“Rakuv” hava ilə də mübarizə aparmalı olacaq”

Azərbaycanda 2012-2013-cü illərdə “Simurq”un, 2013-2017-ci illərdə isə “Qəbələ”nin formasını geyinmiş polşalı qapıçı David Pietrzkieçivin futbolinfo.az saytına müsahibəsi

– Sabiq komandanız “Rakuv” vaxtilə rəqib olduğunuz “Qarabağ”la Çempionlar Liqasının II təsnifat mərhələsində üz-üzə gəlib və ilk oyunda həmyerliləriniz 3:2 hesablı qələbə qazanıb. Matça baxdınız?

– Bəli, görüşə baxdım. Bol qollu və sürətli olması azarkeşləri yəqin ki, sevindirdi. Hiss olunurdu ki, hər iki komanda qələbə qazanmaq istəyir. Şəxsən mən gözlədiyim kimi mübarizə izləyə bildim.

– “Rakuv”un qələbəsi sizin üçün sürpriz olmadı?

– Düşünmürəm ki, bu, kimin üçünsə sürpriz sayılsın. Düzdür, “Qarabağ”ın böyük Avropa təcrübəsi var. Amma Polşa çempionu olmaq da asan deyil.

– Bakıdakı cavab qarşılaşmasından nə gözləyirsiniz?

– Eyni gərginliyin Bakıda da davam edəcəyini düşünürəm. Cütün taleyi orada həll olacağı üçün hər kəs gözünü bu matça dikəcək. Məncə, “Rakuv”a Polşadakı oyundan ikiqat ağır olacaq.

– İlk oyunda məğlub olmasına baxmayaraq, “Qarabağ”ı cütün favoriti saymaq olar?

– Razıyam. “Qarabağ” fərdi baxımdan usta oyunçulara malikdir və qısa pasları əla oynayır. Texniki baxımdan hazırlıqlı komandadır. “Rakuv”un avrokuboklarda “Qarabağ” qədər təcrübəsi olmadığını da unutmaq olmaz. Ancaq bir qol hər şeyi dəyişə bilər. İstənilən halda “Rakuv” meydana öndə çıxacaq. Start təzyiqinə düzgün reaksiya göstərə bilsələr, mərhələ adlaya bilərlər. “Rakuv”un da heyətində fərq yarada bilən oyunçular var.

– Polşa mətbuatı “Qarabağ”ı öz klublarının “cəlladı” adlandırıb. Bu amilin “Rakuv”a psixoloji təsiri ola bilər?

– Statistika dünən üçündür. Bu gün isə yeni səhifə açılır. Heç kim meydana çıxanda rəqibin məğlubedilməz olduğunu düşünmür. Üstəlik, “Rakuv” ilk matçda qalib gəldiyindən, artıq bunun mümkünsüz olmadığını bilir. “Rakuv”u “Qarabağ”ın ötən mövsüm üstələdiyi “Lex”lə eyniləşdirmək olmaz. Sabiq komandam tam fərqli oyun üslubuna malikdir.

– “Qarabağ”ın avrokuboklardakı ev oyunlarında azarkeş dəstəyi güclü olur. Yəqin ki, siz də buna şahidsiniz…

– Bəli, Avropa oyunları zamanı Bakı stadionunun tribunaları ağzına qədər dolur. Bu dəstək Polşa stadionlarında bildiyimizdən fərqlidir. Azarkeş amilindən əlavə, hava durumu da vacib rol oynayacaq. “Qarabağ” Bakıda istidə və küləkli havada oynamağa öyrəşib. Yəni həmyerlilərim təkcə rəqib və azarkeşlərlə deyil, hava ilə də mübarizə aparmalı olacaq.

FƏRİD