Ölkə futbolu
Sadıqovun yuxusu
"Neftçi"nin Avropa Liqasının təsnifat mərhələsi…
"Neftçi"nin Avropa Liqasının təsnifat mərhələsindəki son oyunu daha güclünün qələbəsi ilə bitdi. Bakıda yenməli olduğumuz "Koper"i Sloveniyada məğlub etməklə bakılılar vəzifələrinin öhdəsindən bir qədər gec gəldilər. Amma gəldilər – necə, hansı yolla – indi bunun bir o qədər faydası yoxdu.
"Neftçi"ni təbrik edirik. Rəqibin məhəllə komandası olmasına, futbolçuların hamısının birgə maaşının Flavinyonun və ya klubda adı olub özü olmayanların məvacibi qədər olmasına baxmayaraq… Qaliblər mühakimə olunmur, ancaq…
Bu qələbəni Böyükağa Hacıyev qazanmadı. O qazansaydı, ilk oyundan sonra yerə-göyə sığdırmadığı Məqsəd İsayevi ehtiyatda oturtmaz, narazı qaldığı və günahlandırdığı Bruno Bertuççiylə Ernest Nforu start heyətdə buraxmazdı. Ona görə də kim nə deyirsə-desin, bu, başqasının qurduğu heyət idi.
Bu qələbəni futbolçular da qazanmadı. Çünki onlar Bakıdakından fərqli heç nə etmədilər. Həmin oyun anlayışı, həmin oyun tərzi idi. Sadəcə, bu dəfə rəqib zəif oynadı, azlıqda qalmaları isə bizimkilərin işinə yaradı. Onların buna niyə imkan verdiyini isə bilmirəm. Amma mənim üçün şübhəli olan məqamlar var:
1. Oyun günü bukmeker kontorlarında "Neftçi"nin qələbə əmsalının kəskin aşağı düşməsi;
2. Oyunun sanki qələbəylə bitəcəyi bilindiyindən qəfil olaraq canlı yayımın təşkili – (halbuki, "Neftçi"nin APOEL-lə oyunu belə canlı yayımlanmamışdı);
3. Rəqib futbolçuların sanki bilərəkdən bakılılara oynamaq imkanı verməsi;
4. Klub prezidenti Sadıq Sadıqovun "Futbol+" qəzetinə müsahibəsində "yuxuda görmüşəm ki, 2:0 hesabıyla qalib gələcəyik" deməsi.
Məni qaraniyyətlilikdə qınaya bilərsiz, amma istənilən halda "Neftçi"nin təmiz qələbəsinə şübhə edirəm. Bu, ittiham deyil, oyun ərəfəsində başverənlərdən və matçda gördüklərimdən çıxardığım qənaətdi. "Koper" çox zəif rəqib idi, ancaq "Neftçi" bu qələbəyə alın təri ilə nail oldumu? İnana bilmirəm!
"Neftçi"nin futbolçularının bu qələbəyə görə mükafat alacağını düşünmürəm. Onların alacaqları indi başqa yerdədi. Hələ bəlkə klubda çalışan qohum-qardaş da "nəzir" payladı ki, gələcəklərinin təhlükəsiz, daimi olması, əsas şefin postunda qalması üçün buna dəyərdi. Amma paylanan "nəzir"in Sadıq Sadıqovun yuxusunda əyan olması Allahın "möcüzə"si idi. Görəsən, həmin gecə "Neftçi"nin sabiq vitse-prezidenti Tahir Süleymanov yuxusunda nə görüb?
Qarşıda "Çixura" ilə oyun var. Gürcülərlə qarşılaşma haqda indidən kimsə nəsə deyə bilməz. Amma Sadıqov rahat yatmalıdı ki, yenə yuxu görsün. İndi bir az rahatdı, rahatca yata, yuxu görə bilər. QaraCixuralı Namiq demişkən, bu nə bəladı düşmüşük Allah?..
FƏRİD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”