Əhməd İsmayılov: “Media sahəsində aparılan islahatlar sürətlə davam edir”

“Media sahəsində aparılan islahatlar sürətlə davam edir. Bu islahatların əsas hissəsi cəmiyyətlə düzgün kommunikasiyanın qurulmasıdır”.

Futbolinfo.az xəbər verir ki, bunu Medianın İnkişafı Agentliyinin icraçı direktoru Əhməd İsmayılov “Effektiv kommunikasiya” mövzusunda keçirilən təlim-seminarda çıxışı zamanı deyib.

Onun sözlərinə görə, hazırda jurnalistlərin peşəkarlığının artırılması istiqamətində işlər həyata keçirilir:

“Media savadlılığı inkişaf etmədikcə problemlər yaşayacağıq. Müvafiq dövlət orqanlarının əməkdaşları üçün təlimlər keçiririk. Media savadlılığının gücləndirməsi üçün də vacib addımlar atılır”.

Ə. İsmayılov bildirib ki, nə qədər vizual kontent yaradılsa da, sonradan yaradılan kontentin əhəmiyyəti azalır: “Əgər bizim agentlikdə bir hadisə baş verirsə, biz çalışırıq ki, orada suallar dərhal cavablandırılsın. Bizə aiddirsə, biz, başqa qurumdursa, onların mətbuat xidmətləri ilə danışırıq ki, onlar tez bir zamanda cavablandırsınlar”.

O qeyd edib ki, ilkin məlumatdan sonra daha geniş açıqlama verilə bilər: “Burada çeviklik lazımdlr. Əks halda həmin hadisə ilə bağlı mediada sual yaranır və öz fərziyyələrini ortaya qoyur. Bizim borcumuz o sualları vaxtında cavablandırmaqdır.

Əgər informasiyanın mənbəyi bunu vaxtında etmirsə, media özü informasiya mənbəyinə çevrilir. O zaman da medianı qınayırıq.

Məsələn, haradasa qısaqapanma baş verirsə və əgər buna aid informasiya verilmirsə, media başqa izahata başlayır.

Sosial media bir başqa cür çözür. Ona görə də burada çeviklik çox vacibdir. Bu strategiya işlənməlidir. Hamımız çevik olmalıyıq. Əks halda neqativ tendensiya üstələməyə başlayır. Biz bunu öz qurumlarımızda da hiss etmişik”.

Təlim-seminarı Elm və Təhsil Nazirliyi Medianın İnkişafı Agentliyi ilə birgə keçirir.