Vədə əməl etmək üçün ən münasib qrup

Yox, Canni de Byazi, bəhanə axtarma. Millimiz bu qrupdan lider kimi çıxmalıdı. Sən də bunu vəd edib postunda qalmısan, AFFA rəhbərliyi də “bu dəfə bacaracağıq” deyərək manevr edib.

Qrup da münasibdi, qitə divləri yığışmayıb, AFFA ötən 15 ildə həqiqətən də ölkə futbolunun vayına oturmayıbsa, gördükləri işin bəhrəsini göstərsin. De Byazi, səndə gördükləri ümid işığının da qarşılığını verməlisən. Qarşıda 10 aylıq müddət, hazırlaşmaq üçün kifayət qədər zaman var. Ya nəticə verin, ya da hamınız rədd olub gedin.

“Belə demək mümkünsə, kifayət qədər balanslı qrupda mübarizə aparacağıq. Slovakiya millisinin qrupun favoriti olduğunu deməklə, yəqin ki, yeni nəsə demiş olmayacağıq. Belarus və Qazaxıstan-Moldova cütünün qalibi ilə gərgin mübarizə aparacağıq. Lakin düşünürəm ki, mövsümün sonuna doğru yaxşı formada olsaq, qrupda sözün yaxşı mənasında öz sözümüzü deyə bilərik” – Canni de Byazinin bu açıqlamasında həm vəd vermək həvəsi, həm də qorxu, bəhanə hiss olunur.

Hardasa doğru açıqlamadı, amma italiyalı yeni müqavilə imzalamaq üçün İcraiyyə Komitəsinin üzvlərinə qrupdan çıxmaq vədi verəndə yəqin ki, Farer adaları, Cəbəllütariq və Andorra ilə bir qrup formalaşdırmayacağımızı bilirdi. Türkiyə, Yunanıstan, Bolqarıstan kimi komandalar da bizdən yan ötüb, mübarizə aparıb yaxşı nəticə vermək üçün münasib qrupdu, buyurun, vədinizə əməl edin, azarkeşlər nəticə istəyir.

Dövlət başçısı mesajını verib, qalibləri qəbul etmək, onlarla qürur duyduğunu göstərmək niyyətindədi. Buyurun, “Qarabağ”ın uğurlarını təkrarlayın, AFFA rəhbərliyinin hüzura çıxmasını təmin edin.

Milli komandamızın potensialını bilirik, təbii ki, qrup qalibi olmaq mümkünsüzdü. Amma illərdi futbolumuzu xarabazara çevirən AFFA rəhbərliyi kreslolarını itirməmək üçün oyun oynayıbsa, vəd veribsə, axıradək davam etsinlər. Özü də son seçmə mərhələdə 1 xal toplayan yığmamızın indi 6-7 xal yığması uğur sayılmayacaq, hamı ciddi nəticə gözləyir. Son şans verilib, gilyotindən qaçmaq üçün 6 rəsmi oyun var.

Rəqiblərimizdən yalnız Slovakiya dünya reytinq sıralamasında ilk 50-likdədi – 42-ci yer. Belarus 95-ci, bizdən bir pillə öndə olan Qazaxıstan 119-cu, Moldova isə hətta 61 pillə geridə – 181-cidi. Bu komandaların hamısını müxtəlif vaxtlarda yenmişiksə, onları arzuolunmaz saya bilmərik. De Byazi ənənəvi reytinq bəhanələriylə bizi aldatmağa hazırlaşmasın.

Slovakiya və Belarusun rəqibimiz olacağı dəqiqləşib, Qazaxıstanla Moldovadan isə biri – pley-offda qalib gələn – yığmamızla qarşılaşacaq. Bu ölkələrin hamısında futbol böhrandadı, yığmamızın nəticə qazanması üçün daha ideal şans ola bilməzdi. Xüsusilə Moldovayla oyunları həvəslə gözləyərdik. Bu ölkənin funksionerləri baş məşqçi Roberto Bordini yola saldığı gün bizimkilər Canniylə yola davam qərarı verdilər.

Bu seçmə mərhələ təkcə daha yüksək diviziona qalxmaq baxımından önəmli deyil. Tərsi də ola bilər, sonuncu yer millimizi cırtdanların toplaşdığı D liqasına tullayar. Bunu düşünmək belə istəmirik…

CAVAD