“Sabah” təkbaşına 9 komandadan çox qol vurdu

Sürpriz olmadı, 9-cu turun son oyun günündə favoritlər növbəti qələbəsini qazanıb zirvədə möhkəmləndi. “Qarabağ” buna çətinliklə nail oldusa, “Sabah” “Kəpəz”i darmadağın etdi.

Turun mərkəzi oyununun əsas olayı İlkin Qırtımovun Marko Yankoviçə qarşı kobudluğu idi. Meydan sahiblərinin müdafiəçisi ustalıq səviyyəsinin aşağı olmasını karate zərbəsi ilə sığortalamaq istərkən qarşısında qırmızı vərəqə gördü.

Ümumiyyətlə, “Qəbələ”nin futbolçuları aşkar güclü olan rəqibi dayandırmaq üçün hər cür kobudluğa əl atırdılar. Sürət tempinə çatdırmayan Elmar Baxşıyevin yetirmələri, bu yolla “Qarabağ”ın gözünü qorxudacaqlarını düşünürdülər. Lakin gərgin qrafikin yorduğu ağdamlılar hətta bu vəziyyətdə də 3 xal əldə etməyi bacardı.

Meydana ehtiyat qüvvəni buraxan Qurban Qurbanov zədədən dönənləri və az şans qazananları iş başında görmək üçün yaxşı fürsət qazanmışdı. Belədə ardıcıl çətin matçlar keçirən əsas heyətin yükü azalmışdı. Lakin bu da “Qəbələ”yə kömək etmədi. Xallarını zəif komandalarla matçlarda qazanan bölgə təmsilçisi növbəti dəfə favoritlə görüşdə məyus oldu. Düzdü, bunda komandanın azlıqda qalması da rol oynadı.

Qurbanov son yarım saatda bəzi əsas oyunçuları meydana buraxdı. Amma nəticə onlar oyuna qoşulanadək müəyyənləşmişdi. Ramil Şeydayevin inadkarlıqla qovub cərimə meydançasına göndərdiyi topu Filip Ozobiç ustalıqla tora yönəltdi. Qapıçı Səlahət Ağayevin də səhv etdiyi epizodda hesabın açılması qalan dəqiqələrdə “Qarabağ”ın gücünə qənaət etməsinə səbəb oldu.

Turun ilk 4 oyununda 3 qol vurulmuşdusa, “Sabah” təkbaşına şou göstərdi. Bakılılar “Kəpəz”i 5 dəfə məyus edib onların top fərqindəki mənfi saldocunu 17-ə qaldırdı. Maraqlıdı ki, Premyer Liqada hətta bu qədər top buraxan komanda yoxdu, gəncəlilər isə 9 tura 23 dəfə məyus olublar. Ümumiyyətlə, bu turda komandalardan 6-ı qol sevinci yaşamadı.

Tərlan Əhmədovun gəlişindən sonra 3 oyuna 4 xal qazanmağı bacaran “Kəpəz” qara zolaqdan çıxmışdı. Lakin bunun daha çox təqvimlə əlaqədar olduğunu, gəncəlilərin aşkar autsayderlərlə matçlarda xal qazandığını vurğulamışdıq. Qarşıya iddialı biri çıxan kimi 4-cü böyükhesablı yenilgi qaçılmaz oldu.

İnsaf naminə, “Kəpəz” belə hesaba layiq deyildi. Komandanın qapıçı və müdafiəçiləri kifayət qədər fərdi səhvə yol verdi və “Sabah”ın usta oyunçuları qonaqları bağışlamadı. Heyət keyfiyyətindəki fərq nəticənin müəyyənləşməsidə əsas rolu oynadı.

Bir oyunu ehtiyatda olan “Qarabağ” birinci dövrəni maksimum nəticə ilə zirvədə bitirdi. “Neftçi”ylə 3 xallıq fərq yaradan “Sabah” təqibi davam etdirirsə, “Zirə” “Qəbələ”ni ötməyə müvəffəq oldu. Autsayder qrupunun “üçlüy”ü ilə bu komandalar arasında ciddi fərq yaranmaqdadı. Liderlə son pillənin sahibi arasında 9 tura 22 xallıq fərq yaranıbsa, ağdamlıların fərqi artırmaq üçün daha bir matçı qalırsa, gərgin mübarizədən danışmaq yersizdi.

CAVAD