Transfer çempionu “Neftçi” – yaydakı səhvləri düzəldərkən…

Qış fasiləsini klublarımız üçün çox da məhsuldar saymaq olmaz. Azərbaycan Premyer Liqası iştirakçıları çox az sayda futbolçunu heyətinə qatıb. Amma dövrələrarası zaman ciddi dəyişikliklər üçün o qədər də uyğun sayılmadığından, prinsipcə, belə də olmalıydı.

Yeni transferlərin ümumi sayı bir o qədər çox deyil. Bununla belə, maraqlı keçidlər var və müqaviləni rəsmiləşənlərdən 11-i debütantdı. “Keşlə”, “Zirə”, “Sabah”, “Qəbələ” və “Səbail”in yeni oyunçu gətirməsi ehtimalı var. Və yəqin ki, onların yeni transferlərini də əsasən debütantlar təşkil edəcək.

“Neftçi”nin bu qış yaxşı işlədiyini deyə bilərik. Klubun yeni idman direktoru Zaur Əzizov baş məşqçi Samir Abasovun yayda buraxdığı səhvləri qismən düzəltdi – həm heyətdə artıq yükə çevrilən əcnəbilərin sayı azaldıldı, həm də sanballı yerli oyunçular gətirildi.

Azər Salahlı müdafiənin cinahıdakı boşluğu doldurmaq üçün nəzərdə tutulubsa, Eddi İsrafilov yarımmüdafiəyə güc qatmalıdı. Gilyerme Pato hələlik sirli qutudu, İvan Brkiçin transferi isə məcburiyyətdən rellaşdırılıb: belə ki, Aqil Məmmədovun zədələnməsindən sonra qapıda ciddi problem yaranmışdı.

Faktiki start heyətinin yarısını yeniləyəcək “Neftçi”nin ən böyük uğuru Azər Əliyevin transfer edilməsidi. 28 yaşlı yarımmüdafiəçi Rusiya Premyer Liqasından gəlib və onun üçün transfer haqqı ödənilməyib. AFFA-nın milli komandaya gətirə bilmədiyi oyunçunun hətta çempionatımızda çıxışa razılıq verməsi böyük suallar doğurur. Deməli, indiyədək bu oyunçu ilə danışıq aparanlar səriştəsiz və bacarıqsız imiş. Əzizov isə Azəri həm milliyə, həm də “Neftçi”yə qazandırdı.

İcarəyə göndərilən Fəhmin Muradbəylidən fərqli olaraq, satıldığı “Olimpiakos”un düşərgəsinə yollanan Mamadu Kane və “Neftçi”yə pul qazandırıb gedən Sabir Buqrin bakılıların əsas itkiləridi. Əvəzində Romen Bask, Harramiz Soares və Xorxe Korrea Abasovun yarıtmaz seleksiya işinin zay məhsulları idi. Onlara layiqli əvəzedicilər gətirildiyini nəzərə alsaq, paytaxt təmsilçisinin gücləndiyini deməliyik. İndi qalır bu futbolçulardan döyüşkən kollektiv yaradıb zirvəyə qalxmaq.

“Qarabağ” da transfer dönəmini uğurlu keçirdi. Polşa “Yagelloniya”sından icarəyə götürülən Luka Quqeşaşvili qapıda yaranmış problemi yoluna qoymaq üçündüsə, Rüstəm Əhmədzadə və Leandro Andrade perspektiv düşünülərək transfer edilib. Ağdamlıların hazırkı heyəti zatən güclüdü, bu oyunçuların gəlişi ilə rəqabət daha da artacaq.

Qurban Qurbanov heyətdən heç kimi kənarlaşdırmağı lazım bilmədi. Yalnız Qaspar Panadero əvəzedici heyətə göndərilib. Əsas komandaya uyğunlaşmayan ispan tezliklə özünə başqa iş yeri tapmalıdı.

Əsas heyətə həsrət qalan Səid Rza və Roman Hüseynovu yola salan “Sumqayıt” da güclənib. Vüqar Bəybalayev, Elşən Abdullayev və Araz Abdullayevi düşərgəsinə gətirən “kimyaçılar” zədəlilərin dönüşü ilə daha zəngin heyətə sahib olub. Debütə hazırlaşan baş məşqçi Aleksey Baqa iranlı Alirza Aliyarini bəyənmədiyindən daha bir mərkəz müdafiəçisi arzusunu təxirə saldı. Ötən mövsüm medal qazanmağı bacaran bu oyunçuları yenidən “kökləmək” mümkün olsa, “Sumqayıt” hazırkı mövqeyini tərk edərək yüksələcək.

“Zirə”nin ən böyük uğuru hazırkı heyətini qorumasıdı. Hamidu Keyta və Brayan Alseusun hansı səviyyəyə malik olduğunu zamanla görəcəyik. “Qartallar” arzuladığı mərkəz müdafiəçisini də tapsa, uzun marafona tab gətirəcək.

Heyəti onsuz da zəngin olan “Sabah” sabitliyə üstünlük verdi. Yalnız vətəninə dönən Saşa Stamenkoviçi başqa bir əcnəbi qapıçıyla – Aleksandr Neçayevlə əvəzləyən Murad Musayevın hazırlıq dövründə komandanı necə komplektləşdirdiyi maraq doğurur. Heyət dəyişməyib, “Sabah” əvvəlki nəticələrindən daha yaxşı göstəricilərlə yadda qalacaqsa, bunu məşqçi işindəki fərqlə əlaqələndirməli olacağıq.

Fəhmin Muradbəylini icarəyə götürən, eləcə də Franko Floresi transfer edən “Keşlə” Nicat Qurbanov, Anatole Abanq, Con Kamara, Omar Qudiabi, Miyusko Boyoviç və Azər Salahlını itirib. Bir ay ərzində yeni futbolçu tapa bilməyən autsayderin bundan sonra atacağı addımlar faydasız olacaq. Toplanış keçməyən legionerlər komandaya uğyunlaşınca 3-cü dövrə də bitəcək, komanda hədəflərindən uzaq qalacaq.

“Qəbələ”ni tərk edən olmayıb, amma Ürfan Abbasovun zədələnəməsi komandaya ciddi təsir göstərəcək. Mövsümü erkən bitirdiyi deyilən müdafiəçinin yoxluğunda baş məşqçi Elmar Baxşıyevin işi asan olmayacaq. Arxa xəttdə sıxıntılar diqqət çəkərkən hücumda işlər yoluna qoyulub. Patrik Robson ansambla tez uyğunlaşsa, komandaya avrokuboka getmək vəzifəsini yerinə yetirməkdə yardım edə bilər.

Premyer Liqanın ən yetim komandası isə yenə “Səbail”di. Hələlik heç bir transfer etməyən autsayder Elşən Abdullayev, Elton Əlibəyli, Kamran Ağayev və Turan Manafovun gedişi ilə xeyli zəifləyib. Yeni transferlər yəqin ki, olacaq. Amma onların gecikməsini, adaptasiyaya zaman itirəcəklərini nəzərə alsaq, Aftandil Hacıyevi yaxşı perspektiv gözləmir.

Yeri gəlmişkən, indiki məqamda klubların yay transferlərini də xatırlamağa ehtiyac var. Klublarımız mövsümün əvvəlində 37 əcnəbi ilə güclənmişdi və onlardan 31-i debutant idi. Bu futbolçulardan 10-u (9-u debütant) artıq yola salınıb. 12 legionerə güvənən “Neftçi”nin bu mövsüm heyətinə qatdığı 6 debütant legionerin yarısını 6 ay bitməmiş yola salması düşündürücüdü.

NEFTÇİ: Romen Bask, Huqo Basto, İvan Korrea, Harramiz Soares, Sezar Meza Kolli, Tiaqo Bezerra, Ramon Maçado.

Bask, Korrea və Soares getdi.

QARABAĞ: Marko Veşoviç, Kadi Borges, Qaspar Panadero, İbrahima Vadji.

Panaderoya klub axtarılır.

SUMQAYIT: Səid Rza.

“Kimyaçılar” Rzanı artıq yola salıb.

ZİRƏ: Loris Broqno, Mohamed Hamdaui, Georgi Stoylov, Santos Velves.

Stoylov hələ çempionatda fasilə yaranmamış yola salınıb, Türkiyə hazırlığına cəlb olunmayan Velves də yol üstədi.

SABAH: Şpiro Perişiç, Coy-Lens Mikels, Xuan Kamara, Petar Skuletiç, Kristian Sebalyos, Mixail Eqremlidze.

Skuletiç mövsümün gedişində vidalaşmağı lazım bildi.

KEŞLƏ: Con Kamara, Sadio Tounkara, Omar Qudiabi, Aldair Neto, Felipe Santos, Merab Qiqauri.

Kamara və Qudiabidən imtina edilib.

QƏBƏLƏ: Kristof Atanqana, Ruan Renato, Fernan Lopes, Omar Hani, İsnik Alimi.

Bütün oyunçular özünü sübut edib və heyətdədi.

SƏBAİL: Camal Araqo, Yurgen Qoxa, Domantas Şimkus, Nikolas Raysel.

Bu futbolçuların özünü doğrultduğunu demək olmur. Sadəcə, yeni transfer mümkün olmadığından klub onları saxlamağa məcburdu. Hətta yaxın günlərdə onlardan hansınınsa ayrılması mümkündü.

FƏRİD