Dünya çempionatları ilə bağlı maraqlı faktlar

Dünya çempionatının startına az qalmış mundialla bağlı maraqlı araşdırmalar davam edir. Futbolinfo.az xəbər verir ki, bunlardan biri də ev sahiblərinin uğurları ilə bağlıdı.

İlk dəfə 1930-cu ildə Uruqvayda təşkil olunan və bu günədək 19 dəfə baş tutan yarışda 6 dəfə meydan sahibləri çempion titulunu qazanıb. İlk 2 turnirdə ev sahibləri qızıl medal qazanıb. Belə ki, 1930-cu ildə Uruqvay, 4 il sonra İtaliya öz evlərində təşkil olunan turniri kubokla qapayıb. İngiltərə 1966-cı ildə ev sahibliyi etdiyi yarışda ilk və hələlik son çempionluğuna nail olub. 1974-cü ildə Qərbi Almaniya, 4 il sonra Argentina, 1998-də isə Fransa meydan amilindən maksimum yararlanıb.
Son 3 yarışda isə ev sahibi olmayan komandalar kuboka sahib çıxıb. Sonuncu dəfə 1998-ci ildə Fransa öz evində güldükdən sonra meydan sahibləri sevinə bilməyib. 2002-ci ildə Cənubi Koreya və Yaponiyada keçirilən yarışı Braziliya, 2006-cı ildə Almaniyada təşkil olunan turniri İtaliya, 2010-cu ildə isə CAR-ın ev sahibliyi etdiyi mundialı İspaniya qazanıb.

İndiyədək iki ölkə yığması ev sahibi olduğu yarışın finalına çıxsa da, qalib adını qazana bilməyib. 1950-ci ildə Braziliya, 8 il sonra İsveç doğma meydandakı yarışın həlledici matçında kuboku əldən verib. Braziliya format səbəbi ilə heç-heçənin belə sərf etdiyi DÇ-1950-nin finalında Uruqvaya 1:2 hesabı ilə yenilib. İsveç isə DÇ-1958-in finalında Braziliyaya 2:5 hesabı ilə uduzub.

Digər bir maraqlı məqam isə Amerika qitəsində keçirilən mundiallarla bağlıdı. Belə ki, bu günədək bu qitədə keçirilmiş mundialların heç birində digər qitələrdən gələn iştirakçılar qalib ola bilməyib. İndiyədək 7 belə turnirin qalibi yerli yığmalar olub. Amerikada təşkil olunmuş 7 kubokdan 3-nü Braziliya, hərəyə ikisini isə Argentina və Uruqvay qazanıb.

Amerika komandaları 7 finaldan 5-də avropalılara, 2-də həmyerlilərinə qarşı oynayıblar. Uruqvay hər iki finalda amerikalılara – Argentina və Braziliyaya qarşı oynayıb. Braziliya və Argentina isə Avropa yığmaları ilə qarşılaşıb.