Milli komanda
Ümid var, amma gözləməliyik…
Millimiz AÇ-2016-nın seçmə mərhələ çər&cced…
Millimiz AÇ-2016-nın seçmə mərhələ çərçivəsində ilk qələbəsini qazandı. Evdə Maltanı qəbul edən seçməmiz 2 cavabsız qolla sevinən tərəf oldu. Qarşıdakı rəqibin güclü və ya zəifliyindən asılı olmayaraq, əsas məsələ 3 xal idi. Komandamızın baş məşqçisi Robert Prosineçki bu qələbə ilə həm debütünü uğurlu etdi, həm də yığmalarımızın məğlubiyyətləri ard-arda sıraladığı bir vaxtda AFFA rəhbərliyinin üzünü güldürdü. Bəs görəsən, xorvatiyalı mütəxəssisin komandası necə oyun sərgilədi? Onun millimizlə hansısa uğura imza ata biləcəyini demək olarmı? Bu suallara cavab tapmaq üçün ölkəmizdəki idman jurnalistlərinə müraciət etdik. Görək, media nümayəndələri millimizlə bağlı hansı fikirdədilər.
Əli Sahib (Fanat.az saytının baş redaktoru): “Qalib müzakirə olunmur" deyiblər. Mən də bu deyimi əsas tutub, hansısa səhvlərdən danışmaq istəmirəm. Dünənki qələbədən sonra qalib ab-havası ilə stadiondan ayrıldığımıza görə millimizə təşəkkür edirəm. Rəqibin zəif və ya güclü olması müzakirə mövzusu ola bilməz. Komandamızın potensialına bələdik. Biz millidən sadəcə oyunlarda bacarıqlarının maksimal dərəcəsini tələb edə bilərik. Dünənki qarşılaşmada da əllərindən gələni etdilər. Biz çalışmalıyıq ki, "dişimizə" görə olan rəqiblərə xal verməyək. Qrupda Xorvatiyanın, İtaliyanın gücü göz önündədi. Demirəm ki, onlara meydana çıxmamış təslim olaq. Rəqib güclü və ya zəif ola bilər, uda da bilərsən, uduza da. Yetər ki, meydanda futbol oyna, komanda ruhu göstər, əzmkarlıq nümayiş etdir. Bizim millidən istədiyimiz budu. Robert Prosineçkinin millidə nəyisə dəyişib və yaxud da dəyişməyib demək hələ tezdi. İlk rəsmi oyun, ilk xal. Qarşıda hələ məşqçi işi tələb edən oyunlar var. Onda danışarıq. Hələki, dünənki oyuna görə Prosineçkiyə "davamı gəlsin" arzulamaq qalır. Hər yeni məşqçi gələndə özünü yaxşı tərəfdən göstərmək istəyir. Bu da, normaldı. Amma, gələcəkdə Prosineçkili millimizin nə vəd etdiyini demək çətindi. Biz Robert müəllimdən qarışqadan fil düzəltməsini tələb edə bilmərik. Sadəcə futbolçulara komanda ruhu aşılanmasını, oyunlara psixoloji hazır olmalarını tələb edə bilərik. Bir də Prosineçkidən istəyim odu ki, bəzi futbolçularımıza millidə pula görə yox, şərəfə görə oynamaq lazım olduğunu başa salsın. Futbol məmurlarımız da futbolçularmızdan vətənpərvər əvəzinə muzdlu düzəltməyi tərgidsin”.
İlkin Fikrətoğlu (ATV-nin idman şöbəsinin müdiri): “Bir oyunla bağlı qərar vermək çətin məsələdi. Düzdü, ilk oyunu idi, rəqib isə Malta yığması. Berti Foqtsdan sonra sarsılan millimizə özünəinamı qaytarmaq üçün qələbə mütləq lazim idi. Dünənki oyunda bəyəndiyim məqam millinin hücum futbolunun nümayiş etdirməsi, qələbə istəyinin hiss olunması idi. Qarşıdakı oyunlarda isə nə olacağını indidən demək olmaz. Bir neçə oyundan sonra millidə hansı dəyişikliyin olması ilə bağlı danışmaq olar”.
Natiq Muxtarlı (Komanda.az saytının redaktoru): “Nəzərə alaq ki, millimizin bu gün üçün heç bir hədəfi yoxdu. AÇ-2016 əlimizdən çıxıb. Prosineçki lazımsız milləşdirilmiş oyunçulardan imtina etmişdi. Dünənki oyunda xəttlər arasında əlaqədə çatışmazlıqlar var idi, əvvəlki səviyyədə deyildi. Mən bunu anlayışla qəbul edirəm. Buna görə Robert Prosineçkini tənqid etmək istəmirəm. Onun yığmamızda ilk rəsmi oyunu idi. Ola bilər ki, Prosineçki gələcəkdə komandada müəyyən balanslaşdırma siyasəti aparacaq və problemləri aradan qaldıracaq. Bütövlükdə, Prosineçkini cadugər hesab etmirəm, ondan nəsə gözləmirəm. Ümumiyyətlə, Azərbaycan yığmasından heç nə gözləmirəm. İnanmıram ki, bu komanda nəyəsə nail olsun. Milli səviyyəsində nəyəsə nail olmaq ilk növbədə Avropa standartlarına cavab verən futbolçu yetişdirmək lazımdı. Aşağı yaş qruplarında olan millilərin, oradakı futbolçuların çıxışı onu göstərir ki, bu yöndə hələ ki heç bir addım atılmayıb, atılması da düşünülmür. Ola bilər ki, futboldan anlayışı olmayan AFFA rəsmiləri hansısa cadugərin möcüzəsinə inanırlar. Elə bilirlər ki, məşqçiləri dəyişməklə uğur əldə edəcəklər. Əsas strategiyadı, qarşıya qoyulan hədəfdi, çoxillik plandı, layihələrdi. Bunlar üzərində işləmək lazımdı ki, gələcəkdə nəticə olsun. Bu baxımdan yanaşsaq, Azərbaycan millisinin gələcək üçün heç bir perspektivi yoxdu. Yəqin ki, Prosineçkinin qazanacağı xal Malta üzərindəki qələbə olacaq. Başqa heç nə ilə yadda qalmayacağıq”.
Elçin Cəlilov (Futbolpress.az saytının rəhbəri): “Prosineçki ilә millinin Foqtsa nisbәtәn daha koloritli vә iddialı olacağı hәlә Antalya toplanışında mәlum olmuşdu. "Şaxtyor"la yoxlama matçındakı heyәt seçimi vә oyun üslubu bunu düşünmәyә әsas verirdi. Malta ilә oyunda da seçimi, xüsusәn start heyәt barәdә yaxşı idi. Sadәcә, Rahidi insaydda, Әfranı sol, Ruslanı sağ cinahda oynatmaqla bir az kontrast pozulmuşdu. Ancaq bunu oyunçuların öz potensialını açmaq baxımdan uyğun dәst-xәtt saymaq olar. Әn әsası, qorxaq, küt, proqmatik oyunu dәyişib. Fikrimcә, belә davam etə, millidә performans vә nәticә baxımdan müsbәt dәyişiliklәr olacaq. Dünәn mәtbuat konfransında proqressiv çıxışı da bunu demәyә әsas verir”.
ZAMİN ALLAHVERDİYEV