Ölkə futbolu
“Şamaxı” üçün edilən saxtakarlıq: klub “Keşlə”nin varisi deyil?
Sosial şəbəkədə, mətbuatda yayılan fotoların rəsmi əsasının olmadığına ümid edirik. Əks halda, AFFA-nın növbəti saxtakarlığından söz açmalı olacağıq. Söhbət “Şamaxı”ya çevrilən “Keşlə”nin imic dəyişikliyindəki qanunsuzluqdan gedir.
Milli komandanın nəticəsinin yaratdığı şokdan ayılmamış gözümüz “Şamaxı”nın yeni loqosuna sataşdı. Pişiyəoxşar şirlərin çox kobud təsvir olunduğu, zövqsüz dizaynlı emblem əyalətə köçən paytaxt klubunun tanınma nişanı olmalıdı. Hər nə qədər Şirvanşahlar dövrünün simvollarının əks olunduğu iddia edilsə də, şirlər loqoda təhqir olunmuş formada əks olunub, qədim şəhərimizin özəlliyini özündə əks etdirən heç nə yoxdu. Loqoda “Şamaxı” sözü yol-tanınma nişanıymış kimi çox kobud, iri hərflərlə yazılıb.
Emblemin hazırlanması üçün neçə min manatın büdcədən silindiyini deyə bilmərik, amma onu ortabab dizaynerin də deyil, kompüter proqramlarından başı çıxan istənilən şəxsin hazırlaya biləcəyini çəkinmədən iddia edə bilərik. İctimai müzakirəyə təqdim olunmadan, heç bir müsabiqə elan edilmədən ortaya çıxan loqo tələm-tələsik, gizli şəkildə klub avtobusuna da həkk edilib və yəqin ki, onun üçün də kifayət qədər yüksək məbləğ cibə ötürülüb.
Loqonun zövqsüz hazırlanması öz yerində, üzərinə yazılan 2022 rəqəmi daha çox müzakirə edilməlidi. Klubun yaranma ilini bildirən bu rəqəm Ədliyyə Nazirliyindəki rəsmiləşdirmənin eynidirsə, klub, onun himayəçisi və maliyyə təminatçısı AFFA böyük saxtakarlığa əl atıb. Çünki “Şamaxı” yeni yaranan klub deyil, “Keşlə”nin varisidi, deməli, həm də onun tarixinə sahib olmalıdı. Buna əməl edilmirsə, klub qanunları, xüsusilə də AFFA-nın bəh-bəhlə arxasında gizləndiyi lisenziyalaşdırma tələblərini pozub.
“Şamaxı” Premyer Liqada yeni klub kimi peyda ola bilməz, o yalnız “Keşlə”nin varisi kimi yola davam etməlidi. Elitaya yüksəlmək üçün komanda azı 3 il divizionda oynamalıdı. “Şamaxı” isə nəinki aşağı dəstədən yüksəlmir, hətta mövsümün gedişində başqa bir klubun nəticələrinə sahiblənərək yola davam edir.
Ola bilsin ki, məsələ ictimailəşdikdən sonra klub tələsik emblemə əl gəzdirib üzərindəki yaranma tarixini düzəldəcək. Amma o zaman klub avtobusunun görünüşü də yenilənməlidi. İstənilən halda, ya klubun yaranma ili “Keşlə”nin varisi olaraq 2004-cü il göstərilməli, ya da o Premyer Liqadan qovulmalıdı.
AFFA yəqin ki, bu barədə sorğuya cavab verməyəcək, məsuliyyəti klubun boynuna atacaq. Amma qabıq dəyişməkdə olan “Keşlə”dən də kimisə tapmaq mümkün deyil. Klub rəhbərliyi qeybə çəkilib, digər rəsmilər Zaur Axundovdan icazəsiz danışmağa qorxur. Yiyəsizliyin hökm sürdüyü paytaxt/əyalət təmsilçisində kimin nəyə cavabdehlik daşıdığı bilinmir.
