Yaxın Şərqdəki münaqişə səbəbindən ləğv edilən Səudiyyə Ərəbistanı Qran-Prisi dekabrın 6-da keçirilə bilər.
Təşkilatçılar Əbu-Dabi Qran-Prisini bir həftə (6 dekabrdan 13 dekabra) təxirə sala və Ciddə raundunu təqvimə daxil edə bilərlər. Bu halda, Formula 1 mövsümü ardıcıl dörd yarışla başa çatacaq: Las-Veqas, Qətər, Ciddə və Əbu-Dabi.
Xatırladaq ki, Əbu-Dabinin son mərhələnin həmişə orada keçirilməsini tələb edən müqaviləsi var. Təqvim dəyişikliklərinin təsdiqlənməsi üçün çox güman ki, bir müddət vaxt lazım olacaq.
Bəhreyn və Səudiyyə Ərəbistanındakı raundlar İranla bağlı hərbi münaqişə səbəbindən ləğv edilib. FIA və “Liberty Media”nın rəsmi açıqlamasında yarışların “aprel ayında keçirilməyəcəyi” bildirilsə də, onların təxirə salınma ehtimalı da istisna edilməyib.
