Ölkə futbolu
“Zirə”də yeni dönəm: Həşimovla adil davranmadılar
“Zirə” yeni mövsümlə bağlı planlarını müəyyənləşdirməyib. Nə büdcə bəllidi, nə komandanın hansı iddiayla mübarizə aparacağı. Bu səbəbdən heyətdə olan, eləcə də anlaşması bitən futbolçular qeyri-müəyyənlikdə qalıb.
Dünən Zaur Həşimovun baş məşqçi postundan qovulması klub rəhbərliyinin kluba biganə olmadığını göstərdi. Yəqin ki, bu addımla ötən mövsümün əsəbini tökməyə adam tapdılar. “Qarşılıqlı razılıqla vida” adı qoyulsa da, əslində, bu, qışda edilən xeyli transferdən sonra uğursuzluğa düçar olmanın əvəzi idi. “Qəbələ”dən tələsik gətirilən Həşimov tam günahkar olmadığı nəticələrə görə qurban verildi. Yalnız top fərqinə görə “Sumqayıt”dan geri qalaraq Avropa Liqasına getməyən Zaur bəyin özünə bəraət qazandırmaq üçün şansı var. O, mövsüm dayandırılmayacağı halda hədəfə çataçağını iddia etsə, yalançı sayılmayacaq.
Həm də Həşimov qısa fəaliyyəti dövründə daha çox yıxılan sütunları bərpa etməyə çalışmasıyla yadda qaldı. Samir Abasovun bərbad günə qoyduğu heyəti təmizləməyə əmək sərf etdi, bitirilmiş büdcənin dibində qalanlarla 4-cü pilləyə şərik olmağ bacardı. Komanda qışdan sonrakı ilk turlarda hər nə qədər bərbad oynasa da, yekun nəticə faciəvi deyildi. Bu səbəbdən rəhbərliyin Həşimovla bağlı adil davranmadığını qeyd etməliyik.
İndi “Zirə”də yeni dönəm başlamalıdı. Və yəqin ki, öncə baş məşqçini seçmək lazım olacaq. Və həmin şəxsin planlarına, iddiasına görə büdcə müəyyənləşəcək. Sıradan biri posta təyinat alacaqsa, yeni mövsümdə ortabab “Zirə” görəcəyik. Yox, klub rəhbərliyi yüksək yerlər üçün döyüşməyə qadir məşqçiylə anlaşsa, o zaman fərqli düşünmək olar.
Klub rəsmilərinə inansaq, hazırda baş məşqçi postuna hətta namizəd də yoxdu. Lakin klub rəhbərliyinin yeni planı olmasaydı, çətin ki, belə gözlənilməz qərar bu qədər erkən verilərdi.
“Sumqayıt” ötən mövsüm kubokun finalına çıxanda, bu il isə avrokuboklara vəsiqə əldə edəndə “Zirə” rəhbərliyi təəssüf hissini köksündə sıxıb öldürürdü. Ayxan Abbasovu haqsız yerə postundan uzaqlaşdırdıqlarına hər gün bir daha əmin olurlar. “Qartallar”ı avrokuboka aparan bu məşqçi indi digər bir klubla uğuru sıralayırsa, “Zirə” elə həmin illərdə qalıb. Mövsümlər dəyişir, məşqçilər gəlib-gedir, hədəfə çatmaq olmur. Əvəzində daha az büdcəli “Sumqayıt” Abbasovla tarixinin ən yaxşı dönəmini keçirir.
Bəlkə elə buna görədi ki, Həşimovun istefa xəbəri elan olununca ən real namizəd kimi Ayxan bəyin adı çəkilməyə başlayıb. “Sumqayıt”dakı durumundan narazı olan, klub sponsorlarının yalanlarından bezən gənc məşqçi burada qalmaqda maraqlı deyil. Və bəlkə də “Zirə” bu şansdan yararlanmaq niyyətinə düşüb.
Amma Abbasov əsas namizəd olsa da, yeganə deyil. “Səbail”də rəhbərlikdəki iki cəbhə arasında təklənərək çalışan Aftandil Hacıyev durumundan bezib. Yəqin ki, real təklif olsa, o da paytaxt klubunu qəsəbə təmsilçisinə dəyişər.
Digər namizəd futbolçu karyerasını başa vuran Rəşad Sadıqovdu. Təbii ki, “Qarabağ”ın sabiq kapitanı bu postu tutsa, “Zirə”nin siması dəyişəcək, hədəflər böyüyəcək. Klubun bu iddiaya hazır olması üçün büdcə xeyli artmalı və Sadıqov həqiqətən “qartallar”da o potensialı görməlidi.
“Zirə”nin hansı strategiyanı seçəcəyi qarşıdakı günlərdə bəlli olacaq. Yeni məşqçinin sürpriz biri olmayacağı isə dəqiqdi.
AĞA