Yarımcan “Neftçi”dən vacib qələbə: Emin bəlkə də çempionluq qolunu vurdu

“Neftçi”nin ən böyük problemi digər komandalarla matçlarda xal itirməsidi. Əsas rəqibi “Qarabağ”a təslim olmayan, adətən başabaş oynayan bakılılar məhz ortabablarla görüşlərdə büdrəyir. Ağdamlılarsa illərdi belə xal itkilərini bağışlamır, sürət yığır və qızıl medallara sahib çıxır.

Ona görə də “Qəbələ”ylə dünənki matçın önəmi daha çox idi. Çempionu zirvədən saldıqdan sonra qələbələrin davamını gətirmək, mərkəzi oyundakı uğurun təsadüf olmadığını isbatlamaq lazım idi.

Doğrusu, “Neftçi” dünən xal itirsəydi, çox qınanmayacaqdı. Ötən tur “Qarabağ” üzərində qələbə baha başa gəlmiş, 4 əsas heyət üzvü cəzalı duruma düşmüşdü. Üstəlik, Sabir Buqrin məşqlərin birində zədələnərək sıradan çıxmışdı. Belə vəziyyətdə start heyətini çətinliklə quran Samir Abasov bəlkə bir xala da razı olardı.

Məcburiyyətdən müdafiənin mərkəzinə çəkilən Tallison tez-tez mövqe səhvi edir, cinah müdafiəçisi kimi oynadılan Yusuf Laval işinin öhdəsindən gəlmirdi. Eyni səbəbdən sağ cinah müdafiəçisi kimi çıxış edən Fəhmin Muradbəyli də müdafiə planında axsayırdı. Üstəlik, dayaq bölgədə işlər qaydasında deyildi – Bruno Teluşi məşqçilərin nəyə görə ona yox, Mamadu Kaneyə güvəndəyini əyani göstərdi.

Əvəzində yüksəlişdə olan “Qəbələ” paytaxta qələbə dalınca gəlmişdi. Rəqibi zəif yaxalamış əyalət təmsilçisi hücumda nicat axtarır, 4-cü pillə üçün yaranmış ümidlərinin puç olmamasına çalışırdı. Bəri başdan deyək ki, komanda xala layiq idi.

Oyun qonaqların üstünlüyü şəraitində keçdi, onlar daha çox qol epizodu yaratdı, birinci hissədə xüsusilə təhlükəli görünürdülər. Lakin qeyri-dəqiqlik azmış kimi son 20 dəqiqədə qüvvə də tükəndi. Abasovun əvəzetmələrindən sonra risk etməyə başlayan “Neftçi” yekunda mükafatını aldı. Hamının oyunun heç-heçə bitəcəyini gözlədiyi son saniyələrdə Emin Mahmudovun dəqiq zərbəsi qalibi müəyyənləşdirdi. Bəlkə də mövsümün sonunda bu qolun çempionluğun taleyini həll etdiyini yazacağıq. Bakılılar pis oynadıqları matçlarda belə qələbə qazanmağa davam edərsə, mövsümün yekunu maraqlı olacaq.

“Neftçi”nin yeni hücumçusu Ahmed Ahmedovun da komandaya kömək edəcəyi şübhəsizdi. Dünən meydanda olduğu qısa zaman ərzində o, özünü yaxşı tərəfdən göstərdi. Mövqeyə açılmalar, topla davranış, topsuz oyun – bakılılar çoxdan belə forvarda sahib olmamışdı. Superulduz deyil, amma son illər “Neftçi”yə gəlib-getmişlərlə müqayisədə ümid verdi.

“Qəbələ”nin problemi başqadı. Bəli, Elmar Baxşıyevin yetirmələri baxımlı oynayır, hücum futbolu sərgiləyir, lakin statistika bunu göstərmir. Bölgə klubu çempionatın ən azı qol vuran iki komandasından biridi. Əvəzində “Qəbələ”dən ayrılan futbolçular özünü sübut etməkdədi. Məhz Klesio Baukla Davit Volkovun qolları “Zirə”nin “Keşlə” sınağında uduzmamasına kifayət etdi.

Məğlubiyyətə rəğmən, “Qəbələ” avrokuboklara vəsiqə üçün sonadək döyüşəcəyini göstərdi. “Neftçi” isə bu qələbəylə çempionluğa daha çox inandı. “Qarabağ”la son duelə kimi qiyabi mübarizə, əsəb döyüşü davam edəcək.

FƏRİD