Müsahibə
Samir Əliyev: “Mübarizədən qopmamağa çalışacağıq”
21 yaşadək futbolçulardan ibarət Azərbaycan milli komandasının baş məşqçisi Samir Əliyevin futbolinfo.az saytına müsahibəsi
– Martın 18-dən təlim-məşq toplanışına start vermisiniz. Milliyə dəvət etdiyiniz futbolçuların hər birinin hazırkı vəziyyəti qənaətbəxşdir?
– Qarşıda bizi çətin oyunlar gözləyir, ilk olaraq İngiltərə ilə qarşılaşacağıq. Milliyə dəvət alan hər bir futbolçu məşqlərdə çox istəkli və həvəslidir. Bu istək və həvəslə də oyunlara hazırlaşırıq.
– Avropa çempionatının seçmə mərhələsi çərçivəsində ilk olaraq martın 22-də İngiltərə yığmasını qəbul edəcəksiniz. Rəqibin xüsusən hücum xətti güclüdür. 5 oyuna 20 qol vurmaları da bunu təsdiqləyir. İngilislərlə matçda xüsusi müdafiə planınız olacaq?
– Rəqib İngiltərədirsə, deməli, yüksək səviyyəli futbolçulara malikdir. Dediyiniz kimi, qrupda 5 oyunda 20 qol vurmaları hücum xəttindəki potensialdan xəbər verir. Təhlil etdikdə görürük ki, hücumdakı oyunçularının, həqiqətən də, yüksək individual keyfiyyətləri var. Əlbəttə, bizim üçün çətin olacaq. Komandamı çox ağır oyun gözləyir. Buna baxmayaraq, layiqli müqavimət göstərməyə və 90 dəqiqə mübarizədən qopmamağa çalışacağıq.
– İngiltərənin heyətində daha çox hansı futbolçu və ya futbolçulardan ehtiyatlanırsınız?
– İngilislərin heyəti yüksək səviyyəli oyunçulardan ibarətdir. Əksəriyyəti aparıcı klublarda oynayan futbolçulardır. Belə futbolçularının sayı bir yox, bir neçədir. Müdafiə, yarımmüdafiə və hücum xəttində, bir sözlə, bütün mövqelərdə çıxış edən oyunçuları çox güclüdür.
– Martın 26-da isə lider Ukrayna yığmasını qəbul edəcəksiniz. Bu komanda ilə ilk görüşdə 0:1 hesabı ilə uduzmuşdunuz. Qrupda xal itkisinin nə olduğunu bilməyən Ukraynadan ilk xalı və ya xalları alacağınıza ümid varmı?
– Ukraynanın qrup lideri olmasına baxmayaraq, hesab edirəm ki, İngiltərə millisi daha güclü rəqibdir. İstər Ukrayna, istər İngiltərə olsun, həqiqətən də, bu komandalardan xal almaq çətin məsələdir. Amma buna baxmayaraq, biz məşqçilər və futbolçular komanda şəklində istəyirik ki, layiqli müqavimət göstərək, xal və xallar qazanaq.
– Samir Əliyev Azərbaycan çempionatında hər komandanın əsas heyətində 21 yaşadək 1 futbolçunun oynaması haqda qərarın ləğv edilməsinin əziyyətini çəkirmi?
– Limit məsələsi arada müzakirə olunur. Bunun tərəfdarı olanlar da var, buna qarşı çıxanlar da. Reallıq budur ki, bu gün dediyiniz limit yoxdur və biz bununla barışmalıyıq. Əlbəttə ki, U-21-in baş məşqçisi olaraq istərdim ki, Premyer Liqada iştirak edən 10 klubun hər birinin əsas heyətində heç olmasa yaşı 21-dək olan 1 futbolçu meydana çıxsın, oynasın. Belə olan halda, bu futbolçuların performansı, fiziki, texniki-taktiki, psixoloji durumu daha yaxşı, özünəinamı daha çox olar və beynəlxalq matçlarda inamla çıxış edərlər. Üstəlik, komanda olaraq yaxşı nəticələrə imza ata bilərik. Həm də Premyer Liqada oynaya-oynaya gənc futbolçuların ustalıq səviyyələri daha tez artar və gələcəkdə əsas milliyə namizəd futbolçuların sayı artar. Bu isə əsas millidə rəqabətin artmasına gətirib çıxarar.
FƏRİD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Milli komanda2024-04-12 18:00
Millinin Gürcüstanla oyunlar üçün heyəti açıqlandı