Premyer-liqa
Növbəti istefa harada olacaq?
Topaz Premyer Liqasında 10-cu tur geridə qaldı. Bu oyunlar ərzind?…
Topaz Premyer Liqasında 10-cu tur geridə qaldı. Bu oyunlar ərzində artıq komandalar yavaş-yavaş öz güclərini göstərirlər və kimin zirvədə, kimin autsayderlər sırasında olacağı müəyyənləşir. Cari mövsümdə yeganə baş məşqçi dəyişikliyi "Neftçi" klubunda baş versə də, son sıralarda qərarlaşan komandalarımızda da ayrılıqlar gözləniləndi.
Futbolinfo.az saytı olaraq, bu məsələ ilə bağlı idman mediasının nümayəndələrinin də fikrini öyrəndik. Bilmək istədik ki, həmkarlarımız növbəti baş məşqçi istefasını daha çox hansı klubumuzdan gözləyir:
ATV kanalının aparıcısı Sənan Şəfizadə: "Məşqçi dəyişikliyi hər an ola bilər. Nəticədən başqa, hər hansı problem ucbatından klubdan gedənlər olur. Milli çempionata gəldikdə, növbəti məşqçi dəyişikliyini "Araz Naxçıvan"dan gözləyirəm. Amma fikrimcə, Əsgər Abdullayevə zaman və yetərincə yaxşı futbolçular vermək lazımdı. Unutmayaq ki, "Araz" debütantdı".
Komanda.az saytının baş redaktoru Rəşad Ergün: "Baş məşqçilərin əlcək kimi dəyişildiyi Azərbaycan futbolunda məni daha çox bir klub təəccübləndirir – "Araz Naxçıvan". Naxçıvan klubunun rəhbərliyinin Əsgər Abdullayevə münasibətdə son dərəcə səbrli olması görünməmiş bir şeydi. "Araz Naxçıvan" həddən artıq bərbad çıxış edir, nəticələri biabırçıdı. Başqası olsa, baş məşqçini çoxdan istefaya göndərmişdi. Bilmirəm, bəlkə də biz "Araz Naxçıvan" rəhbərliyini tələsik qərar vermədiyinə görə alqışlamalıyıq. Lakin yenə də, istefa gözlənilirsə, bu klubdan gözlənilməlidi. Növbəti turda naxçıvanlılar "Qarabağ"la qarşılaşacaq. İnanmıram ki, "Qarabağ" onlara xal versin. İstefa ola biləcək digər klub isə məncə, AZAL-dı. "Təyyarəçilər"in də vəziyyəti yaxşı deyil və çanaq Tərlan Əhmədovun başında sına bilər".
Futbolpress.az saytının rəhbəri Elçin Cəlilov: "Әn ehtimal olunan baş mәşqçi dәyişikliyini "Xәzәr Lәnkәran"da gözlәyirәm. Bu haqda saytımızda informasiya da çıxıb. Son turların әn mәzmunlu oynayan komandalarından biri olsa da, nәticәlәr ürәkaçan olmur. Oğuz Çәtinin alternativi olan Yunis Hüseynovun tәyinatı gözlәnilәndi. AZAL isә baş mәşqçi dәyişdi-dәyişmәdi, bir iddiası yoxdu. Mәşqçi dәyişmәyә ehtiyacı olan komanda isә "Araz Naxçıvan"dı. Fikrimcә, Әsgәr Abdullayev orada persona non-qrataya çevrilmәkdәdi".
Sportal.az saytının rəhbəri Emin Abbasov: "Hazırda görünən odu ki, baş məşqçi istefası daha çox AZAL-da və ya "Simurq"da ola bilər. Açığı, "Simurq"da olacağına bir o qədər də inanmıram, amma daha real AZAL görünür. Çünki hiss olunur ki, bu rəhbərlik Tərlan Əhmədovla işləmək niyyətində deyil. Kənardan da görünür ki, onun üstünə daha çox təpki ilə gəlirlər. Amma mən deməzdim ki, AZAL bu mövsüm pis çıxış edir. Ümumiyyətlə, çempionat çətindi və AZAL kimi aşağıda qərarlaşan komandaların güclülərdən xal alması elə də asan başa gələn bir şey deyil. Məşqçinin üstünə təpki ilə gedəndə, artıq işləmək onun üçün çətin olur. Ona görə də mən AZAL-ı deyirəm. Amma ümumiyyətlə, "Araz Naxçıvan"da da belə hal baş verə bilər. Baxmayaraq ki, Əsgər Abdullayev hər dəfə çıxıb deyir ki, mən nə edə bilərəm? Gücümüz budu. Düşünmürəm ki, bu, belə davam etsin. Mənə elə gəlir ki, "Araz Naxçıvan"da da məşqçi istefası uzaqda deyil. Düzdü, Əsgər Abdullayev sözün düzünü deyir. O, nə edə bilər? Amma "Araz Naxçıvan" bu gedişlə xal toplaya bilməyəcək. Cari mövsüm artıq bir məşqçi istefası olub, "Neftçi"də. Mənə elə gəlir ki, mövsümün sonuna kimi daha 3 məşqçi istefası ola bilər".
Azerisport.az saytının baş redaktoru Vüqar Zeynalov: "2-3 klubdan başqa zəif nəticələrə görə hamısında məşqçi əvəzlənə bilər. Ad çəkmək çətindi".
ELMAR VƏLİYEV