Müsahibə
Rahil dolu tribunalardan zövq alır: “Azərbaycandan gəldiyimi deyəndə qəribə baxırdılar”
Polşanın LKS klubunda çıxış edən Azərbaycan millisinin müdafiəçisi Rahil Məmmədovun futbolinfo.az saytına müsahibəsi
– Polşaya uyğunlaşa bilirsən? Özünü orada necə hiss edirsən?
– Burada hər şey yaxşıdır. Adaptasiya prosesi sürətli keçdi. Açığı, liqa çox xoşuma gəlir. Çempionat səviyyəlidir, sonuncu yerdə getməyimizə baxmayaraq, oyunumuza 18 min azarkeş gəlmişdi. Stadion dolmuşdu, bu cür atmosferdə oynamaq çox gözəldir. Düzdür, qalib gəlsək, daha yaxşı olardı. Amma bu futboldur və hər sezon yüksək səviyyədə çıxış etmək olmur. Hərdən belə vəziyyətlərə düşürsən. LKS-in çox yaxşı şəraiti, bazası var, qalır futbol oynamaq. Məni burada yaxşı qarşıladılar, ümid bəsləyirlər.
– İki turda meydana çıxmısan və bu oyunlardan sonra mətbuat sənin özünü yaxşı tərəfdən göstərdiyini yazır. Bu, səni motivasiya edir?
– Əlbəttə, yaxşı şeylərin yazılması xoşdur, amma deməzdim ki, bütün motivasiyam bundan asılıdır. Çünki futbolda yaxşı da oynayırsan, zəif də çıxış edə bilərsən, problemlər də ola bilər. O zaman haqqımda pis yazsalar, o demək deyil ki, mən qarşıdakı oyuna motivasiyasız çıxacam. Ekspertlərin də işi yaxşı olanda yaxşı, pis olanda pis olduğunu desinlər. Təbii ki, xoş sözlər həmişə adama müsbət təsir edir. Burada Azərbaycanı təmsil edirəm. Yeni gələndə soruşurdular, Azərbaycandan gəldiyimi deyəndə qəribə baxırdılar. “Qarabağ”da oynadığımı deyən kimi ciddi yanaşırdılar ki, uğurlu klubdan bura transfer olunmuşam. Yenə də məsuliyyəti üzərimdə hiss edirəm, ölkəmi layiqincə təmsil etməliyəm.
– Mahir Emreli də Polşa çempionatına “Qarabağ”dan getmişdi. Onunla bağlı nəsə danışırlar?
– Açığı, yox, heç onunla bağlı söhbət olmayıb. Heç nə soruşmayıblar. Bəlkə də Varşavadan uzağam deyə, bu barədə danışmırlar.
– Komanda sonuncu yerdədir, amma Polşa mətbuatı yazır ki, çox yaxşı şərait, maddi imkanlar var. Autsayder olmağa səbəb nədir?
– Bunu düz yazırlar ki, klubun hər bir şəraiti var. Futbol üçün nə desən, buradadır. Əsas da köklü klubdur deyə azarkeşləri çox möhtəşəmdir və dəstək böyükdür. İstəyirsən ki, bu komanda mütləq liqada qalsın. Üstəlik, klub rəhbərliyi də futbolu bilən insanlardır, onlarla danışanda görürsən ki, hər şeyi bilirlər, idman içində olmuş adamlardır. Biz də hər oyunda meydana çıxırıq ki, qalib gələk, komandanı liqada saxlayaq. Bu, bizim əsas məqsədimizdir. Fikrimcə, 4-5 oyundan sonra hər şeyi dəqiq bilərik, əvvəlcədən nəsə deməyək. Hamımız birləşib liqada qalmaq üçün oynayırıq.
– Özünü orada necə görürsən? Hazırkı klubuna daha yaxşı yerlərə getmək üçün tramplin kimi baxırsan?
– Sözün düzü, oynamaq üçün bura gəldim. “Qarabağ”da da meydana çıxırdım, amma az idi. Futbolçu üçün hər həftə meydana çıxmaq başqa şeydir. Oynayırsan, daim necə çıxış etdiyini bilirsən, meydanda özünü analiz edirsən, üstün və zəif cəhətlərinə diqqət edirsən. Həm də Polşa liqası açıq bazardır və buradan hər yerə getmək olar, daha yaxşı komandalara keçmək mümkündür. Klub Ekstraklassada qalsa, burada da davam etmək mümkündür. Mövsümün sonunda hər şeyi dəqiq biləcəyik. Öncədən nəsə demək çətindir. Hansısa klublar görüb məni istəyə də bilər. Mənim işim meydana çıxıb oynamaqdır, azarkeşlərdən həzz alaraq futbol oynamaq lazımdır. Hər matçda bu qədər tərəfdarın olması, onların qarşısında çıxış etmək başqa hisslərdir.
– Azarkeşsiz Azərbaycan çempionatı sənə ordan necə görünür?
– Azərbaycan klubları aşağı səviyyəli deyil, futbol oynayırlar, topla daha çox olmağı sevirlər. Bizim komandalar getdikcə daha yaxşı olur. Amma futbolui gözəlləşdirən azarkeşlərdir, şəraitdir. Məsələn, “Sumqayıt” Mehdi Hüseynzadə adına stadionun açılışında “Neftçi”yə qarşı oynayanda hər şey başqa cür görünürdü. Xeyli azarkeş, atmosfer… Buradan da baxanda maraqlı görünür. “Sumqayıt”ın əvvəlki stadionunda keçirdiyi oyunlarla həmin oyun arasında fərq var idi. Burada da futbola maraq çox böyükdür. Bizim klublar futbol oynamağı bacarır, amma azarkeşsiz oyunlar kənardan baxanda adama çox sönük görünür.
– “Qarabağ” Avropa Liqasının pley-off mərhələsinin ilk oyununda “Braqa”nı səfərdə 4:2 hesabı ilə məğlub etdi. Həmin oyunu izlədin?
– İzlədim və çox yaxşı oyun oldu. Səhərisi gün məşqə gələndə komanda yoldaşlarım təəccüblə soruşurdular ki, “Qarabağ” “Braqa”nı necə uddu, çox yaxşı idilər. Məşqçi özü də məndən bir neçə şey soruşdu. Ağdam klubunun Avropada qoyduğu ad ciddidir. Həmin an orada olmağı ağlıma gətrmədim, artıq “Qarabağ”la yollarımı ayırmışam və yaxşı çempionata gəlmişəm. Bütün diqqətim, fikrim buradadır. Özümü maraqlı liqada sübut etmək istəyirəm.
– Səncə, “Qarabağ” səfər qələbəsi ilə 1/8 finalı təmin edib, yoxsa Bakıda daha çətin olacaq?
– Həll etdiyini demək olmaz. Bakıda çox çətin olacaq. Ümid edirəm ki, komandamız istədiyinə nail olar və mərhələni keçər.
FƏRİD