Ölkə futbolu
2 vəsiqəyə 3 iddiaçı: gərgin finiş üçün hər şey hazırdı
Deyəsən, “Sabah”ın çempiondan xal alması “Qəbələ”ni daha da motivasiyalı etmişdi. Bu səbəbdən dünən Zirədə daha aqressiv, daha inadkar komanda gördük. Bölgə təmsilçisi son vaxtlar ilk dəfə özünə bənzəməyə, əsl futbol oynamağa çalışdı. Bunun sayəsində həm 4-cü pilləyə qayıtdılar, həm də avrokuboklara düşmək uğrunda mübarizədə n çəkilmədiklərini göstərdilər.
“Qəbələ” 9 oyunluq qələbəsizlik seriyasını əsas rəqiblərindən birini səfərdə yenməklə bitirdi. “Zirə”nin darmadağın edildiyi görüşdə bölgə təmsilçisi 3 xala tam layiq idi. Oyunu əks-hücumlar üzərində quran qonaqlar ələ düşən fürsətlərdən yararlanınca rahat nəfəs ala bildi.
Qazanacağı bir xalla Konfrans Liqasına vəsiqəni təmin edəcəyi dəqiq olan “Zirə” bəlkə də heç-heçə düşüncəsi ilə meydana çıxmağın gündazına gedi. Amma bu yenilgidə daha çox komandanın yorğuluğu rol oynadı. Ölkə kubokunun yarımfinalında “Neftçi”ylə 120 dəqiqəlik mübarizə “qartallar”dan çox güc almışdı və bu, özünü göstərdi. Fasiləyədək iki epizodda rəqibin əks-hücumunun qarşısını ala bilməyən qəsəbə təmsilçisi, fasilədən sonra vəziyyəti dəyişə bilmədi, əksinə, son dəqiqələrdə daha bir top buraxıb məğlub oldu.
Bu, etibarlı müdafiəsi ilə seçilən meydan sahiblərinə xas xüsusiyyətdi. Komanda fərdi səhvdən top buraxdısa və hücumda işlər alınmadısa, qolların davamı gəlir. Dünənki oyunda məhz mərkəz müdafiəçilərinin mövqe səhvindən sonra xətalar zənciri sıralandı, heyətdə rotasiyalar etmiş Rəşad Sadıqov vəziyyəti toparlaya bilmədi.
5-ci pilləylə xal fərqi 6-a enib. Növbəti turlarda “Qarabağ” və “Neftçi” ilə oynayacaq qəsəbə təmsilçisi üstünlüyünü qısa müddətdə əldən verə bilər. Düzdü, bunun üçün əsas rəqibləri də xal itirməməlidi, lakin riyazi cəhətdən hər şey mümkün və realdı. Daha rahat təqvimi olan “Sabah”la “Qəbələ” son turdakı şəxsi oyunlarınadək büdrəməsələr, bizi gərgin finiş gözləyir.
Əvəzində “Neftçi” fürsətdən yararlanıb gümüş medalı təmin etmək yolunda böyük addım atdı. Sumqayıtda qələbə qazanan “ağ-qaralar”a istəyinə çatmaq üçün bir xal kifayətdi.
Bakılılar da “Sumqayıt”la matça yorğun və itkilərlə çıxmışdı. Lakin usta oyunçuların sayəsində hesab açılanda Aleksey Baqanın Azərbaycanda ilk qələbəyə nail ola bilməyəcəyi aydınlaşdı. Ardınca Camaləddin Xocaniyazovun meydandan qovulmasıyla yekun nəticə bəlli oldu. 11 nəfərlə 6 aydı qələbə üzü görməyən “kimyaçılar”, belə vəziyyətdə ümumiyyətlə, çarəsiz duruma düşdü. “Neftçi” fasilədən sonra daha bir qol vurub işi bitirdi.
“Sumqayıt” “Səbail”in xal qazandığı turda son pilləyə şərik oldu. Son illərin uğurlu komandasının enişi davam edir. 2022-ci ildə evdə xala və qola həsrət qalan Baqanın yetirmələri “Şamaxı”yla da bacarmasa, əsas rəqibiylə son turdakı əyani dueldə taleyini özü həll etməli olacaq.
Sona 3 tur qalmış Azərbaycan Premyer Liqasının qalibi, eləcə də Konfrans Liqasına gedəcək komandalardan biri bəllidi. Qalan 2 vəsiqə uğrunda 3 iddiaçının mübarizəsi sonadək davam edəcək. Rəqiblərindən öndə olan “Zirə”nin daha bir üstünlüyü kubokun finalına vəsiqə qazanmasıdı. “Sabah” nisbətən rahat təqvimə malikdisə, ondan öndə olan “Qəbələ”nin bu rəqibini son turda qəbul edəcəyi şanslarını artıran amillərdəndi.
AĞA