Ölkə futbolu
“Turan Tovuz” – “Səbail” matçına riskli təyinat
Misli Premyer Liqasının 19-cu turunda baş verən hakim səhvləri təyinatlara ciddi diqqət yetirməyə sövq edir. Bu səbəbdən qarşıdakı turda hansı hakimlərin iş başında olacağı çox maraqlıdır.
AFFA Hakimlər Komitəsi bu tur bütün FIFA referilərinə şans verib. Əliyar Ağayev “Araz-Naxçıvan” – “Sumqayıt” oyununda fit çalacaqsa, “Zirə” ilə “Sabah” arasındakı mərkəzi görüş Rauf Cabarova tapşırılıb. Amma təcrübəli hakimlərin xidmətinə daha çox ehtiyac duyulduğu bir zamanda Elçin Məsiyevin 4-cü hakim kimi Zirəyə göndərilməsi çox maraqlıdır.
Rəvan Həmzəzadənin ümumiyyətlə, yada salınmadığı turda bəlkə də həftənin ən kritik matçı gənc referiyə tapşırılıb. AFFA-da müəyyən dairələrin sevimlisi kimi dəstəklənən “Səbail”in hakimlərin ardıcıl qərəzli qərarlarıyla uduzdurulan “Turan Tovuz”la səfər matçı Rauf Allahverdiyevə həvalə edilməliydi. Bu gənc hakim bölgədə baş tutacaq matçda çətin ki, təzyiqə dözə bilsin.
Raufla bağlı bu qeydlərimiz təsadüf deyil, təyinat siyahısı heç Hakimlər Komitəsi rəhbərliyinin də ona güvənmədiyini göstərir. Bu hakim mövsümün ilk 18 turu ərzində cəmi 3 dəfə təyinat alıb, səhvləri üzündən cəzalandırılıb. “Qarabağ”ın “Turan Tovuz”u 3:0 hesabı ilə məğlub etdiyi matçda fit çalan Allahverdiyevin yolu indiyədək “Səbail”lə kəsişməyib.
Lakin digər hakimlərin bərbad idarəçiliyi elə vəziyyət yaradıb ki, heç kimin bəyənmədyi Rauf indi vazkeçilməz olub. Mövsümün ilk yarısında cəmi 3 dəfə təyinat alan referi, ötən tur “Qarabağ” – “Araz-Naxçıvan” matçını idarə etmişdi, indi isə fasilə görmədən Tovuza yollanır. Ümid edirik, o, Elxan Məmmədovun sifariş toruna düşüb karyerasını məhv etməz. Dolu tribunalar önündə ədalətli olmaq onun həm də vəzifə borcudur.