Rövnəq Abdullayev yenidən futbolda: bu dəfə fərqli ampluada?

Rövnəq Abdullayev futbola qayıdır. 13 ildi AFFA prezidenti olmasına rəğmən, Elşad Nəsirov – Elxan Məmmədov cütlüyü tərəfindən ofsayda salınan, hətta qurumun binasındakı iş otağı əlindən alınan Abdullayevin dünənki açıqlamasının başqa izahı yoxdu. Son vaxtlar futbol tədbirlərindən sonra hətta mətbuat konfransına buraxılmayan Rövnəq bəy iki cümlə ilə çox şey deyib.

Adıçəkilən şəxslərin qurduğu oyunlardan sonra Abdullayevin AFFA prezidentliyi formallığa dönüb. Nizamnamə dəyişikliyi ilə bütün səlahiyyətlər yeni təsis edilən icraçı vitse-prezident postunu qamarlayan Elxan Məmmədovun əlində cəmləşib. Onun prezident kimi imza atmaq, danışıq aparmaq hüququ var. Bir sözlə, futbol təsərrüfatında bütün idarəçilik birbaşa Məmmədovun iradəsinə tabe edilib. Rövnəq bəy yalnız sponsor SOCAR-ın prezidenti kimi formal fiqurdu.

Vaxtilə yuxarı dairələrə Abdullayev haqda informasiyalar, onun işləməyə mane olması barədə məlumatlar ötürülmüşdü. O da kənara çəkildi, maliyyəni ayırdı və səlahiyyətləri Nəsirov – Məmmədov cütlüyünə verdi, bu şəxslər əsas söz sahibi oldu. Nəticə göz önündədi, futbolumuz ən pis günlərini yaşayır, narazılıq hər keçən gün daha da artır.

Dünən cüdo federasiyasında baş verən qəfil dəyişikliklər göstərdi ki, artıq futbol dövlət rəhbərliyinin müzakirə predmetidi. Və klan savaşları qızışır. Cüdo federasiyasında yeni idman nazirinin gəlişindən sonra başlanan araşdırmalar dünənki dəyişikliklə əlamətdar oldu, Abdullayevi başqa bir nazir əvəzlədi. Rövnəq bəyin cavabı verdiyi mesajda gizlənir…

Adətən kiminsə vəzifədən, həm də qəfil getməsi “vurulması” kimi qiymətləndirilir. Ancaq Abdullayevlə bağlı durum fərqlidi – o, AFFA-dan uzaqlaşdırılsaydı, belə düşünmək olardı. Üstəlik, həm xələfi, rəqəmsal inkişaf və nəqliyyat naziri Rəşad Nəbiyev, həm də MOK-un vitse-prezidenti Çingiz Hüseynzadə onun gördüyü işlər barədə yüksək fikirlərini izhar etdi. Deməli, vida razılaşdırılmış olub. Əvəzində Rövnəq bəy strateji açıqlama verdi: “Artıq futbolla məşğul olacağam. Futbolda ciddi işlərin görülməsinə ehtiyac var”.

Bu, o deməkdi ki, “futbolda işimə davam edirəm” və AFFA-ya gəlməkdə maraqlı olan, iş aparan adamlar onunla qarşılaşacaq. Sözügedən açıqlama hansısa məmurun icazəsiz dilə gətirəcəyi sözlər deyil. Deməli, buna razılıq alınıb, Abdullayev futbolda olacaq dəyişiklikləri də yalnız özünün edə biləcəyinin mesajını verdi.

“Artıq futbolla məşğul olacağam” – bu, həm də o deməkdi ki, indiyədək futbolla məşğul olmayıb, bu işi başqaları görüb, vəziyyət biabırçı həddədisə, elə həmin adamların (oxu: Elşad Nəsirov, Elxan Məmmədov – red.) günahıdı. “Futbolda ciddi işlərin görülməsinə ehtiyac var” cümləsi də bunun davamıdı. Yəni, ciddi islahatlar olacaq. Bu, Premyer Liqada komanda sayının artırılması və y hansısa akademiyanın açılmasıyla yekunlaşmamalıdı, kadr dəyişiklikləri qaçılmazdı.

Təbii ki, bugünədək olanlar göstərir ki, indiki idarəçi komandayla yola davam etmək mümkünsüzdü. İctimaiyyət, azarkeşlər Elxan Məmmədovu bir nömrəli günahkar sayır, onunla davam etmək AFFA-ya tənqidləri azaltmayacaq. Abdullayev daxildə islahatlar aparmalı, yenidən futbolda əsas simaya çevrilməlidi. Sonrakı addımlar zamanla müəyyənləşəcək. Elxan Məmmədovun rayonları gəzməsi, fotosessiyalar etməsi, vacib məqamda Şamaxıda üzə çıxması, istifadəyə tam hazır olmayan stadionun açılışının tezləşdirilməsi özüylə bağlı əndişələrin nəticəsidi, şəxsini qorumaq istəyir.

Dünən başverənlər həm də onu göstərdi ki, yığma komandaya türkiyəli baş məşqçi gətirmək Məmmədovun beyninin məhsulu deyil, Abdullayevin seçdiyi strateji xəttdi. Həmişə Türkiyədən böyük dəstəyi olan Rövnəq bəy bu ölkəylə bağlı uzunmüddətli planı razılaşdırıb və icrasına şəxsən rəhbərlik edəcək.

İstənilən halda, maraqlı tərpənişlərdi. Amma Abdullayev illərdi onu nüfuzdan salan komandasında mütləq islahatlar aparmalıdı. Əməli addımlar atılmasa, futbol marketoloqlardan təmizlənib mütəxəssislərə tapşırılmasa, azarkeşlərin başı aldadılacaq, daha 4-5 ili itirəcəyik. “Futbolda ciddi işlərin görülməsinə ehtiyac var” cümləsi özünütənqiddi və ilk növbədə buna səbəb olan “mütəşəkkil dəstə” barədə ölçü götürülməlidi. AFFA-da işğal edilən iş otağı, rəhbərlik baxımından əldən gedən söz sahibi ünvanı geri qaytarılmalıdı. Əks halda, cüdoda ona ippon atanlar futbol meydanında da het-trik üçün boş dayanmayacaq. Məğlub olmamaq üçün heyətdəki zəif oyunçuları əsl peşəkarlarla dəyişmək lazımdı.

VÜSAL MAHMUDOV