Ölkə futbolu
“Zirə”nin uğursuz, “Sumqayıt”ın uğurlu seriyası bitdi – “Qarabağ” bir az da uzağa qaçdı
“Zirə”nin uğursuz oyunlar seriyası başa çatdı. Ardıcıl 10 matçda qələbə üzü görməyən qəsəbə təmsilçisi ötən il noyabrın 12-dən bəri ilk dəfə Premyer Liqa qarşılaşmasında 3 xal əldə etdi.
105 günlük həsrət “Zirə”yə xas olmayan darmadağınla əlamətdar oldu. 23 oyuna 3 qol vuran “qartalar” bu dəfə 90 dəqiqəyə 3 top sığışdırdı.
Mərdəkandakı stadionda yeni adla baş tutan ilk qarşılaşma “Araz-Naxçıvan”ın heyətlə bağlı problemlərini də qabartdı. Mövsümün əvvəlindəki uğurlu çıxışın davamı məhz oyunçu potensialının yetərli olmaması üzündən gəlmədi. Muxtar respublika təmsilçisi artıq autsayderlərə qonşudur.
Hesaba baxmayaraq, qarşılaşmada “Zirə”nin parlaq üstünlüyünün olduğunu deyə bilməyəcəyik. Qonaqlar ərazi üstünlüyünü ələ keçirib vacib qolları vurdu, rəqib isə hücumda heç nə etməyi bacarmadı. Qışdan bəri sönük təsir bağışlayan Azər Bağırovun yetirmələri tezliklə toparlanmasa, yəqin ki, üst pillələrə iddia etməyəcək.
24-cü turun bağlanış matçı “Qarabağ”ın növbəti qələbəsi ilə yadda qaldı. Ağdamlılarla 2-ci dövrədək oyundan bəri əla seriya yaxalayan “Sumqayıt”ın məğlubiyyətsizlik seriyası elə çempionla matçda bitdi. “Atlılar” avrokubokda yorulan oyunçulara istirahət verib digərlərinə şans verdi, onlarsa ən yaxın izləyicini rahatlıqla məğlub etdi.
İndi 13 oyunu qalan “Qarabağ” ən yaxın rəqibindən 18 xal öndədir. Bu isə növbəti çempionluğun rəsmiləşməsinin daha tez olacağı deməkdir. 2 xallıq məsafədə olan 4, eləcə də 31 xalı olan daha 3 komanda qalan turları avrokuboklar vəsiqə mübarizəsinə həsr edəcək. Vəziyyət elədir ki, hazırda kiminsə hədəfinə çatacağını əminliklə demək olmur. Ona görə də “Qarabağ”ı təbrik edib digərlərinin mübarizəsinə fokuslanmaq olar.
FƏRİD