Şəxsi biznes planlarına qurban gedən “Sumqayıt”

Ayxan Abbasovu niyə tənqid edən yoxdu? Axı, “Şkendiya”ya uduzan komandanın baş məşqçisi odur. Yəni, heç səhv etmədimi?

Azarkeşlər, mətbuat, futbol ictimaiyyəti hər şeyi gözəl anlayır. O, ən az büdcə ilə kiçik möcüzəyə imza atan, “Sumqayıt”ı hətta Riad Rəfiyevin yuxusuna girməyən hədəfə çatdıran adamdı. Və həmin uğuru qazanmaq üçün əmək sərf etmiş, iki ilini vermişdi. Amma klubunun rəhbərliyi, sponsorları dar düşüncəli, kiçik hədəflərə köklənən adamlardısa, bundan artığı mümkün deyil.

“Sumqayıt” yayda tamamilə dəyişdi. Əksər aparıcı futbolçular getdi, komandanın onurğa sütunu qırıldı. AFFA prezidenti Rövnəq Abdullayevin oğlunun “Səbail”inə, İcraiyyə Komitəsinin üzvü Zaur Axundovun “Keşlə”sinə 4-5 milyon manatlıq büdcə ayrıldığı halda, “kimyaçilar”a bunun 1/3-i layiq bilindi. Halbuki azarkeşi, futbolsevəri ilə hətta Bakıya meydan oxuyan Sumqayıt daha yaxşılara layiq idi.

Əslində, bu şəhərin AFFA-nın əlinə baxması özü ayıbdı. Assosiasiya kluba qondarma bir rəhbər qoyub, Sumqayıtda futbol olduğunu göstərmək üçün yalançı fon yaradıblar. Halbuki bu şəhərə böyük komanda, çempionluq rəqabəti yaradan kollektiv yaraşar. Əvəzində “Sumqayıt” böyüməyə başlayan kimi qol-qanadını qırır, yaratdıqlarını məhv edirlər.

Yayda komandanı tərk edən Aleksey İsayev, Şəhriyar Əliyev, Əmir Ağayev, Peyman Babayi heyətin canı idi. Onlara layiq olduğu pul verilmədi, getdilər. Əvəzində klubun menecer-prezidenti Riad Rəfiyev gələcəkdə transferindən (klubun xeyri naminə satışından yox ha!) pul qazanmaq həvəsi ilə İrandan 2, Qazaxıstandan 1 “stolba” gətirdi. Ki, Ayxan Abbasov digərləri kimi onları da yetişdirib futbolçu etsin, Riad da satıb pul qazansın. Necə ki, Əmir Ağayevi Yunanıstan klubuna göndərib öz cibini doldurdu.

“Sumqayıt” AFFA rəhbərliyinin də təmsil olunduğu bir dəstənin oyuncağıdı. Bu klubdan milliləşmə biznesi üçün istifadə edilir, böyük kluba çevirmək kimi istəkləri yoxdu. Ad var və onun altında öz maraqlarını təmin edirlər. Sumqayıtlıların arzuları, istəkləri, həyəcanı heç kimin vecinə deyil.

Dünən tarixi oyuna, ilk avrokubok matçına çıxan “Sumqayıt”ın qəbri çoxdan qazılmışdı. Abbasov ya yeni möcüzə etməli, ya da təslim olmalıydı. Oyun baxımından qüsur yox idi, amma heyətlərin müqayisəsində səviyyə fərqi özünü göstərdi. Qonaqlar oyun epizodlarında üstələyə bilmədiyi rəqibi haqlı penaltilərlə yendi. Ayxan bəyin ötənmövsümkü heyəti bu “Şkendiya”nı asanlıqla keçərdi, təəssüf ki…

“Sumqayıt” AFFA rəhbərliyi üçün təcrübə dovşanıdı. Kimə pasport lazımdısa, bu komanda vasitəsi ilə düzəldirlər, dağıstanlını, iranlını, türkiyəlini bir gecədə “azərbaycanlı” edib öz bizneslərini inkişaf etdirirlər. Şəhər futbolunun inkişafı onlara sərf etmir, bunda maraqlı deyillər. Sumqayıtlılar özü Rəfiyev kimiləri qovmayınca kukla tamaşasına elə stadionun ətrafına çəklən hasarın arxasından baxmağa davam edəcəklər. Və o meydanda yerli uşaqlar ildə 1-2 oyun oynayacaq, sonra isə Canetova, Qurbaniyə, Xocaniyazova, Həmatiyə qurban verilərək məhv ediləcək.

Bu gedişlə Ayxan Abbasov da qısa müddətdə qazandığı müsbət imici Rəfiyevin yolunda xərcləyəcək. Məğlubiyyətlər sıralanınca Riad siçan deşiində gizlənəcək, azarkeşlər isə cavabı baş məşqçidən soruşacaq. Belə hadisələr sıralandıqca əsl günahkar unudulacaq, göz önündə olan hədəfə çevriləcək. Unutmayın…

CAVAD