“Şamaxı” klubu başıbəlalıdı, ağrılı keçmişə malikdi. Bu klub 1997-2004-cü illərdə fəaliyyət göstərən “Xəzər Universiteti”nin bazasında yaranıb. O zaman Beynəlxalq Bank 200 min dollar ödəyərək kluba sahiblənmişdi. Amma klub “İnter”ə çevrilərkən yaranma ili kimi 1997-ni götürmədi, futbol təsərrüfatımızda yeni klubların yarandığı, hamının sorğu-sualsız güclülər dəstəsinə buraxıldığı həmin dövrdə bakılılar 2004-ü loqosuna həkk etdi. 2017-də isə “İnter” adını dəyişib “Keşlə”yə çevrildi və klubun varisi oldu. Yuxarıda qeyd etdiyimiz tələblər üzündən bu dəfə yaranma tarixini dəyişə bilmədilər və “Keşlə” yaranan kimi birdən-birə 13 yaşını tamamladı.
Və indi “Keşlə”nin də loqosuna həkk etdirdiyi 2004 yaddan çıxıb, “Şamaxı” yeni klub kimi elan edilib. Bu, qəbuledilməzdi, dəyişiklik edilməzsə, saxtakarlığı sonadək ifşa edəcəyik, klubun Premyer Liqada qanunsuz iştirakını ictimailəşdirəcəyik.
Əslində, “Şamaxı”nın yeri futbol ənənələrini sahiblənməsi daha yaxşı olardı. 1990-cı ildə yaranan “İnşaatçı”, 92-də adını dəyişərək “Şirvan”a çevrilmişdi. Araşdırılsa, tarixi şəhərimizdə futbolun ənənələri daha qədimə gedib çıxır. Onları unudub “Keşlə”dən yeni klub qondarmaq, üstəlik, onun 2022-ci ildə yarandığını elan etmək ənənələrə hörmətsizlikdi. Rəhim Həsənov, Rafiq Cabbarov, Şahin Qədirov, Elşad Hacıyev, Tofiq Nurullayev, Elxan Rəsulov, Elxan Orucov, İlqar Əlibabayev kimi futbolçuların çıxdığı şəhərdə futbolun tarixi 2022-dən hesablana bilməz.
Bu, tarixi ənənələrə ilk hörmətsizlik faktı deyil. 15-20 il öncə yeni klublar yaranıb elitaya buraxılarkən əcaiblikləri çox görmüşük. “Xəzər Lənkəran” “Xəzər”in, “Sumqayıt” “Polad”dan “Vosxod”adək bir neçə klubun, “Bakı” “Dinamo”nun, “Muğan” “Plastik”in, “Simurq” “Daşqın”ın tarixinə hörmətsizlik etdi. Məhz tarixə belə biganəliyin nəticəsidir ki, keçmişimizlə, ənənələrimizlə öyünə bilmirik. Əslində, tarixi qədimlik var, amma hamısı məmurların eqoları üzündən toz-torpaq altında qalıb, kimsə də araşdırmağa cəhd etmir.
Premyer Liqa klublarına nəzər yetirsək, “Neftçi” və “Qarabağ”dan başqa kimsənin yaşı 10-15 ili keçmir. Halbuki futbolumuzun bir əsrdən çox yaşı olduğunu deyirik, tarixi sənədlər də bunu göstərir. Amma tarixə sahib çıxmaq lazım gələndə hansısa borcdan, maliyyə öhdəliklərindən qurtulmaq üçün “Turan”ı “Turan Tovuz”, “Kəpəz”i “Gəncə” edirik. “Keşlə”nin “Şamaxı”ya çevrilməsi isə tragikomediyadı – Şirvanşahların şiri hara, loqodakı 2022 hara?
CAVAD
P.S.: Tarixə sənədlərə görə, Azərbaycanda ilk futbol klubu – “Britaniya” 1911-ci ildə yaradılıb. “İdmançı”, “Sokol”, “Temp”, “İnşaatçı” “Neftçi”dən də qədim paytaxt təmsilçiləridi, amma heç biri indi yoxdur. Hətta 1928-ci ildə yaradılan Quba “Şahdağ”ı “Neftçi”dən 9 yaş böyükdü, indi isə Region Liqasında belə oynaya bilmir. Ağdam “Qarabağ”ı yarandığı 1951-ci ili yox, 1987-ni loqosunda daşıyır. Əvəzində ermənilər futbol tariximizə də sahiblənib. Xankəndi “Qarabağ”ı 1927-də yaranıb, bugünədək də tarixiylə öyünür, bizim imtina etdiyimiz ənənələri özününküləşdirib.