“Sabah”ın riskli seçimi

Kimin ağlına gələrdi ki, mövsümün əvvəlində “çempionluğa oynayacaq” dediyimiz “Sabah” belə vəziyyətə düşəcək. Hər nə qədər Aleksey Kaşukla Coy-Lens Mikelsin gedişinin komandanın çıxışına təsir göstərəcəyini düşünsək də, vəziyyətin bu qədər acınacaqlı olacağını gözləmirdik. Yuxumuza da girməzdi ki, “Sabah”ın xilaskarına çevrilən Murad Musayev də çətinliklərin öhdəsindən gələ bilmədiyini etiraf edərək istefa vermək məcburiyyətində qalacaq.

“Partizan”ı keçməyə yaxın olan bir komandanın oyununda penaltilərdəki uğursuzluqdan sonra 180 dərəcə pisliyə doğru dəyişmə bütün sistemi dağıtdı. Amma həyat yerində dayanmır. Bu, artıq baş verdi, indi isə vəziyyətdən çıxaq lazımdır.

Məlum məsələdir ki, “Sabah” yerli mütəxəssisə tapşırılmayacaqdı, ölkə xaricindən kimisə gətirəcəkdilər. Yeni baş məşqçisi Murad Musayev kimi sürət yığa biləcəkdimi? Hamını bu sual düşündürdüyü halda, “bayquşlar”ın səsi Balkan yarmadasından gəldi. Serbiya klubunun zərbə vurduğu komandaya Xorvatiyadan dəstək gəldi.

Krunoslav Renduliç – Azərbaycanda bu şəxsi tanımırlar. Halbuki, Musayevi bura gələndə “Krasnodar”dakı uğurlu fəaliyyətinə görə tanıyırdıq. Renduliç də uğursuz məşqçi deyill. Amma bu regionun adamı olmadığına görə, Qafqaz futbolundan baş çıxara biləcəkmi? Zaman göstərəcək. Elə biz də zamana boylanmaq qərarına gəldik. Amma gələcəyə yox, keçmişə. Kruniçin keçmişinə…

1973-cü il sentyabrın 26-da Xorvatiyanın Vinkovtsi şəhərində dünyaya gələn Renduliç oyunçu kimi futbolun sirrlərinə “Osiyek” akademiyasında yiyələnib. O, 1992-ci ildə bu komandanın heyətində debüt oyununa çıxıb. Müdafiəçi mövqeyində oynayan Renduliç daha sonra 13 klub dəyişib ki, bunların arasında bəzən vaxtilə oynayıb sonra yenidən ora qayıtdığı komandalar da olub.

Renduliçin “Osiyek”lə yanaşı çıxış etdiyi köklü klublardan biri də “Hayduk” və “Riyeka” olub.  Amma bu komandalarda 1-2 il oynamağı bacarıb. 2014-cü ildə karyerasını ölkəsinin “Luçko” klubunda bitirən Krunoslav elə həmin il İrana yollanıb. Bu ölkədə “Fulad” komandasında köməkçi-məşqçi vəzifəsində çalışan xorvatiyalı 2016-cı ildə vətəninə qayıdıb. Amma burada iki il özünə iş tapa bilməyib.

Nəhayət, 2018-ci ildə Xorvatiya çempionatında çıxış edən “İstra”dan dəvət alıb. 13-cü turdan bu komandanı götürən Renduliç 11 oyunda 7 məğlubiyyətdən sonra istefaya göndərilib. 10 komandalıq çempionatda o gələndə “İstra” 9-cu yerdə idi və 6-cı yerdən 4 xal geridə qalırdılar. Qovulanda isə artıq bu fərq 17 idi.

2019-cu ildə haqqında danışdığımız mütəxəssis 1-ci Liqada “Şibenik”in sükanı arxasına keçib. Renduliç 1997-99-cu illərdə orada futbolçu kimi də çıxış edib. 30 turluq çempionat koronavirusa görə 19 turdan sonra dayandırılıb, lider “Şibenik” isə 8 illik fasilədən sonra elitaya vəsiqə qazanıb. Amma komandanın yüksək liqada 2021-ci ilin fevralında ardıcıl 6 matçlıq uğursuz seriyasından sonra (4 məğlubiyyət, 2 heç-heçə) 26-cı turdan sonra ona istefa ərizəsi yazdırılıb.

Cəmi 2 ay sonra Krunoslav yüksək divizionun digər klubu – “Qoritsa”nın baş məşqçisi təyin olunub. Əslində, bu komanda 2021/22 mövsümünə pis başlamayıb. Hətta 19 turdan sonra 5-ci pilləyə də yüksəlib. Amma sonradan “Qoritsa”da eniş dövrü yaşanıb. Dekabrın ortalarından etibarən isə vəziyyət artıq nəzarətdən çıxıb. “Qoritsa” çempionatda ardıcıl 6 oyunda məğlub olub, ölkə kubokunun yarımfinalında isə “Hayduk”a uduzub. Bu da Renduliçin qovulmasına səbəb olub.

Ardınca Renduliç 2022-ci ilin ortalarında qısa müddətə İrana qayıdıb və cəmi 1 oyunda bu millinin sabiq baş məşqçisi Draqan Skoçiçin köməkçisi işləyib.

Mütəxəssis ən böyük uğurlarını isə Bosniya və Herseqovinada qazanıb. “Zrinski” onun rəhbərliyi altında 2022/23 mövsümündə ölkə çempionatının və kubokunun qalibi olub.

Renduliç bu komanda ilə cari mövsümdə UEFA Konfrans Liqasının qrup mərhələsində mübarizə aparıb. E qrupunda “Aston Villa”, “Legiya” və “AZ Alkmaar” ilə qarşılaşan “Zrinski” 4 xal toplayaraq sonuncu pillədə qərarlaşıb. Baş məşqçi çempionatda 4-cü pillədəki “Velej”ə böyükhesablı səfər məğlubiyyətindən (0:3) sonra gözlənilmədən istefa verib. “Zrinski” həmin vaxt 2-ci yerdə olub və lider “Borats”dan 4 xal geri qalıb.

Bəli, göründüyü kimi, son iş yeri onun karyerasının əsas vizit vərəqinə çevrilib. “Sabah” isə bu vizit vərəqindən dəvətnamə düzəldib. Maraqlı seçimdir, bəs görəsən uğurlu olacaqmı? Musayevə qədər seçimlər uğurlu olmayıb, hətta rusiyalı mütəxəssis belə yüksəltdiyi komandanı enişdən xilas edə bilməyib. Xorvatiyalının üzərinə böyük yük düşəcək. Bu mövsüm komandanı Konfrans Liqasına daşımaq olar. Komanda hazırda 6-cı pillədə qərarlaşıb və 2-ci pillə ilə aralarında 3 xallıq fərq var. Hər şey öz əllərindədir.

Görək, xorvatiyalı kollektivə necə nüfuz edəcək? İranda işləyib, bu da o deməkdir ki, regiondan xəbərdardır. Amma gəlin gözləyək və “Sabah”ın uğurlu seçim etdiyinə ümid bəsləyək. Hər halda, gələcəyə diqqət ayıran klubdur və onun uğuru futbolumuzun uğurudur!

FƏRİD