Stuxlikin taleyi: postunda saxlanacaqmı?

AFFA Hakimlər Komitəsinin sədri Frits Stuxliklə ikiillik müqavilə mayda başa çatır. Avstriyalı mütəxəssislə əməkdaşlığın davam etdirilib-etdirilməyəcəyi hələlik bəlli deyil. Güman ki, İcraiyyə Komitəsinin qarşıdakı iclasında bu məsələyə də aydınlıq gələcək.

Təbii ki, Stuxlikin postunda qalması onun işinin qiymətləndirilməsindən asılı olacaq. AFFA rəhbərliyi Fritsin fəliyyətini qənaətbəxş saysa, müqavilə müddətinin uzadılması mümkündü. Aylıq 10 min avro maaş alan avstriyalının maddi planda tələbləri də önəmli rol oynayacaq.

Stuxlik əsasən ipəyatmazlığı ilə yadda qalır. O, müəyyən sistem qurub və komitəni buna uyğun yönəldir. Müasir standartlara hesablanmış iş prinsiplərinin faydalı olduğunu deyə bilərik. Lakin elə bununla da onun missiyasının başa çatdığını deməliyik – sistem qurulub, iş gedir və indi yerli mütəxəssislərin biri bu vəzifənin məsuliyyətini üzərinə götürməlidi.

Stuxlikin gətirilməsi əsasən hakimlərimizin beynəlxalq təyinatlarının daha çox olmasına, FIFA referilərinin sayının artırılmasına hesablanmışdı. Avstriyalı UEFA-dakı əlaqələrindən yararlanaraq, beynəlxalq arenada daha yaxşı təmsil olunmağımıza yardım etməliydi. Amma ötən müddətdə bunun şahidi olmadıq. Frits gələnə kimi yetişmiş Əliyar Ağayev əvvəlki qaydada davam edir, digərləri isə hətta bir qədər kölgəyə çəkilib. Yəni, bu baxımdan irəliləyiş yoxdu.

Stuxlik Aəzrbaycana hörmətsizliyi ilə də diqqət çəkir. Komitədə ana dilimiz qadağan olunub, tədris prosesi, kurslar, seminarlar bir yana, hətta adi ünsiyyət zamanı da yalnız ingilis dilinə üstünlük verilir. Yerli mütəxəssislərə saymazyana münasibət, həmişə öyündüyümüz hakimlik məktəbimizin ənənələrinə sayğısızlıq da onun iş metodunda özünü qabarıq göstərir. Frits Premyer Liqanın son iki turunu ümumiyyətlə, izləməyib, vətənində istirahətdədi və komitəni internet üzərindən idarə edir. Təyinatlardan tutmuş, təlimatların verilməsinə kimi – bir sözlə, komitədə yiyəsizlikdi.

Stuxlikin dönəmində olduğu qədər heç bir zaman hakim səhvinə rast gəlinməyib. 2020-ci ilə təsadüf edən 4 tur ərzində hakim səhvinin olmadığı matç xatırlamırıq. Sadəcə, göstərişə uyğun olaraq, bu səhvlər ictimailəşmir, ört-basdır edilir. Oyunları idarə edən hakimlərin səviyyəsi qənaətbəxş deyil, ümumi hakimlər komandası çox zəifdi və zamanla bunun fəsadlarını görəcəyik. Ağayev istisna olmaqla, FIFA referilərimizin səviyyəsi aşağıdı, onlar hətta Premyer Liqada lazımi qədər təyinat almırlar.

Qərarı AFFA rəhbərliyi verəcək. Lakin maya kimi vəziyyəti dəyərləndirmək, ölçüb-biçmək lazımdı. Hakim-inspektorlarla ciddi problem yaşayan, bir çoxlarını ümumiyyətlə küsdürən avstriyalını komitədə çox adam qəbul etmir. Ümid edək ki, Fritslə müqavilə məsələsinə baxıldıqda bu amillər nəzərə alınacaq.