“Yekun qərarı hansısa ölkənin naziri yox, UEFA verəcək”

“Qarabağ” – “Molde” oyununun Bakıda keçirilib-keçirilməyəcəyi hələ dəqiqləşməyib.

Futbolinfo.az xəbər verir ki, bu barədə Ağdam klubunun direktoru Əmrah Çəlikəl oxu.az-a açıqlamasında bildirib.

O deyib ki, bu barədə qərarı UEFA verəcək: “Bunun dəqiqləşməsi üçün bizə UEFA-dan bildiriş gəlməlidir. Ona görə də UEFA-nın oyunu Bakıda və ya neytral ölkədə keçirmək barədə qərarı bizə bəlli deyil.

Amma bir daha deyirəm ki, bizim də oyunun Bakıda keçirilməsi üçün yetərincə arqumentlərimiz var. Yekun qərarı isə hansısa ölkənin naziri yox, UEFA verəcək”.

Norveç hökuməti bu gün rəsmi şəkildə bəyan edib ki, “Molde” komandası Bakıdakı oyundan sonra 10 günlük karantinə alınacaq. Səbəb Norveçə görə Azərbaycanın qırmızı zonada yerləşən ölkə sayılmasıdır. Bu isə karantinə alınacaq

Molde”nin Norveç çempionatında iki oyun buraxması anlamına gəlir. Ona görə də UEFA-nın oyunun neytral meydanda keçirilməsi barədə qərar verəcəyi gözlənilir.

Artıq variantlar kimi, Şengen zonasında olan Macarıstan, Polşa, Yunanıstan, Kipr və Sloveniyanın adları çəkilir. Bəs seçim haqqına malik olan “Qarabağ” bu ölkələrdən hansına üstünlük verəcək?

Bu barədə sualımıza Əmrah Çəlikəl belə cavab verib: “Bunu komanda, baş məşqçi ilə müzakirə etdikdən sonra demək olar. Bu, təkbaşına veriləcək qərar deyil. Yəqin ki, UEFA bu barədə bizə yaxın saatlarda məktub göndərəcək.

Əgər neytral meydanda keçirilməsinə qərar versə, bundan sonra ölkə seçimi barədə müzakirə apararıq. Biz də bu məsələnin daha tez formada həll olunmasının tərəfdarıyıq”.

UEFA Çempionlar Liqasının 3-cü təsnifat mərhələsi çərçivəsində baş tutmalı olan “Qarabağ” – “Molde” oyunu 15 və ya 16 sentyabrda keçirilməlidir.