Sevindirən oyun, təəssüfləndirən nəticə

“Qarabağ” tərifə layiqdir, amma təkcə dünən göstərdiyi oyuna görə yox. “Bazel”lə matç sadəcə, gözəl alınan sıradan bir matç idi. Ağdamlıları daha çox illərdi davam edən seriyaya, yeniləndikcə əzəmətini itirməyən komandaya çevrilməsinə, ölkəni ən yaxşı şəkildə təmsil etdiyinə görə təbrik etməliyik.

Qurban Qurbanov hər nə qədər oyun stilinə sadiq qalmağa çalışdıqlarını desə də, əslində, komandada çox şey dəyişib. “Qarabağ” indi daha dinamik, daha əzmkar, daha cəsarətli oynayır. Və bunu baş məşqçi israrla əsas heyətdə “bişirdiyi”, yetişdirdiyi, Azərbaycan futboluna qazandırdığı, təcrübəsizliyindən qorxmadığı Abbas Hüseynovla, Toral Bayramovla edir. İllərdi çıltaqlığına, səhvlərinə səbr edərək, tənqidlərə rəğmən, daim güvənərək Mahir Emrelini “Legiya”dan dəvət alacaq səviyyəyə qaldıran Qurbanov indi də yeni nəsli hazırlayır.

Abbasla Toralın üzərində xüsusilə dayanmaq lazımdı. Bu gənclər az qala üç gündən bir meydana çıxır, millidə, Premyer Liqada, avrokubokda vazkeçilməzə çevrilir. Qurban bəy onlara güvənməkdə davam edir, səhvlərini bağışlayır, daha yaxşı olmaları üçün çalışır, cilalayır. “Qarabağ”ı qanadlandıran bu cinah müdafiəçiləri isə ağdamlıların daha çox top saxlamağa hesablanan astagəl futbolunu rəngləndirir, digər futbolçuların da düşünmə sürətini artırır.

“Bazel”lə oyun məhz bu səbəbdən daha yaxşı alındı. Etibarlı müdafiə, işlək cinahlar, dinamik orta sahə… Yalnız hücumdakı tıxacdan gileylənə bilərik, lakin belə oyun tərzi, üslubu ilə qollar mütləq gələcək. İbrahima Vadji “Qarabağ”ın çoxdan arzuladığı hücumçu tipidi, qarşıdakı matçlarda o da sözünü deyəcək. Həm o, həm də digər yeni legionerlər Qurbanovun nöqtə transferləridi. Səbrlə gözləyən, araşdıran baş məşqçi məhz istədiyi oyunçuları sərəncamına gətirib. Bu baxımdan Filip Ozobiçi ehtiyata atan Kadi Borges qeyd olunmalıdı. Bu oyunçu milliləşdiriləndən bəri enişdə olan Filipin gəncliyini xatırladır, hətta bir çox oyun komponentlərinə görə daha yaxşıdı – topu yerində dayanaraq qəbul etmir, ötürmələri də hərəkətlərini bir anlıq dayandırmadan edir.

Və bu “Qarabağ” dünən “Bazel”ə futbol dərsi keçdi, Azərbaycan və Avropa futbolu arasındakı səviyyə fərqində uçurumu ustalıqla gizlətdi. Qələbə qolu gəlmədi, amma hətta məğlubiyyət halında belə eyni cümlələri yazacaqdım. Qrupda bir-birindən ciddi şəkildə fərqlənməyən 4 komanda var, ilk turda qolsuz heç-heçələr reallaşdığından hamısı eyni pilləyə şərikdi. Bununla belə, dünənki matçda oyun keyfiyyəti baxımından “Qarabağ” favorit göründü.

Təbii ki, qələbə reallaşsaydı, daha yaxşı olardı. Çünki rəqiblər ağdamlıların məhz bu oyununu analiz edəcək, ona qarşı daha yaxşı hazırlaşacaq. Bu səbəbdən qrupdan çıxmaq daha da çətinləşəcək. Lakin “Qarabağ” eyni tempdə davam etməyi bacarsa, hətta lider olmaq mümkündü. Yaxşı oyunla bağlı eyforiyaya qapılmadan, gözəl futbolu əla nəticələrlə taclandıraraq daha bir ilkə imza atmaq realdı.

FƏRİD