Təlimatçı Şimşək Stuxlikdən də pis seçimdi: AFFA klublar üçün “sənədçatdırma yarışı” elan etdi

AFFA İcraiyyə Komitəsi yenə təəccübləndirə bilmədi. Öncədən planlaşdırılan, ssenarisi cızılan məsələlər təsdiqləndi, qərarlar verildi. Həftələr, günlər öncə AFFA-nın əsas idarəçiləri nəyi müəyyənləşdirmişdisə, qurum dünənki iclasında məhz onları rəsmiləşdirdi.

Gözlənildiyi kimi, videokonfransa kimin qatıldığı elan olunmadı. Bu üzdən yetərsayın olub-olmadığını, videokonfransa kimlərin qoşulmadığını dəqiqləşdirə bilmədik. Hətta toplantı dünən 3 saat önə çəkildi və bunun da səbəbi açıqlanmadı. Yəqin üzvlərdən hansısa axşam toya tələsdiyindən və ya istirahətlərinin pozulma riski olduğundan belə addım atıldı. Ehtimallarımız sizə gülməli gələ bilər, lakin rəsmi açıqlama verilməyincə belə düşünməkdə sərbəstik.

Ümumiyyətlə, AFFA rəhbərliyi illərdi yaxşı yol tapıb – iclaslar ya gözdən uzaq bir yerə təyin edilir, ya da videokonfrans formatında təşkil olunur. Yekunda isə rəsmi saytda qərarlar dərc edilir, heç bir açıqlamaya gərək durulmur. Halbuki mətbuat konfransının keçirilməsinə, qərarlardan doğan suallara cavab verilməsinə ehtiyac var. İK üzvlərinin bəhanələrlə gizləndiyi bir vaxtda baş katib Sərxan Hacıyev də buna gərək duymur.

Qəbul olunan qərarlara gəlincə, türkiyəli mütəxəssis Barış Şimşekin 2 il müddətinə AFFA-nın Hakimlər Komitəsinin sədri vəzifəsinə təyin olunması ehtimal edilirdi. Gözlənilməz olan anlaşmanın müddətidi. Görünür, AFFA rəhbərliyi qovulmayana kimi futboldan getmək istəmirlər, uzunmüddətli planlar qururlar, ən azı özlərini belə göstərirlər.

Barış bəyə gəlincə, bəh-bəhlə təqdim etməyə ehtiyac yoxdu, bu, hətta Frits Stuxlikdən də bərbad təyinatdı. Təsadüfi deyil, bu xəbər qardaş Türkiyədə də birmənalı qarşılanmadı. Heç bir ciddi uğuru olmayan, sıradan bir sabiq hakim birbaşa komitə sədri seçildi. Halbuki Şimşək ən yaxşı halda ortabab təlimatçıdı. Onun idarəçilik bacarığına indidən şübhəylə yanaşırıq və dərdə dərman olmayacağı gün kimi aydındı.

Cəmi 2 il FIFA referisi olmuş Barış bəy beynəlxalq arenada düz-əməlli oyun da idarə etməyib. Karyerası yalnız kimlərəsə 4-cü hakim kimi yardımçı olmaqla keçən yeni sədr haqda AFFA-nın hazırladığı təqdimat uşaq başı aldatmaq üçündü. Heç bir ciddi oyun idarə etməyən bu şəxs daha çox qatıldığı kurslarla öyünə bilər ki, onlarda onun yalnız VAR təlimatçısı kimi yetişməsinə kifayət edib. Təlimçini birbaşa sədr təyin etmək ənənələri olan Azərbaycan hakimliyinə növbəti ləkədi (bu linkə baxmaqla Fatih Terimin Barış Şimşəkə hansı qiyməti verdiyini görəcəksiz).

İK-nın növbəti qərarı Samir Əliyevin U-21-ə baş məşqçi təyin edilməsidi. Amma ona cəmi 1 seçmə mərhələ müddətində güvəniləcək. Əcnəbilərlə uzunmüddətli müqavilə imzalamaqdan zövq alan assosiasiyanın yerli mütəxəssislərə qısa müddət şan verməsi təəccüblü deyil – bu adamlar azərbaycanlı məşqçilərə qısqanclıqla yanaşır, uğurlu olmalarından ehtiyatlanırlar. Çünki yerlilər nəticə baxımından hər nə qədər daha yaxşı olacaqsa da, “talama əməliyyatları”nda sərfəli deyillər.

“Sabah”ın əvəzedici komandasının 2022/2023-cü il mövsümündə Birinci Divizionda çıxış etməməsi ilə bağlı AFFA-ya müraciətinin müsbət cavablandırılması pis nümunədi. Əvvəla, hansısa klubun belə müraciətinə ümumiyyətlə, İcraiyyə Komitəsində baxılmamalıydı. Bu, qurumun özünün özünə, verdiyi qərarlara hörmətsizliyidi. İK bir müddət öncə qərar qəbul edərək Divizionda oynamaqdan boyun qaçıranlar üçün 100 min manatlıq cərimə təyin etmişdi. Avtomatik olaraq, bu qərar tətbiq olunmalıydı, amma AFFA klubun sponsorlarından qorxduğu üçün cəsarətini içində boğdu.

İndi digər komandalar da rahatca Diviziondan çəkilə bilərlər. Və bunun üçün AFFA-ya müraciət etməyə gərək yoxdu. “Sabah”a cərimə tətbiq olunmadısa, digərləriylə bağlı ikili standart tətbiq edilə bilməz, komitə öz qərarını ayaq altına atdı.

Cari dövrün tələbi olan Premyer Liqa və Divizion klublarının maliyyələşdirilməsi ilə bağlı məsələnin unudulması isə təəssüf doğurdu. Görünür, maliyyə hesabatlarında açıqlarını gizlədə bilməyən AFFA, komandalara onların xətti ilə maliyyə ayrılmayacağı faktı ilə barışıb. Bu üzdən günün əsas mövzusu unuduldu, əvəzində Region Liqası komandaları üçün yarış təşkil edildi. Qərarda deyilir ki, Region Liqası komandaları üçün Birinci Divizionda çıxış edə bilmələri üçün AFFA-nın baş katibliyi və Peşəkar Futbol Liqası tərəfindən meyarlar müəyyənləşdirilsin. Meyarlara tam cavab verən və müvafiq müraciəti ilk (!!!) təqdim edən klubun 2022/2023-cü illər mövsümündə Birinci Divizionda iştirakı təmin olunsun.

Bu, yarışma deyil, ona görə də müraciəti ilk təqdim edən kluba üstünlük verilməsi absurddu. Ondansa müraciətlər toplanmalı, ən layiqli, ən hazırlıqlı komanda seçilməlidi. Bu, daha peşəkar hərəkət olardı.

İK 29 aprel toplantısında konkret komandaların – “İmişli”, “Mingəçevir” və “Araz Naxçıvan”ın Diviziona buraxılmasına qərar vermişdi. İndiki qərar fikirləri haçalandırır. “İlk sənədvermə yarışı” bu komandalara da aiddi, yoxsa yarışdan çəkilən “Sabah-2”-yə əvəzləyici axtarılır? Ümumiyyətlə, Divizionda neçə komandanın iştirakı plnlaşdırılır?

Bu suallara AFFA rəhbərliyi cavab verməlidi. Ümid edirik, ən azı baş katib Sərxan Hacıyev özünə əziyyət verərək mətbuata danışmaq ehtiyacı hiss edəcək. Əks halda, müəmmalı durum aydınlaşmayacaq.

FƏRİD