Ölkə futbolu
Elnur Məmmədov və sprey
Son vaxtlar futbol meydanlarında qəribə şeylər görür&uu…
Son vaxtlar futbol meydanlarında qəribə şeylər görürük. Bu top oyunun mahiyyəti yenə əvvəlki kimidi, dəyişən xırda detallardı. Həm də əsasən hakimlərin işini asanlaşdırmaq, meydanda ədaləti daha yaxşı qorumaq üçün müxtəlif vasitələr ortaya çıxıb. Qapı xətti texnologiyası, matçlara təyin olunan qapı arxası hakimləri və s. Onlardan ən yenisi spreydi.
Artıq Azərbaycan Premyer Liqasının oyunlarında da hakimlər spreydən geniş istifadə edir. Topun və oyunçuların dayanma yerini dəqiq müəyyənləşdirmək üçün hakimlər üzərlərində bu prepataratı gəzdirməyə məcburdu. Etiraf edim ki, çox faydalı vasitədi. Elə olmasaydı, bundan başqa sahələrdə də istifadə etməzdilər.
“Neftçi” flaqman klubumuzdu, öndə getmək alınlarına yazılıb. Düzdü, klub mədəniyyətində, futbolun inkişafına töhfə verməkdə, azarkeş sayında və s. bunu bacarmasalar da, yeniliklərə açıqdılar. Necə ki, klubun yenilikçi, hər iş (!!!) bacaran təzə vitse-prezidenti Elnur Məmmədov spreyin adını eşidəndən bu alətdən klubda da istifadə etmək qərarına gəlib. Alıb əlinə spreyi – xəttləyir.
Sadıq Sadıqovu stadionda görə bilməzsiz. Elnur bəy gələni bütün səlahiyyətləri havaya uçan “Neftçi”nin prezidentini oğlanları əvəz edir. Amma yalnız görüntü xatirinə. Çünki hər şeyin qərarverəni Məmmədovdu. O isə əlindəki spreylə səlahiyyətlərin həddini müəyyənləşdirib. Sadıqov vitrinə qoyulmaq üçün görüntü xatirinə mövcud olan adamdı, vitse-prezidentin cızdığı xətti adlaya bilməz. Otağında oturub hacı dostları ilə söhbət etsin, yoxsa ümumiyyətlə, bazanın qabağında onun üçün keçmək məhdudiyyəti yaradan ağ zolaqla qarşılaşar. Necə ki, övladlarına belə xəbərdarlıq edilmişdi.
Məmmədov təkcə prezidentə qarşı belə amansız deyil. O, Sadıqovun müşaviri olan adaşı üçün də xəttlər cızıb. Elnur Əşrəfoğlunun “Neftçi”ni İŞİD-lə müqayisə edən məlum aşıqlamasından sonra ona da qadağalar var. İndi sabiq mətbuat işçisinin ağzını açmağa da ixtiyarı yoxdu, spreylənib. Əşrəfoğlu yalnız Sadıq bəyin yanında olanda nəsə deyə, şikayət edə bilər. Amma nə fayda? Elə Sadıqovu indiki vəziyyətə vəzirinin gicgicə məsləhətləri salmayıbmı?
İş ondadı ki, Elnur bəyi AFFA da spreylə çəkilən xəttin o biri üzündə saxlayıb. Hakimlər Komitəsinin sədri Xaqani Məmmədovla Zaqataladakı məlum qalmaqaldan sonra onun üçün stadionların ətrafında ağ xəttlər çəkilib. Ayağını içəri qoysa, ağzından daha bir naqolay söz çıxarsa, Əşrəfoğlunu daha uzun müddətə spreyləyəcəklər.
Məmmədov heç də bu iki şəxslə kifayətlənmir. Mətbuat xidmətinin rəhbəri Gündüz Abbaszadə də daxil olmaqla, bütün klub işçiləri üçün müxtəlif məhdudiyyətlər qoyulub. Hələ söz gəzir ki, Elnur bəy əlində spreylə klubun bazasını gəzir, yolunu azan gözünə dəyən kimi həmin adam üçün xətt çəkir.
Sprey məhşurlaşdığı üçün yazıda bu ingilis sözündən istifadə edirəm. Əslində, bizdə buna cızıq deyirlər. “Papa canı, mama canı” deyə danışanlar bilməz, amma Sadıq müəllim kimi kənd uşaqları bunun mənasını gözəl anlayır. Uşaq vaxtı o qədər belə oyunlar oynamışıq ki. Yadımdadı, torpaqda ağacla, odun parçası ilə xətt çəkər, oyunun keçiriləcəyi ərazini müəyyənləşdirərdik. Sonra kimsə cızıqdan kənara çıxsa, onu cəzalandırardıq. Elnur Məmmədov yəqin, uşaqlıq dövrünü indi yaşayır, beynində qalıb, ona görə də hara getsə, cızıq çəkir, kənara çıxanı şapalaqlayır. Qapısının üstünə lövhə də vurub: “Cızığından çıxanı baraban çöpləri ilə döyərəm”.
Budur səviyyə fərqi, budur savadlı olmaq. Yaxşı nə gördünsə, götürüb işində tətbiq edəcəksən. Ona görə də futbolla bağlı nəsə təzə bir olay ortaya çıxsa, bilin ki, Elnur Məmmədov “Neftçi”də tətbiq edəcək. Bircə videotəkrar olmasın, yoxsa vitse-prezident “Neftçi”nin ötən günlərini vərəqləyib qərar versə, çox adamın evi yıxılacaq. Onda bəlli olacaq ki, Tahir Süleymanovun, Güloğlan Cabbarovun vaxtında nələr olub? Onda bəlli olacaq ki, kim hansı oyunçunun transferindən nə qədər qatlayıb? Onda bəlli olacaq ki, Nikolas Kanalesin getmə və qayıtma səbəbi nədir? Onda bəlli olacaq ki, Conni Leoni adlı qapıçını Bakıya niyə gətirib, niyə qovdular? Onda bəlli olacaq ki, Elnur Əşrəfoğlunu “Neftçi”dən hansı səbəbə görə uzaqlaşdırmışdılar və niyə o, ləkəli adla daha yüksək vəzifəyə gəlib?
Bircə videotəkrarın tətbiqinə başlamasınlar…
VÜSAQİ
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 20:00
“Baku Sportinq”dən növbəti darmadağın
- Dünya futbolu2024-04-29 18:32
Palladino iddialı komandadan dəvət gözləyir