Müsahibə
Rahid üçün dəhşət: “Hakim bütün ikili mübarizələrdə rəqibin lehinə qərar verdi”
“Səbail”in kapitanı Rahid Əmirquliyevin futbolinfo.az-a müsahibəsi
– “Sumqayıt”la kubok matçında səfərdə qalib gəlsəniz, evdə uduzdunuz…
– Düzdür, səfərdən yaxşı nəticə ilə qayıtmışdıq, ancaq buna baxmayaraq, bilirdik ki, evdə bizi ağır oyun gözləyir. Yaxşı hazırlaşmışdıq, lakin mtça pis başladıq. Yalnız ilk 20 dəqiqədən sonra oyunumuzu tapa bildik və yaxşı oynamağa başladıq. Bununla belə, hakim səhvlərinin nəticəsi olaraq mübarizəni dayandırdıq. Referi dəhşətli dərəcədə çox səhv etdi. “Sumqayıt”ın qələbəsinə kölgə salmaq istəmirəm, lakin göz önündədir ki, hakim kobud səhvlərə yol verdi.
– Penalti epizodundan çox danışıldı…
– Əlbəttə ki, danışılacaq. Oyundan sonra da epizoda baxdım. Orada penaltidən söhbət belə gedə bilməz. Birinci dəfə deyil ki, hakim səhvlərindən mərhələ adlaya bilmirik. Ötən il “Zirə” ilə matçda da sonuncu dəqiqədə qol vurmuşduq, hakim saymamışdı. Halbuki təmiz qol idi və “Zirə” mərhələni keçdi.
– Qarşılaşmadan sonra hakimlə danışıb epizodu göstərdiniz?
– Buna imkan olmadı. Ümid edirəm ki, epizoda baxıb. Qarşılaşmada qərar verəndə ona dedim ki, penalti deyil. “Sumqayıt”la ilk matçda da təmiz qolumuzu saymamışdılar. Amil Yunanov ofsaydda olmaya-olmaya qol qeydə alınmadı.
– Hakim epizoda çox yaxın idi. Epizodu görməmək ehtimalı çox az idi. Bu, sizi düşündürür?
– Düzdür, hakim epizoda yaxında idi. Bilmirəm ki, nə deyim? İnsandır və yanlış görə bilər. Amma tək bir epizodda deyil, bir neçə epizodda səhv qərar verdi. Demək olar ki, bütün ikili mübarizələrdə folları rəqibin lehinə verirdi.
– Kubokda mübarizəni dayandırdınız və çempionatda da vəziyyət ürəkaçan deyil. Kapitan olaraq komandanın gələcəyi haqqında necə düşünürsən?
– Azərbaycan çempionatında mübarizəmiz davam edir. Ora köklənəcəyik və mövqeyimizi yaxşılaşdırmaq üçün oyunlara çıxacağıq. Çalışacağıq ki, xallar yığaq, yaxşı oyun göstərək və yuxarı pillələrə irəliləyək. Elə ola bilər ki, avrokuboklara da yollanaq. Futboldur və hər şey baş verə bilər.
AĞA