçün müharibə fürsəti: ukraynalı futbolçuları “Sumqayıt”a qaçqın adıyla gətirir
“Sumqayıt” Andrey Popoviçi sifariş etməyə hazırlaşır. Xeyli müddətdi “kimyaçılar”ın düşərgəsində olan milliləşdirilən ukraynalı növbəti turlarda meydana çıxa biləcək. Hazırda klub onun sənədlərində yaranmış kiçik problemlərin həlliylə məşğuldu.
Ölkəmizdə “Bakı”, “Abşeron”, 2 dəfə “Sumqayıt”, “Turan”, “Qəbələ” kimi klublarda oynayan 30 yaşlı qapıçı, 2013-cü ildə Türkiyə “Tavşanlı Linyitspor”unda çıxış etməyə də imkan tapıb. Yerli gənclərin yolunu kəsərək onu milliləşdirənlər, müxtəlif yığmalarımızda, o cümlədən əsas komandada 2 matça çıxmasını təmin edənlər yenə qolkiperin arxasınca düşüb.
6 il öncə sərxoşluğa, içkiyə aludəçiliyinə görə “Qəbələ”dən qovulan Andrey ovaxtdan bəri düz-əməlli futbol oynamayıb. Ukraynada həvəskar klubda, daha sonra ikinci liqada forma geyən Popoviç indi yenə dəbə minib.
Popoviçi Azərbaycana əbədi meneceri Riad Rəfiyev gətirir. Vaxtilə futbolçunun müxtəlif klublara transferindən onminlər qazanan “Sumqayıt”ın menecer-prezidenti yenə müştərisindən qazanmaq eşqinə düşüb. Milli komandalarımıza futbolçu yetişdirmək üçün yaradılan, amma illərdi “milliləşdirmə sexi” kimi fəaliyyət göstərən “Sumqayıt” bəziləri üçün biznes obyekti olmağa davam edir.
Popoviç 30 yaşında 3-cü dəfə kəşf edilmək üçün gətirilib. Rəfiyev öncə təcrübə dovşanına çevirdiyi klubunda ona şans verəcək, daha sonra milli məşqçilərini Andreyi heyətə götürməyə məcbur edəcək. İllərdi belə davranır və qazancı naminə adətindən əl çəkmək niyyətində deyil.
Ukraynalı içki aludəçisinin gəlişiylə yayda istedadlı qapıçı Tərlan Əhmədli klubdan göndəriləcək, daha bir azərbaycanlının şansı əlindən alınacaq. Hazırkı əsas qapıçı Aydın Bayramov da çoxdandı heyətə götürülən tatar İlnur Valiyevlə Andreyin kölgəsinə atılacaq. Beləcə “Sumqayıt” Azərbaycan futboluna “xidmət edəcək”.
Baş məşqçi Aleksey Baqanın bu transferdən xəbəri yoxdu, Popoviç onun istəyi ilə gətirilməyib. Belaruslu mütəxəssis yay üçün yeni heyət istəyir, Rəfiyev də onunu arzularını öz istədiyi kimi reallaşdırır. Ehtiyatda yatan Vüqar Bəybalayev, Elşən Abdullayev kimi Andrey də say düzəltmək və transfer maxinasiyaları üçün gətirilib – Riad onlara az maaş verir, əvəzində kartlarına transfer haqqı adıyla vəsait köçürtdürüb arxasına keçir. Yayda bu oyunçular və 10-a yaxın digər yerli futbolçu göndəriləcək, onlara müqavilələrinin yenilənməyəcəyi xəbərdarlığı edilib.
Rəfiyevin xüsusi planları var. O, sponsorlardan legioner transferinə icazə almaq niyyətindədi. Bundan sonra Ukraynadan 7-8 əcnəbi gətiriləcək. Müharibə üzündən ölkədən çıxmağa çalışan ukraynalı futbolçular Riad üçün fürsətə çevrilib. Onlar ölkədən çıxmaları təmin olunacağı halda az maaşa oynamağa razıdılar. Rəfiyev day-dayları hesabına bir qrup futbolçunu qaçqın kimi Azərbaycana gətirmək, ailələrinin yaşaması üçün şərait yaratmağa çalışır. Yekunda futbolçuları “Sumqayıt”da oynadıb, sonra onları sataraq cibini doldurmaq niyyətindədi. Bu məqsəd üçün himayədarlarını gənclər və idman nazirliyinin müvafiq sənədləri verməsi üçün minnətçi salıb.
Popoviç də eyni üsulla gətirilib. Futbolçunun vətənində oynamaq şansı yoxdu, Ukraynada müharibə gedir. Belədə Rəfiyev fürsətdən faydalanır.
AĞA
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…