Yenə şəxsi maraqlar: Kannavaro – milli komandamızın baş məşqçi postuna uğursuz namizəd

Azərbaycan futbolunun inkişafı, milli komandanın uğurlu nəticələri yalnız azarkeşlərin xəyalıdır. Bu sahəyə cavabdeh olanlar, strategiyanı müəyyənləşdirməli insanlar isə futbola qazanc mənbəyi kimi baxır.

Təsadüfi deyil, milli komandada hər dəfə baş məşqçi dəyişikliyi olanda işbaz menecerlər və onların AFFA-dakı şərikləri buna növbəti unikal şans kimi baxır. Elə yığmaya əsasən əcnəbilərin rəhbərlik etməsinin də əsas səbəbi budur. Hər yeni əcnəbinin gəlişi kimlərinsə cibinin doldurulmasına, müqavilənin davam etdiyi müddətdə müxtəlif yollarla əlavə qazanc əldə etməsinə səbəb olur.

Canni de Byazinin istefaya göndərilməsindən sonra son vaxtların daha çox səslənən fikirləri daha da aktuallaşıb. Belə ki, yığmanın yerli məşqçiyə tapşırılması hazırda bütün futbol ictimaiyyətinin, mətbuatın, azarkeşlərin tələbidir. Təsadüfi deyil, AFFA-nın baş katibi Sərxan Hacıyev də İcraiyyə Komitəsinin son iclasından sonra bu barədə danışmışdı. O, yeni baş məşqçinn yerli olması ehtimalından söz açmış, həmin şəxsin ən azı mental baxımdan bizə yaxın olmasının vacibliyini vurğulamışdı.

Baş məşqçi postuna namizədlərin müəyyənləşdirilməsi üçün yaradılacaq İşçi Qrup hələ yoxdur, amma ictimaiyyətin tələbinə məhəl qoymayan menecerlər dəstəsi artıq 20-dən çox legioner məşqçinin siyahısını AFFA-ya göndərib. Nikola Yurçeviç, Robert Prosineçki və Canni de Byazini Azərbaycan futboluna calaq edən, onların müavilələrindən böyük pullar qazanan, təkcə menecer haqqı ilə həm özünün, həm AFFA-dakı şəriklərinin güzəranını düzəldən Riad Rəfiyev yenə iş başındadır. “Sumqayıt”ın menecer-prezidenti yeni siyahısını təqdim edib və onlardan birinn təyinatı üçün həm təbliğata, həm də havadarları vasitəsi ilə təzyiqə başlayıb.

Bu insanların niyyətinin futbolun inkişafı olmadığı atdıqları addımlardan bəllidir. İndiyədək bütün əcnəbilər işinə görə yox, ad-sanına görə seçilib. Onların Azərbaycanda uğur qazanmaq perspektivinin olmaması hamıya aydın olsa da, məhz vasitəçilərin və təyinatı rəsmiləşdirənlərin daha yaxşı pullar qazanması üçün hər dəfə yekun fayda hesablanmadan seçimlər edilib.

İndi yenə eyni yol gedilir. Milli komandaya baş məşqçi təyin olunması üçün namizədliyi irəli sürülən Fabio Kannavaro buna nümunədir. Azərbaycan futboluna yaxından-uzaqdan dəxli olmayan bu şəxs AFFA-ya 3 fərqli yerdən təklif olunub, hətta bəzi menecerlər bu təyinatda israr, təzyiq edir. De Byazinin həmyerlisinin məşqçi kimi heç bir uğurunun olmaması isə kimsənin vecinə deyil.

Fabio çox əla müdafiəçi olub. Dünya çempionunun “Qızıl Top” sahibi olması faktı hər şeyi deyir. Lakin məşqçi Kannavaro hətta yerli məşqçilərin əlinə su tökəcək səviyyədə deyil. 2013-cü ildə “Əl Əhli”də (BƏƏ) köməkçi-məşqçi olan italiyalı, “Everqrand”da (Çin) iki dəfə, “Əl Nəsr”də (Səudiyyə Ərəbistanı), “Quanjan”da (Çin) çalışıb, Çin millisində 2 oyunluq müvəqqəti baş məşqçi olub, heç bir yerdə də özünü doğrultmayıb. Yalnız pul qazanmağı düşündüyü Asiyada özünü doğrultmayan gənc mütəxəssis, vətəni İtaliyada yalnız 5 ay iş başında olub. “Benevento”dan erkən qovulan Fabio bu ilin fevralından işsizdir.

Və indi özünü doğrultmayan bu məşqçini Azərbaycan millisinə sırımaq, neft ölkəsinin futbolun inkişafına, infrastruktura, uşaq futboluna yönəldilməsi gərəkən milyonlarını havaya sovurmaq istəyirlər. Kannavaronun futbolçu kimi xidmətləri reklam, məşqçi kimi bacarıqsızlığı gözardı edilir. Rəfiyevkimilər AFFA-dakı himayədarlarının vasitəsi ilə bu variantın alınması üçün əlindən gələni edir.

Fabio yeganə əcnəbi namizəd deyil. Yenə eyni adamlar Kannavaro variantı alınmazsa, Robert Prosineçkinin geri qaytarılması üçün təbliğat kampaniyasına başlayıb. Şenol Günəş və Yuri Syomin də dosyesi AFFA-ya təqdim olunan əcnəbilərdir.

Təbi ki, bu siyahı böyüyəcək, dəyişəcək, pul tələsi olan bir çox variantlar üzə çıxacaq. Sonda işbazların qalib gələcəyini, yoxsa Azərbaycan futbolunun inkişafını təmənna ummadan istəyən insanların arzusunun reallaşacağını birlikdə görəcəyik. Kanavaro, Prosineçki kimi heç yerdə özünü sübut edə bilməyənlərə görə daha 5-6 ili dəyişməyə dəyməz. Onlara xərclənəcək pulu daha səmərəli istifadə etmək, ölkə futbolunda nizam yaratmaq, düzgün strategiya müəyyənləşdirmək zamanıdır. Onsuz da çox gecikmişik, növbəti səhvi etməyək.

FƏRİD