Premyer-liqa
Çempionatdan imtinanın əsl səbəbi: “Araz Naxçıvan” yeyintiyə qurban gedir
“Araz Naxçıvan”ın Topaz Premyer Liqasından imtin…
“Araz Naxçıvan”ın Topaz Premyer Liqasından imtinası hələlik noyabrın ən sensasion xəbəridi. Debütant heç kimin gözləmədiyi halda, bu gün bəyanat yayaraq yarışdan çəkildiyini bildirib. Səbəb-filan göstərmədən, “Xəbərlə bağlı geniş məlumat günün ikinci yarısından sonra saytımızda yerləşdiriləcək" izahı klubun rəsmi veb-səhifəsində əksini tapıb.
Düzü, naxçıvanlıların günün ikinci yarısında hansı bəyanatı yayacağını dəqiq bilmirik – yəqin ki, müxtəlif bəhanələr tapacaq, günahı kimlərinsə boynuna yıxmaq istəyəcəklər. Ancaq reallıq budur ki, onların yazacaqları yalnız bəhanə olacaq, heç kim öz ayranına turş deməz.
Hələ mövsümün startı ərəfəsində bəlli idi ki, “Araz Naxçıvan” yarışa hazır deyil. Xərclərdən qaçmaq üçün hətta əvəzedici komandasız yarışmaq həvəsinə düşən komanda sonradan bunun mümkünsüzlüyünü anladı. Əlavə imtiyazlar qazanmaq üçün də bir sıra addımlar atıldı, ancaq fayda görmədilər. I divizionla müqayisədə xərclərin daha çox olduğu Premyer Liqanı gördükdə anladılar ki, nəsə şuluqluq salıb aradan çıxmaq lazımdı.
“Araz Naxçıvan” artıq bir dəfə buna cəhd edib. Amma o zaman onların bəhanələrini heç kim ciddi qəbul etmədi və komanda rəhbərliyi sosial şəbəkədə verdikləri bəyanatı hətta klubun rəsmi səhifəsinə çıxarmağa utandılar. İndisə növbəti cəhdə hazırlaşırlar. Naxçıvan klubunun son pillədə qərarlaşması, son turda darmadağın olması yuxarıların narazılığına səbəb olub. Klub rəhbərliyindən gec-tez bunun səbəbi soruşulacaq, ona görə də bəri başdan məsələyə başqa don geydirməyə cəhd edirlər.
Əslində, çempionatdan çıxmaq üçün tutarlı səbəb olsaydı, bunu elə ilk bəyanatdaca qeyd edərdilər, daha anons verib ictimai fikri öyrənməyə cəhd göstərməzdilər. Hazırda naxçıvanlılar mətbuatın, ictimaiyyətin məsələyə necə reaksiya verəcəyini gözləyir ki, işlərini buna uyğun qursunlar.
Düzünə qalsa, “Araz Naxçıvan”ın özündən başqa kimdənsə şikayətlənməyə əsası da yoxdu. Çünki komanda açıq-aşkar zəifdi, nə hakimlərin səhvlərinə qurban olublar, nə də özlərinə qarşı hansısa ikili standartın. Əksinə, Naxçıvanda futbolun davamlı olması üçün hələ I divizionda olarkən AFFA, PFL tərəfindən digər klublara göstərilməyən qayğını görüblər.
Bəs, “Araz Naxşıvan”ın qarnının ağrısı nədi?
Kluba yaxın mənbələrdən aldığımız məlumata görə, bu addım şantaja hesablanıb. Ciddi maliyyə problemi ilə üzləşən komanda maddi yardım umur. Çünki komanda üçün bir mövsümə ayrılan büdcə 2-3 aya dağıdılıb, komandanın hətta növbəti oyunlara getmək üçün pulu yoxdu. Kim yeyib, kim dağıdıb – bunu artıq pulu ayıranlar araşdırılmalıdı. Hər məğlubiyyətdən sonra bəzi futbolçuların komandadan qovulması da buna hesablanıb. Artıq 7 futbolçu yola salınıb, çünki onlara verməyə pul qalmayıb, başqa səbəblər bəhanədi. Prezident Orxan Cabbarovun ötən həftə postundan istefa veriməsi də boşuna deyildi. Məsuliyyətdən qaçmaq üçün postunu tərk edən bu şəxs də klubdaxili vəziyyətin aşkara çıxacağını bilirdi, ona görə tez aradan çıxmaq istədi. Naxçıvanın idman nazirinin qohumu olan Cabbarovun sorğu-suala çəkilib-çəkilməyəcəyini bilmirik, ancaq onun da bu məsələlərdən xəbərdar olduğu aydındı.
İndi müflis olmuş klub çempionatdan qaçmağı yeganə çıxış yolu kimi görür. Ümid edirlər ki, bəlkə divizion klublarına yardımını əsirgəməyən AFFA yenə onları vəziyyətdən çıxartdı. Bu səbəbdən bəyanatı elə hazırlamaq istəyirlər ki, öz günahlarını gizlədərək başqalarını suçlasınlar, guya ki, hansısa haqsızlığa görə belə edirlər. Halbuki hamıya bəlli di ki, komanda Premyer Liqa tələblərinə heç cür cavab vermir – nə klub olaraq, nə heyət baxımından, nə də maliyyə cəhətdən.
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- I Liqa2024-05-01 11:25
I Liqada 24-cü turun təyinatları müəyyənləşdi
- Milli komanda2024-05-01 18:44
Milli komandamızın baş məşqçi postuna əsas namizəd bəlli oldu