Milli komanda
Qələbəyə aldanmayaq
AÇ-2016-nın seçmə mərhələsi çərçivə…
AÇ-2016-nın seçmə mərhələsi çərçivəsində Malta yığması ilə oyundan bir gün öncə millimizin üzərində istər media, istərsə də azarkeşlər tərəfindən təzyiqlərin olması başadüşülən idi. Çünki seçməmizin sabiq baş məşqçisi Berti Foqts yığmamızı elə bir günə salmışdı ki, hətta cırtdan ölkələrin milliləri ilə görüşdə qələbə qazanacağımıza şübhə ilə yanaşırdıq.
Düzü, oyun ərəfəsində yığma komandanın düşərgəsində ab-hava elə də yüksək deyildi. Seçmə mərhələdə ardıcıl qeydə alınan 4 məğlubiyyət futbolçular üzərində psixoloji gərginlik yaratmışdı. Hətta ötən gecəki matçda qeydə alınacaq heç-heçə belə onları tənqid hədəfinə çevirəcəkdi, bundan sonra artıq milliyə heç kimin inamı qalmayacaqdı.
Qarşılaşma öncəsi yığmamızın baş məşqçisi Robert Prosineçkini qınayanlar da az deyildi. Xorvatiyalının rəsmi debüt matçında ölkə futbolunun flaqmanı “Neftçi”dən bir nəfərə belə güvənməməsi, əvəzində isə oyun praktikasından əziyyət çəkən Vaqif Cavadov, Ruslan Qurbanov və Emil Balayevə dəvət göndərməsi bir qədər təəccüblə qarşılanmışdı. Oyundan bir gün öncə təşkil olunmuş mətbuat konfransında Prosineçki tərəfindən Malta millisinə qarşı ilk dəqiqələrdən hansı futbolçuların çıxış edəcəyini açıqlaması hər nə qədər yenilik olsa da, “Qarabağ”ın gənc üzvü Namiq Ələsgərova əsas heyətdə şans verilməsi də gözlənilməz idi. Dəqiq olan o idi ki, bu dəfə dövlət himnimizi 11 futbolçunun hamısı oxuyacaqdı.
Prosineçkinin də dediyi kimi, oyunun ilk dəqiqələrində qol vurmaq işimizi asanlaşdıracaqdı və belə də oldu. Milli təcrübəsi olmayan Ələsgərovun sağ cinahdan havalandırdığı topu Cavid Hüseynov baş zərbəsi ilə Endryu Hoqqun qoruduğu qapıdan keçirdi. Mərkəzi arenaya toplaşan tamaşaçıları bir də “qol” deyib qıqşırmaq üçün 91 dəqiqə gözləməli oldu. Oyunun sonradan daxil olan Dmitri Nazarov seçmə mərhələdə ikinci qolunu Malta millisinə vurdu.
Amma buna qədər maltalılar da sakit dayanmırdı. İkinci hissənin sonlarına yaxın küncdən zərbə zamanı Arif Daşdərmirovun kobud səhvi ürəyimizi ağzımza gətirdi. Həmin epizodda top dirəyə dəyməyib, birbaşa qapıya getsəydi, millimizin üzvlərinin özündə güc tapıb yenidən hücuma atılması çox çətin olacaqdı. Yaxşı ki, bu dəfə idman xoşbəxtliyi seçməmiz tərəfdə oldu və oyun 2:0 hesablı qələbəmizlə başa çatdı.
Düzdü, Malta yığması üzərində qazanılan qələbə Prosineçkinin işinə qiymət vermək üçün yetərli deyil. Xorvatiyalının millimizlə bağladığı 3 illik müqavilə müddətində hansı işləri görəcəyinə şahidlik etmək üçün zamana ehtiyac var. Bu müddət ərzində legioner həyatı yaşayan futbolçularımız öz klublarında mütamadi olaraq çıxış etsələr, Prosineçkinin işi bir qədər asanlaşa bilər. Nəzərə alaq ki, əvvəllər seçməmizin əsas heyətində meydana çıxan Vaqif Cavadov, Mahir Şükürov bu dəfə ehtiyyatda qalmışdı. Son illərdə ürəkaçan futbol sərgiləməyən Ruslan Abışov da onların sırasında idi. “İnter”in yarımmüdafiəçisi Elvin Məmmədov qala-qala axırıncı dəfə 2010-11-ci illərdə yaxşı oyun nümayiş etdirən Əfran İsmayılovun meydanda ilk dəqiqələrdən olması isə sual doğuran məqamlardandı. İsmayılovun faydalı iş əmsalının sıfıra bərabər olması, Arif Daşdəmirovun da tez-tez top itkilərinə yol verməsi sol cinahın zəif təsir bağışlaması ilə nəticələndi.
Qələbə zəif komanda üzərində olsa da, hər halda şirindi. Amma bu, bizi aldatmalı deyil. Nəzərə alaq ki, qarşıda millimizi daha çətin sınaqlar gözləyir. Həmin sınaqlardan üzüağ çıxmaq üçün isə hərtərəfli hazır olan futbolçulara ehtiyac var. Ötəngünkü qarşılaşma göstərdi ki, bu milli ilə Norveç yığması qarşısında bizə sərf edən nəticəni qazanmaq qeyri-mümkündü. Onu da qeyd etmək lazımdı ki, Malta ilə oyun Prosineçki üçün həm də yoxlama oyun xarakteri daşıdı. Ən azından milliyə dəvət etdiyi futbolçuları iş başında görmüş oldu. Yəqin ki, yaxşılarla yanaşı, özünü doğrultmayan futbolçuları da öz yaddaşına köçürdü. Növbəti oyunda heyətdə ciddi dəyişikliklər olsa, heç də təəccüblənməli deyilik. Hər halda milliyə yeni nəfəs gəldiyinin fərqindəyik. Biz gördüyümüz çatışmazlıqları Prosineçki də görməsə, yeni-yeni sevməyə başladığımız Prosineçki ilə münasibətləri korlamış olacağıq. Biz isə bunu istəmirik, cənab Prosineçki!
EMİN SƏFƏROV