Ölkə futbolu
Yorğun “Qəbələ”nin “kötəklənməsi”
Misli Premyer Liqasının 2023/24 mövsümü heç-heçəsiz başladı. Bərabərliyin qeydə alınması ən real görünən oyunda – Konfrans Liqasından yorğun gələn “Sabah”la “Qəbələ”nin qarşılaşmasında hətta darmadağın izlədik.
Ümumiyyətlə, tur bolqollu alındı. 5 oyunun 3-də böyük hesabın qeydə alınması isə xüsusilə gözlənilməz oldu. 15 qolun vurulduğu turda əsas faoritlər olan “Qarabağ”la “Neftçi”nin ümumiyyətlə, fərqlənməməsi, 0:1 hesablı məğlubiyyətlə barışması mövsümün gərgin keçəcəyi ilə bağlı ehtimalları gücləndirdi.
“Sabah”ın “Qəbələ”ni 5:0 hesabı ilə məğlub etməsi komandalar arasındakı səviyyə fərqinin nəticəsi deyildi. Düzdür, bakılılar daha yaxşı heyətə malikdir. Amma “bayquşlar”ın avrokubok matçını evdə keçirməsi, səfərdən darmadağın olaraq gələn “Qəbələ”nin həm fiziki, həm də psixoloji cəhətdən düşüşdə olması nəticədə əksini tapdı.
Qonaqlar heyətə xeyli yeni futbolçu qatsa da, həm onların ustalıq səviyyəsi əvvəlkilərlə müqayisədə zəifdir, həm də uyğunlaşma dövrünü hələ arxada qoymayıblar. Bu üzdən ən böyük silahı komanda oyunu olan “qırmzı-qaralar” əziyyət çəkdi və avrokubokda mərhələ adlamaqla motivasya qazanan “Sabah” rəqibinə açımadı.
Bölgə təmsilçisinin son 3 oyunda 12 top buraxmaı da qeyd edilməlidir. Komandanın müdafiəsindəki problemlər öz yerində, qapıçı Kristof Atanqananın zəif oyunu da vurğulanmalıdır. Buraxılan toplardan azı 4-5-i onun vicdanına yazılmalıdır. Bəlkə də yeni transfer – ötən mövsüm “Şamaxı”da özünü yaxşı tərəfdən göstərən Rəşad Əzizliyə şans verməyin vaxtıdır.
“Sabah”da işlərin qaydasında getdiyi görünür. Lakin “Qəbələ” ilə dünənki oyuna görə “bayquşlar”a qiymət vermək olmaz. Yeni transferlər edilib, komandanın oyunu hələ tam “oturmayıb”. Buna rəğmən, yaxşı nəticə qazanmaq, ilk turdan zirvəni ələ keçirmək müsbət məqamdır.
“Sabah” rəhbərliyi Coy-Lens Mikelsi düşərgədə saxlamaq üçün mümkün olan hər şeyi etməlidir. Səudiyyə Ərəbistanından təklif alan oyunçu komandanın əsas lideridir, Aleksey Kaşukdan sonra onun da ayrılması komandaya hətta ilk “üçlüy”ə düşməyə problem yarada bilər. Ərələr satınalma bəndini aktivləşdirsə, edəcək bir şey qalmayacaq, amma Mikelsi saxlamaq naminə heç bir güzəşt edilməməlidir. Komandanın sabitliyi qoruması, daha da inkişaf etməsi üçün liderlərin saxlanılması vacibdir.
Mübarizə qızışdıqdan sonra “Sabah” Kaşukun yoxluğunu daha çox hiss edəcək. Onun əvəzinə gətirilən Jarl Marqarita yaxşı oyunçudur. Amma yalnız fərdi oyuna üstünlük verməklə, texnikalı olmaqla iş bitmir. Ukraynalının komandanı arxasınca aparmaq, çətin məqamarda matçın taleyini həll etmək bacarığı da var idi.
Mikels isə dünən meydana çıxdıqdan saniyələr sonra qol vurmaqla, daha sonra məhsuldar ötürmə etməklə necə vacib oyunçu olduğunu göstərdi. Almaniyalı da getsə, “Sabah” yenidən komanda quruculuğuna başlamalı olacaq.
İstənilən halda, turun ən qazanclı çıxan komandası “Sabah”, ən bərbad vəziyyətdə olanı “Qəbələ”dir. Ardıcıl 3-4 tur komandaların gələcək perspektivi baxımından önəmlidir. İndiki nəticələr bəlkə də mövsümün sonunda həlledici olacaq, mövsümün gedişinə təsir göstərəcək. Ona görə də heç bir bəhanə olmadan xalları qazanmaq lazımdır.
AĞA
- Milli komanda2024-05-03 08:00
Vay(ss) bizim halımıza?
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq