Müsahibə
Vaqner: “İndiki “Qarabağ” daha güclüdür”
2018-2020-ci illərdə “Qarabağ”ın formasını geyinmiş braziliyalı qapıçı Vaqner da Silvanın futbolinfo.az saytına müsahibəsi
– Sabiq komandanız “Qarabağ” Avropa Liqasının qrup mərhələsinin I turunda Norveç klubu “Molde”ni 1:0 hesabı ilə məğlub etdi. Nəticəni necə qarşıladınız?
– “Qarabağ”ın bu qələbəsi mənim üçün sürpriz olmadı. Üstəlik, nəzərə alaq ki, oyun Bakıda keçirilib. Şübhəsiz ki, “Qarabağ” rəqibindən üstün oyun nümayiş etdirdi və layiqli qələbə qazandı. 90 dəqiqə ərzində Azərbaycan təmsilçisi daha yaxşı çıxış etdi, qol vəziyyətləri yaratdı. Sonluq ədalətli oldu.
– Ağdam klubu qrupun II turunda İsveç təmsilçisi “Hakken”in qonağı olacaq. Həmin qarşılaşmadan nə gözləyirsiniz?
– Qrupa qələbə ilə başlamaq çox önəmli idi. Belədə futbolçularda qrupdan çıxmağa inam birəbeş artır. “Hakken” də təxminən “Molde” səviyyəsində komandadır. Şəxsən “Qarabağ” onları İsveçdə məğlub etsə, təəccüblənmərəm. Belə olarsa, Qurban Qurbanovun kollektivi qrupdan çıxmaq yolunda böyük addım atmış olar. Əlbəttə, asan olmayacaq. Skandinaviya ölkələrində atmosfer fərqli olur, rəqiblər əsasən “ikinci mərtəbə”də üstün olurlar. Əminəm ki, məşqçilər korpusu bütün bunların qarşısını almağın yollarını bilir. “Qarabağ” topa daha çox sahib olmaqla rəqibi mübarizədən soyuda bilər.
– “Qarabağ”ın qrupdan çıxmaq şansını necə dəyərləndirirsiniz?
– Komandanın aktivində artıq bir qələbə var. Qrupda “Bayer”in gücü hamıya bəllidir. Onlar indi “Bayern” ilə başabaş gəlirlər. Ancaq ikinci yer uğrunda gərgin mübarizə gedəcək. Əslində, Skandinaviya komandaları “Qarabağ” üçün əlverişsiz rəqib olurlar. Ancaq texnikalı oyunu sayəsində durumu tərsinə çevirmək də mümkündür. “Molde” ilə matçda bunun şahidi olduq. “Hakken”i də səfərdə məğlub etməklə işin böyük hissəsini görmüş olar.
– Sizin dövrünüzdəki “Qarabağ”la indikini necə müqayisə edə bilərsiniz?
– Həqiqətən də “Qarabağ” bu gün çox güclü komandadır. Onların həmişə güclü heyətləri olub. Eyni sistemə sadiq qaldığından, həm oyun, həm də nəticə baxımından stabilliyini qoruyur. Müqayisə etmək lazımdırsa, məncə, indiki “Qarabağ” daha güclüdür.
– Deyəsən, “Qarabağ”ın oyunlarını müntəzəm izləyirsiniz…
– İmkan düşdükcə matçlara baxıram. “Qarabağ” əvvəlki performansından heç nə itirməyib. Sadəcə, yayda heyətdə müəyyən dəyişikliklər olduğu üçün hər dəfə mövsümün əvvəlində bir qədər axsaqlıq yaranır. Ancaq gördüyüm qədərilə yeni transferlər artıq formaya düşürlər. Onlar uyğunlaşma dönəmini tamamladıqdan sonra komanda daha güclü olacaq.
– “Qarabağ”ın Portuqaliyadan gətirdiyi son oyunçulardan biri Juninyo oldu. Onun çıxışına hansı qiyməti verərdiniz?
– Juninyo barədə ətraflı məlumatım yox idi. Amma görürəm ki, oyundan-oyuna rəqiblər üçün daha təhlükəli olur. Onun “Qarabağ”a böyük xeyir verəcəyini düşünürəm. Həqiqətən də “Qarabağ”ın Portuqaliyadan aldığı oyunçular uğurlu olur. Çünki buradan transfer edilənlər hazır vəziyyətdə gedirlər. Julio Romao və Kevin Medina da buna əyani sübutdur.
– Vaxtilə “Qarabağ”dakı rəqibiniz Şahruddin Məhəmmədəliyev Türkiyənin “Adana Dəmirspor” klubuna keçdi. Bu transferə münasibətiniz necədir?
– Şahruddin Azərbaycanın ən güclü qapıçısıdır. Səhvə görə hərdən onun adı mediada çox hallanır. Ancaq psixoloji cəhətdən güclüdür. Onun Türkiyə komandasında uğurlu olacağına inanıram. “Qarabağ”ın yeni gətirdiyi Andrey Lunyov da yaxşı qapıçıdır. Hər halda, belə olmasaydı, “Bayer”ə qədər gedib çıxmazdı.
FƏRİD
- Premyer-liqa2024-04-28 21:55
“Sumqayıt” “Qarabağ”a qalib gəldi
- Premyer-liqa2024-04-28 19:37
“Neftçi” “Turan Tovuz”a böyük hesabla qalib gəldi
- Ölkə futbolu2024-04-27 23:05
Samir Abasov Xavi ilə görüşdü
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi