Milli komanda
AFFA-dan böyük mükafat: Futbolçular 540000 qazandı – ÖZƏL
AÇ-2016-nın seçmə mərhələsində ardıcıl 4 oyunda …
AÇ-2016-nın seçmə mərhələsində ardıcıl 4 oyunda məğlubiyyətlə üzləşən millimiz nəhayət ki, Malta üzərində qələbə qazanmaqla azarkeşləri sevindirə bildi. Tofiq Bəhramov adına Respublika stadionunda qeydə alınan 2:0-lıq qələbə AFFA rəhbərliyinin də ürəyincə olub. Ölkə mətbuatında bu qələbəyə görə futbolçuların 5-10 min manat mükafat alacağı xəbərləri yayılsa da, bunlar heç də həqiqəti əks etdirmir.
Futbolçuların alacağı mükafat hədindən artıq yüksəkdi. Əldə etdiyimiz məlumata görə, "cırtdanlar" üzərində qələbə qazandığımız üçün ilk “11-lik”də meydana çıxan futbolçulara nə az, nə çox – 30 min dollar veriləcək. Əvəzetmədən meydana daxil olan 3 futbolçu isə bu məbləğin 75 faizini əldə edəcək. Meydana çıxmayan futbolçulara 15 min dollar (50%) alacaq. Oyunu tribunadan izləyən Cavid Tağıyevə də 7500 dollar veriləcəyi gözlənilir.
Hesablamalara görə futbolçulara ayrılan mükafat fondu 540 min dollar təşkil edir. Qələbəyə görə məşqçilər heyətinin alacağı mükafat isə ayrıdı. Bu da qələbənin az qala milyon dollar başa gəlməsi deməkdi. Malta üzərində qələbəyə görə futbolçuya 30 min mükafat verən AFFA-nın Robert Prosineçki və onun köməkçilərində 50 mindən az şirinlik verməyəcəyi istisna deyil. Belə çıxır ki, bizdən də zəif komadanı məğlub etmək üçün büdcədən yarım milyon dollardan çox pul çıxmalıdı. Başqa cür isə mümkün deyil.
Vaxtilə heç-heçəyə, hətta məğlubiyyətə görə milli üzvlərinə pul ayrıldığını nəzərə alsaq, qələbə üçün hər oyunçuya 30 min dollar verilməsi hardasa normal sayıla bilər. Ancaq son dünya çempionatında bir çox komandaların qrupdan çıxmağa, ¼ finala yüksəlməyə görə bu qədər mükafat aldığını nəzərə alsaq, vəziyyət acınacaqlıdı. Yəqin ki, bizimkilər final mərhələsinə vəsiqə qazansa, bütün futbolçularımız milyonçu olar.