“Sabah” 37 yaşlı Musayevə tapşırılacaq: “Krasnodar”ın sabiq baş məşqçisi artıq Bakıdadı

“Sabah” baş məşqçi postunu yenə əcnəbiyə tapşırır. Klub xəbəri gizli saxlamağa çalışsa da, bizdə olan bilgiyə görə, bakılıların yeni çalışdırıcısı bir neçə gündü Bakıdadı və yaxın vaxtlarda təyinatı rəsmən açıqlanacaq.

Futbolinfo.az xəbər verir ki, Ramin Quliyevin qəfil istefasının səbəbi də budur. Onun növbəti matça 2 gün qalarkən işindən ayrılmasının səbəbi xələfinin kimliyini, danışıqlar aparıldığını bilməsidi.

Milliyətcə tatar olan Murad Musayevlə 3+1 illik müqavilə bağlanacaq. Təyinatın rəsmiləşməsi üçün xırda detalların razılaşdırılması qalıb. Belə ki, məşqçi qışda yaxşı büdcə ayrılmasını, heyətdə ciddi islahat aparmasına şərait yaradılmasını tələb edir.

Musayev Krasnodar şəhərində doğulub. Futbolçu karyerası olmayan 37 yaşlı mütəxəssisin zəngin karyerası yoxdu. O, Kuban Fiziki Hazırlıq, İdman və Turizm Universitetini bitirib, oxuduğu zaman gənclərdən ibarət “Krasnodar-2000” klubunda uşaq məşqçisi kimi işləyib. 2011-ci ildə “Krasnodar”ın futbol akademiyasında fəaliyyətə başlayan Musayev 2018-də klubun gənclər komandasının məşqçisi təyin edilib. Məşqçi “Krasnodar”ın 19 yaşadək futbolçulardan ibarət komandası ilə birlikdə, 2017–18 mövsümündə UEFA Gənclər Liqasının pley-off mərhələsində iştirak edib. Krasnodarlılar pley-offda “Real”a məğlub olur. Bu oyunun ardından Krasnodar şəhər stadionunun qarşısındakı münaqişədən sonra klubdan kənarlaşdırılıb.

Musayev 2018-ci ildə İqor Şalimovun gedişindən sonra “Krasnodar” klubunun müvəqqəti məşqçisi təyin edilib. UEFA Pro Lisenziyasının olmaması səbəbindən Rusiya Premyer Liqasında məşqçi kimi qeydiyyata alınmayıb. Musayev o zaman yalnız UEFA B Lisenziyasına sahib olduğundan Rusiya Premyer Liqasında məşqçi kimi rəsmi olaraq Oleq Fomenko qeydiyyata alınıb. Musayev onun köməkçisi kimi göstərilsə də, əsas söz sahibi olub. 2019–20 mövsümündən əvvəl Fomenko “Krasnodar-2” klubuna göndərilib, Sergey Matveyev yeni baş məşqçi, Musayev isə rəsmi olaraq onun köməkçisi təyin olunub. 2020-ci ilin iyununda Musayev PRO kateqoriyası alınca rəsmi olaraq “Krasnodar”ın baş məşqçisi təyin edilib. Bu ilin aprelində evdə “Axmat”a 0:5 hesablı məğlubiyyət doğma komandasında qovulmasıyla nəticələnib.

Əsas uğuru gənclər komandasıyla olan Musayevin “Sabah”a hansı fayda verəcəyini zaman göstərəcək. Maraq üçün xatırladaq ki, Jelko Şopiç və Visente Qomes də oxşar vizit kartına malik idi. Heç Ramin Quliyevin də zəngin məşqçi karyerası yox idi. Və onların heç biri “Sabah”ın dərdinə dərman olmadı. Böyük büdcəyə, yaxşı heyətə rəğmən, komanda bir qayda olaraq, autsayderlər sırasında qərarlaşır.