“Şöhrət zalı”nın yeni sakinləri

“Dallas Maveriks” komandasının heyətində 2011-ci ildə çempion olan Dirk Novitski, ikiqat MBA çempionu Pau Qazol, “San-Antonio Spörs”lə dörd dəfə çempionluq yaşayan Toni Parker və Larri O`Brayen kubokunun üçqat sahibi Dueyn Veyd Neysmit adını daşıyan basketbolun “Şöhrət zalı”na daxil ediliblər.

Futbolinfo.az xəbər verir ki, təntənəli mərasim dünən gecə Massaçusets ştatının Sprinqfild şəhərinin “MassMutual Center” zalında keçirilib.

Onlardan başqa “San-Antonio Spörs”ün baş məşqçisi Qreq Popoviç və onun assistenti Bekki Hemmon da bu şərəfə nail olublar.

“Şöhrət zalı”na daxil edilən digərləri bunlardır: Cin Bess, Harri Bler, Devid Hikson, Cin Kidi, Cim Valvano və 1976-cı il ABŞ-nin qadınlardan ibarət Olimpiya yığması.

Mərasim zamanı “Şöhrət zalı”na daxil olanlar maraqlı  fikirlər səsləndiriblər.

Pau Qazol: “2008-ci ilin fevralında məni “Leykers”ə göndərdilər. Məhz orada həyatımı dəyişən insanla tanış oldum. O şəxs mənə qalib gəlməyi, çətin vəziyyətlərdən çıxmağı, ən yüksək hədəflər uğrunda mübarizə aparmağı , məsuliyyəti üzərinə götürməyi və lider olmağı öyrətdi. Kobi, qardaşım, sənsiz mən burada olmazdım. Həyatda ən çox istədiyim şey sənin və Cicinin indi burada olmasıdır. Sənin üçün çox darıxıram və səni çox sevirəm”.

Dirk Novitski: “Pau, Toni, Di-Veyd – sizdən çox vaxt acığım gəlirdi. Biz ən yüksək səviyyədə rəqabət aparırdıq. Lakin bir-birimizə dəyər verirdik. Hamınıza təşəkkür edirəm”.

Toni Parker: “Əziz Pop (Qreq Popoviçi nəzərdə tutur), sizin tayı-bərabəriniz olmayıb. Məni motivasiya etmək üçün hansı sözlərdən istifadə etdiyinizi heç vaxt unutmaram. Uşaqlarım zalda olmasaydı, onları bir-bir deyərdim. 19 yaşım olarkən məni odun, alovun içinə atdınız. İlk mövsümümdə cəmi beş oyunda meydançaya çıxdıqdan sonra məni təyyarənin quyruğuna çəkərək sabah əsas heyətdə çıxacağımı söylədiniz. Həmişə mənim üçün ikinci ata olmusunuz. Mənim və ailəm üçün etdiklərinizə görə sizə təşəkkür edirəm”.