Müsahibə
Rauf Əliyev: “Qarabağ” bütün proqnozları alt-üst etdi”
“Qarabağ” klubunun və Azərbaycan yığmasının sabiq hücumçusu Rauf Əliyevin futbolinfo.az saytına müsahibəsi
– Sabiq komandanız “Qarabağ” Avropa Liqasının pley-off mərhələsində səfərdə “Braqa” üzərində 4:2 hesablı qələbə qazandı. Portuqaliyada bu nəticəni gözləyirdiniz?
– Real danışsaq, “Qarabağ”ın səfərdə “Braqa” kimi komandaya belə hesabla qalib gələcəyini heç kim fikirləşmirdi. Kimsə bunu öncədən desəydi, gülərdik ki, bu, futbolu bilmir. Amma təmsilçimiz bütün proqnozları alt-üst etdi və çox gözəl oyunla qalib gəldi. “Qarabağ” böyük komanda olduğunu artıq Avropaya da sübut edə bilir. İnşallah, evdəki oyunda da bu nəticənin ardı gələr.
– “Qarabağ” Bakıda keçiriləcək cavab görüşündə hər hansı bir çətinliklə üzləşə bilər?
– “Braqa”nın artıq itiriləsi bir şeyi olmadığı üçün var gücü ilə hücuma atılacaq. Rəqib Portuqaliyadakı matçla müqayisədə bu oyunda daha istəkli olacaq. Çünki “Qarabağ”a uduzsalar, hər şey əllərindən çıxır, mübarizəni erkən dayandırmalı olurlar. İnanıram ki, “Qarabağ” öz futbolu ilə bu mərhələni keçən tərəf olacaq.
– Sizcə, “Qarabağ” Avropa Liqasında hansı mərhələyə qədər irəliləmək gücündədir?
– Azərbaycanda hər kəs – futbol ictimaiyyəti və azarkeşlər istəyir ki, “Qarabağ” Avropa Liqasında daha da irəli getsin. Göstərdiyi oyuna görə komandamıza inanırıq. Bir sistemin üzərində neçə vaxtdır işləyirlər və yaxşı nəticələr qazana bilirlər. “Qarabağ”ın daha da irəli getməsini çox istərdik.
– “Braqa” üzərindəki qələbədən sonra Abdullah Zubirə Almaniya və Şotlandiyadan təkliflər gəlib. “Qarabağ” Zubiri heyətində saxlaya biləcək?
– Zubir artıq neçə illərdir ki, “Qarabağ”ın heyətindədir. Hər il yaxşı oynadığı matçlardan sonra ona təkliflər gəldiyinə dair fikirlər səsləndirilir. Komandanın uğurlu nəticələri olursa və həmin futbolçu vurduğu qollarla, göstərdiyi oyunla bu nəticələrdə böyük pay sahibidirsə, əlbəttə ki, təkliflər alacaq. “Qarabağ”ın bundan əvvəlki illərdə də oyunçularına yaxşı təkliflər olub. Amma mənə elə gəlir ki, Zubir “Qarabağ”ı tərk etməz. Çünki əvvəlki illərdə də belə təkliflər alıb, ancaq getməyib. Fikrimcə, yenə getməyəcək, “Qarabağ”da qalacaq.
– Yığmamızın Millətlər Liqasındakı rəqibləri haqda hansı fikirdəsiniz? İsveç, Slovakiya və Estoniya ilə bir qrupda hansı nəticəyə ümid etmək olar?
– Milli barəsində onu deyə bilərəm ki, çətin qrupa düşdük. Estoniyanı dişimizə görə rəqib saymaq olar. Slovakiya və İsveç isə bu qrupun favoritləri sayılırlar. Amma futboldur, millimizdən də yaxşı nəticələr gözləyirik. Yığmaya Millətlər Liqasında uğurlar arzulayıram.
– Millinin yeni baş məşqçisinin adı hələ də bəlli deyil. Yeni təyinatın gecikməsi bizə ziyan olmayacaq?
– Aylardır millinin baş məşqçi məsələsi ilə bağlı hər kəs sual verir, soruşur. Kimin gələcəyi, doğrudan da, hamını maraqlandırır. Yəqin ki, bir məşqçi tapılacaq. Amma xarici və ya yerli olacağını demək mümkün deyil. Kim gəlir-gəlsin, milliyə xeyri dəysin. Futbolumuzun inkişaf etməsi üçün yığmamız da nəticə verməlidir. İstərdik ki, millimiz də öz uğurları ilə bizi sevindirsin.
ABBAS