Premyer-liqa
50 qəpiklik oyun
Topaz Premyer Liqasının 9-cu turu çərçivəsində baş…
Topaz Premyer Liqasının 9-cu turu çərçivəsində baş tutan “Qəbələ” – “Sumqayıt” matçına biletin qiyməti 50 qəpik idi. Bu, yerli azarkeşlərin stadiona cəlb olunması üçün atılan addımlrdan biridi və bu ənənə ötən mövsümdən bəri davam edir.
Biletin 1 tum və 1 qazlı su dəyərərində olmasına baxmayaraq yerli fanatlar doğma komandalarının oyuna elə də ciddi maraq göstərmədilər. Stadiona toplaşanlar fan-klubun üzvləri, “Qəbələ”nin aşağı yaş qrupunda çıxış edən futbolçular və bir neçə şəhər sakini idi.
Azarkeşlərin “Qəbələ”nin matçına maraq göstərməməsini öncə rəqibin “Sumqayıt” olması ilə də əlaqələndirmək olardı. Di gəl ki, yerli komandanın ürək açmayan oyunu ilk versiyanı ikinci plana keçirmişdi. Yuri Syominin vaxtında olduğu kimi, Dorinel Muntyanunun dönəmində də oyun “qırmızı-qaralı” futbolçuların fərdi ustalığı üzərində qurulub. Lakin ötən mövsümdən fərqli olaraq, rumın çalışdırıcının gətirdiyi legionerlərin dişsizliyi qarşıya qoyulmuş vəzifəni yerinə yetirməyə mane olur.
Ümumi götürsək, “Qəbələ”nin ilk hissədə sərgilədiyi futbol elə matçın biletinə qoyulmuş qiymətin dəyərində idi. Muntyanunun komandaya cəlb etdiyi Markus Vidalın açıq-aşkar formada olmadığı hiss olunurdu. “Radarlar”ın tez-tez top itkilərinə yol verməsi hücumların yarıda dayanmasına səbəb olurdu. Sağ cinah isə nəzərə çarpacaq qədər ciddi deyildi. Bundan başqa Ruslan Tağızadə və Müşfiq Teymurov yarımmüdafəçiləri topla təmin etməkdə çətinlik çəkirdi.
Elə bunun nəticəsi idi ki, “Sumqayıt” ilk hissədə etdiyi nadir hücumların birində hesabı açdı. 40-cı dəqiqədə Ramazan Abbasov Kamran Ağayevin qoruduğu qapıya Muarem Muarem sayağı qol vurdu. İkinci hissə isə tamam fərqli oldu. “Qəbələ” hissənin başlanğıcında rəqib qapıçısını tez-tez narahat etməyə başladı. İlk hissədə bərbad oyunu ilə yadda qalan Markusun 46-cı dəqiqədə Ekiqo Ehiosun ilə əvəzlənməsi də öz sözünü deməyə başlamışdı. Amma yenə də qeyri-dəqiq zərbələr status-kvonu bərpa etməyə mane olurdu.
Matçda əsas hadisələr isə 70-ci dəqiqədən sonra cərəyan etməyə başladı. 73-cu dəqiqədə “Sumqayıt” əks-hücumda rəqibini yaxalayaraq, fərqi iki topa çatdırdı. Lakin yan xətt hakimi Munis Abdullayevin Məhəmməd Qurbanovun vurduğu qolu ofsayd kimi dəyərləndirməsi, narazılıqlara, eyni zamanda da şübhələrə səbəb oldu. Televiziya çəkilişindən epizodun arxa plandan çəkilməsi isə şübhələrin aradan qalxmasına imkan vermir. Epizoda yalnız PFL-in kameraları vasitəsi ilə çəkilən görüntülərə baxdıqdan sonra obyektiv qiymət vermək olar.
“Qəbələ” istəyinə yalnız 77-ci dəqiqədə çata bildi. Meydana sonradan daxil olan Ekiqonun cinahdan yerlə etdiyi ötürməni Cavid Hüseynov dəyərləndirdi – 1:1. Ardınca 88-ci dəqiqədə nigeriyalı hücumçu bu dəfə Pavel Farkaşın fərqlənməsinə imkan yaratdı. Matçda son nöqtəni isə iki qol pası verən Ekiqonun özü vurmaqla matçın ən yaxşısı olduğunu sübut etdi.
Qarşılaşmadan sonra Muntyanu “Qəbələ”nin komanda oyunu oynamadığını etiraf etdi. Nəzərə alaq ki, rəqib bir qədər dişli olsaydı, əyalət təmsilçisinin matçdan 3 xalla ayrılmaq şansı yox idi. Çünki hələ də komandanın heyətində axsaqlıqlar hiss olunur. Rumın çalışdırıcı isə bunu komandanın başında qısa müddət ərzində olması ilə əlaqələndirdi. Ekiqonun yaxşı çıxış etdiyini bildirən rumın çalışdırıcı Elvin Camalovun da əməyinə biganə qalmadı. Ümumiyyətlə Ekiqoya qədər matçın ən yaxşısı adına “Qəbələ” futbol akademiyasının yetirməsi olan Elvin Camalovu da layiq görmək olar. Meydanın hər yerində döyüşən futbolçu əzmkar mübarizəsi ilə yadda qaldı. Camalov sükanı belə saxlayacağı halda 1-2 ilə milli komandaya cəlb olunan legioner futbolçuların çörəyinə bais ola bilər.
“Sumqayıt”ın baş məşqçisi Aqil Məmmədov isə komandasından razı qaldığını desə də, hakimlərdən narazı olduğunu “Vüsal Əliyev, Munis Abdullayev kimi hakimləri yola salmaq yox, rədd etmək lazımdı” deməklə bildirdi. Çox güman ki, məşqçilərə mətbuat konfransında hakimlərlə bağlı danışmağa qadağa qoyulduğu üçün AFFA İntizam Komitəsi Məmmədovun bu açıqlaması “mükafatlandıracaq”.
EMİN SƏFƏROV, Bakı – Qəbələ – Bakı
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”