Şamaxıda bilet şousu: rayondakı idarələrə məcburi bilet paylanılıb

Şamaxıda yerli komandanın “Turan Tovuz”la yoxlama oyununa bilet satışı baş tutub. Gözlənildiyi kimi, oyuna gəlmək istəyənlər 3 manatından keçməli olub. Amma…

…Bu qiymət heç də matçı izləyən 300-400 nəfərlik azarkeşlər üçün deyilmiş. Əldə etdiyimiz bilgiyə görə, yerli azarkeşlər tribunalara xərcə düşmədən, onlara bağışlanan biletlərlə gəlib. Amma “Şamaxı”ya nəzarət edənlər biletdən kifayət qədər qazanıb.

Belə ki, yerli İcra Hakimiyyətinin tapşırığı ilə rayondakı dövlət idarələrinə, müxtəlif qurumlara, ən azı 5 ədəd olmaqla, biletlər paylanıb və pullar məcburən yığılıb. 2200 nəfərlik tutumu olan arenadakı oyun üçün elə o qədər 3 manatlıq bilet satışa çıxarılıb və hamısı “satılıb”. 6600 manatlıq gəlirin klubun büdcəsinə yönəlib-yönəlmədiyini isə dəqiq bilmirik.

P.S.: “Şamaxı”dan kimsəni tapa bilmədiyimizdən əldə etdiyimiz xəbərə münasibət öyrənmədik. Onlara tribuna verməyə hazırıq və üzə çıxıb müraciət etmələrini gözləyirik.