“Xatirələri yada salanda kövrəlirəm” – Miçel Riçardla Dani üçün darıxır

“Qarabağ”ın yarımmüdafiəçisi Miçel Maderanın futbolinfo.az-a müsahibəsi

– “Sumqayıt”la matçdakı qələbə sanki çox əziyyətli başa gəldi?

– Qarşılaşmada çoxlu sayda qol vəziyyəti yaratdıq. Təəssüf ki, yalnız birindən yararlana bildik. Buna üzülməmək lazımdır, çünki biz öz oyunumuzu ortaya qoyduq, rəqib qapısı qarşısında təhlükəli epizodlarımız çox idi.

– “Zirə” ilə qarşılaşmada isə 6 qol vurmuşdunuz…

– “Zirə” ilə matçda vəziyyət fərqli oldu. Həmin oyunda yaratdığımız qol vəziyyətlərinin əksəriyyətindən yararlandıq. “Sumqayıt”la qarşılaşmada isə fərqli oldu. 2-ci qol olsaydı, əslində, oyunu daha sakit şəkildə başa vurardıq, rahat oynayardıq. İstənilən halda, razı qalmaq lazımdır, komanda doğru yoldadır, eyni inkişaf xətti üzrə getmək lazımdır. Bugünkü futbolda çoxlu qol vəziyyəti yaratmaq hər komandaya nəsib olmur.

– Qarşıda cəmi 10 tur var və “Qarabağ”ın bu oyunlarda ciddi xal itkisi ilə üzləşəcəyi inandırıc gəlmir. Çempionluğun qoxusunu hiss edirsiz?

– İkinci pillə ilə aramızda 8 xal fərqi var və bu az fərq sayılmaya bilər. Bunu dərk edirik. Amma özünüz də qeyd etdiniz ki, çempionatın başa çatmasına 10 tur var və toplamda bu, 30 xal edir. İndi biz bunu nəzərə alsaq, 8 xallıq fərqin böyük olmadığını deyə bilərik. Üstəlik, əsas rəqibimiz olan “Neftçi” ilə onların meydanında oyunumuz var. Buna görə də rəsmi şəkildə çempion olmayana qədər rahatlaşmaq lazım deyil. Əlimizi yanımıza salmamalıyıq və sona qədər “döyüşməliyik”. Qarşıdakı matçlarda xallar əldə etməliyik. Komanda yaxşı durumdadır və bu dinamikanı saxlamaq lazımdır.

– Riçard Almeyda və Dani Kintana komandadan getdi. Onlarsız özünü komandanın mərkəz xəttində tək hiss etmirsən?

– Mən bura gələndən Dani və Riçard komandada olublar. “Qarabağ” karyeram ərzində ilk dəfədir ki, onlarsız çıxış edirəm. Düzdü, Almeyda bir müddət getdi və sonra yenə qayıtdı. Lakin uzun müddət onlarla oynadığım üçün çox alışmışdım. Nəinki meydanda, hətta meydandan kənarda da münasibətimiz çox yaxşı idi və dost kimi onlar üçün darıxıram. Artıq başqa komandadırlar, onlara uğurlar arzu edirəm və istədiklərinə çatmağı diləyirəm. Onlarla çox uğurlu və xoş xatirələrimiz olub. Onları yada salanda kövrəlirəm. Futboldu və belə şeylərə hazır olmalıyıq. Onların yeri görünür, amma “Qarabağ” olaraq irəli baxıram.

– “Sabah”la matçada 3 xal qazana biləcəksiz?

– Onlar mövsümün ikinci yarısına yaxşı başlayıb. Həm də qış fasiləsində heyətini gücləndiriblər. Çətin oyun olacağını gözləyirəm. Çempionatda bütün komandalara qarşı çətinlik olur. “Sabah”la da belə olacaq. Yaxşı formadadırlar. Hədəfimiz isə 3 xaldır.

AĞA