“Təhlükə hamı üçün davam edir”

“Kəpəz”in müdafiəçisi Vurğun Hüseynovun futbolinfo.az saytına müsahibəsi

– Mövsümün geridə qalan ilk yarısını necə dəyərləndirərdiniz?

– Şərait baxımından digər komandalarla müqayisə etsək, birinci yarıdakı nəticə heç də pis sayılmamalıdır. Əlbəttə ki, daha yaxşısı ola bilərdi. Yaxşı çıxış edərək məğlub olduğumuz oyunlar oldu. Ancaq yenə də ümidliyik. Çünki turnir cədvəlinin 9-cu pilləsində qərarlaşmışıq. Qısa istirahətdən sonra məşqləri bərpa etmişik. Qarşıdakı iki dövrədə daha uğurlu nəticələr qazanacağımızı düşünürəm.

– Elitanı tərk etməyə ən real iki namizəddən biri sayılırsınız. Heyət, şərait və büdcə baxımından əsas rəqibiniz sayılan “Qəbələ”ni üstələmək çətin olmayacaq?

– Təbii ki, çətin olacaq. Təkcə “Qəbələ” deyil, Premyer Liqada iştirak edən digər 9 komanda ilə bizi nə maddi, nə də şərait baxımından müqayisə etmək olar. Rəqiblər bu amillərdə bizi üstələyirlər. Ancaq sevindirici haldır ki, yaxşı məşqçimiz və kollektivimiz var. Bu durumdan çıxmağa çalışacağıq. “Qəbələ” ilə eyni xala malik ola bilərik. Bizdən öndə olanlardan isə 8 xal fərqimiz var. Hər komanda ilə də hələ iki dəfə qarşılaşacağıq. Yəni fikrimcə, təhlükə təkcə bizim üçün yox, digərləri üçün də davam edir. Bizim məqsədimiz də elitadakı yerimizi qorumaqdır.

– Adil Şükürovun baş məşqçi postuna təyinatından sonra komandada hansısa irəliləyiş hiss etmisiniz?

– Adil müəllim də, əvvəlki baş məşqçimiz Azər Məmmədov da yaxşı məşqçidir. Məşqçi dəyişikliyi futbolda qaçılmazdır. Hər mütəxəssisin öz oyun fəlsəfəsi, taktikası, istəyi var. Ümid edirik ki, Adil müəllimin rəhbərliyi altında daha yaxşı çıxış edəcəyik.

– 2024-cü il Əjdaha ilidir və siz də bu ildə anadan olmusunuz. 2012-ci illə müqayisədə bu dəfə karyeranızın uğurlu alınacağına inanırsınız?

– 12 il əvvəl “Qəbələ”də idim. Həmin il zədələrim çox oldu, az oynamaq imkanı qazandım. İldən yox, hər şeyi Allahdan istəyirəm. Ən böyük arzum da “Kəpəz”in Premyer Liqada qalmasıdır. Bunun da reallaşacağına inanıram.

– Çoxları düşünür ki, bu, müstəqillik illərinin ən maraqlı mövsümüdür. Bu fikirlə razısınız?

– “Qarabağ”ı çıxmaq şərtilə digər komandalar arasında çox gərgin mübarizə gedir. “Qarabağ” sözünü hərtərəfli demiş, Avropa səviyyəli komandadır. Bu komanda Azərbaycanda istənilən rəqibə qarşı yüz faiz gücünü ortaya qoysa, asanlıqla 4-5 qol vuracaq səviyyədədir. Düzdür, gərgin mövsüm keçir, komandalar bir-birilərinə çox yaxındırlar. Ancaq səhv etmirəmsə, 2006-07 mövsümündə çempionat daha gərgin idi. Çünki 6-7 komanda çempionluğa iddia edirdi.

– Ötən ilin yayında karyeranızı bitirdiyinizi açıqlasanız da, “Kəpəz”ə görə fikrinizi dəyişdiniz. Qərarınızdan peşman deyilsiniz?

– Həqiqətən də ötən il karyeramı bitirməyi qərara almışdım. Azər Məmmədovla çox yaxşı münasibətim var, mənim böyük qardaşımdır. Onun sözündən çıxa bilmədim və “Kəpəz”ə gəldim. Verdiyim qərara görə həyatım boyu peşman olmuram. Bu, Allahın qismətidir.

– Mövsümün sonunda yenidən karyeranızı bitirməyi düşünəcəksiniz, yoxsa davam etmək istəyirsiniz?

– Həmin vaxta hələ 6 ay var. Bu müddətdə əsas məqsədim “Kəpəz”ə fayda verməkdir. Düzdür, yayda bu məsələni nəzərdən keçəcəyəm. Amma qəbul edirəm ki, artıq 36 yaşım var, bitirmək vaxtıdır. Təki “Kəpəz” elitada qalsın.

FƏRİD