Ölkə futbolu
“Səbail” rəhbərliyinin 300 uşağı xilas etmək imkanı tükənməyib! Elə Diniyevin də…
“Səbail”in baş məşqçisi Şahin Diniyev dünən verdiyi açıqlama ilə yenidən diqqət mərkəzinə düşdü. Təcrübəli çalışdırıcı “Qəbələ” ilə kubok matçından sonra təmsil etdiyi klubun vəziyyətini izah etməyə çalışdı.
Premyer Liqada son pillədə olan “Səbail”in Diviziona düşmək ehtimalı böyükdür. Bu, reallaşsa, kluba bir çox problemlər yaranacaq. Diniyev məhz bunu nəzərdə tutaraq danışıb: “Bir fikir bildirəndə yanaşmalar fərqli olur. Mən fikir bildirəndə tək əsas komandalar üçün demirəm. Hər klubun aşağı yaş qrupları da var. Elitanı tərk etsələr, aşağıdakılar necə olacaq? 4 komandanın taleyinə yanaşmanı bildirmişdim. Aşağı yaş qruplarının, akademiyalarda olan uşaqların futbolsuz qalmasını istəmirəm. Hər komandada 20 futbolçu olduğunu hesablasaq, təxminən 300 oyunçu edir. Onların taleyi necə olacaq?”
Yaxşı sualdır. Lakin qaydalar var və onlar əsas olmalıdır. Heç bir istedadlı futbolçu kənarda qalmayacaq, “Səbail” gedəcək, “Araz Naxçıvan” onlara sahib çıxacaq. Muxtar respublikanın təmsilçisi də uşaq komandalarının qurulması baxımından əziyyət çəkir və belə kollektivləri Bakıda formalaşdırmaq niyyətindədir. Deməli, 300 nəfər “Səbail”də kənarda qalacaqsa, bir o qədər adam “Araz Naxçıvan”da yeni yola qədəm qoyacaq. Sadəcə, bir düşərgədən digərinə köç edəcəklər.
Ümumiyyətlə, bu yanaşma doğru sayıla bilməz. O zaman çempionat nə üçündür, hamı necə çıxış etməsndən asılı olmayaraq, Premyer Liqada qalacaqsa, bunun nə faydası var? İnkişafı rəqabət gətirir və indiki halda “Səbail” mübarizəni uduzur.
Diniyevi anlamaq olar, futbol adamıdır, futbolçu valideynidir, özü də futbolçu ikən belə problemləri görüb. Lakin həyat qanunları sərtdir və həm də ədalətlidir, iş düzgün qurulmayıbsa, uğursuzluq varsa, qurbanlar da olmalıdır.
300 uşağın kənarda qalması “Səbail” rəhbərliyinin günahıdır. Klub başbilənlərinin səriştəsi olsaydı, bu qədər yaxşı büdcənin qarşılığında nəticələr indiki qədər pis olmazdı. Mahmud Qurbanova layiq olmadığı dəstəyi verəndə, onun ətrafına topladığı bacarıqsız insanlara güvənəndə aqibət belə də olmalıydı.
Daha bir günahkar AFFA rəhbərliyidir. Klubları bütün yaş qrupları üzrə komanda saxlamağa məcbur etmək yanlışdır. UEFA-nın lisenziya tələblərində yalnız 3 komandanın saxlanılması məcburidir, AFFA isə hər yaş qrupu üçün komanda, üstəlik qızlar kollektivi tələb edir. Yalandan say düzəldəndə onun fəsadı da belə olmalıdır. Bəhanələrlə davam etsək, gərək heç vaxt Premyer Liqanı kimsə tərk etməsin, uğursuz olanlar cəzasını çəkmədən yola davam etsin və hamı baş girləsin.
Diniyevə hörmətimiz böyükdür, o açıqlamada məqsədinin də futbolu düşünmək olduğuna inanırıq. Amma bu açıqlamanı indi verməsi bəhanəyə oxşayır. Sonuncu kim olursa-olsun, Premyer Liqanı tərk etməlidir. Nişan verilən o 300 uşağın içərisində olan istedadlılar isə mütləq klublarımıza lazım olacaq, heç kim taleyin ümidinə buraxılmayacaq. Həmin uşaqlarla yanaşı ümumi futbolumuzun aqibətini düşünmək daha faydalıdır.
Həm də Şahin bəyin həmin 300 uşağı xilas etməyə hələ imkanı var. Qarşıdakı 6 turda yalnız bir komandanı üstələmək gedişatı dəyişmək üçün kifayət edəcək. Alınmasa belə, “Səbail” rəhbərliyi həmin uşaqlara dəstək dura bilər. Niyyətləri həqiqətən Azərbaycan futboluna xidmət etməkdirsə, təkcə mükafatlara il ərzində yarım milyon manat xərcləyən klub başbilənlər bu pulun 15-20 faizi ilə gələcək nəslin yetişməsi üçün xidmətini göstərə bilər. Diviziona düşmək dünyanın sonu deyil, Premyer Liqaya qayıdarkən bu uşaqlar yenə lazım olacaq.
ABBAS
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…