Ölkə futbolu
Komanda yoldaşı da Mahir Şükürovu qınadı: "Axmaqcasına…"
“Neftçi”dən ayrılıb Türkiyə PTT 1-ci Liqa …
“Neftçi”dən ayrılıb Türkiyə PTT 1-ci Liqa təmsilçisi “Karşıyaka”ya yollanan Mahir Şükürovun qardaş ölkədə uğurlu çıxış edəcəyini gözləsək də, bu, baş vermədi. Millİmizin üzvü izmirlilərin qəzəbinə tuş gəlib. O, yığmamızın düşərgəsindən gec qayıtdığı üçün “Karşıyaka”nın heyətindən qeyri-müəyyən müddətə uzaqlaşdırılıb.
Müdafiəçinin klub tərəfindən bağışlanılacağı isə heç inandırıcı görünmür. Çünki Mahir klubun düşərgəsinə gec qayıdacağı ilə bağlı “Karşıyaka” rəsmilərini məlumatlandırmayıb. Şükürovun ölkə mətbuatına verdiyi müsahibədə “türklər bizi erməni gözündə görür” deməsi də təəccüblərə səbəb olmaya bilməz. Görəsən, qardaş ölkədə müdafiəçimizə necə münasibət göstəriblər ki, o türklər haqda belə fikirdədi?
Məsələni dəqiqləşdirmək üçün “Karşıyaka”da Mahirin komanda yoldaşı olan Bəhram Zülaloğlu ilə danışdıq. Əsas heyətin qapıçısı olan Zülaloğlu öncə “Karşıyaka”nın çıxışı ilə bağlı danışdı: “Hazırlıqlarımız davam edir. Növbəti turda “Bucaspor”la qarşılaşacağıq. Bizim üçün çox çətin oyun olsa da, qələbə qazanmağımız şərtdi. Ötən həftə “Adana Demirspor” qarşısında vacib qələbə qazandıq. İlk hissədə 0:3 hesabı ilə geridə olsaq da, sonradan qələbə qazanacağımıza inandığımız üçün matçı öz xeyirimizə başa vurduq. Komandamızda məşqçi dəyişikliyi oldu. Amma Ayhan Akmanın sisteminə uyğunlaşmağımız heç də çətin olmadı. Futbolun dili birdi. Dəyişən sadəcə, sistemlərdi”.
Azərbaycandan əlaqə saxladığımızı öyrənən təcrübəli qapıçı özünün də ölkəmizlə bağlılığı olduğunu açıqladı: “Azərbaycana sevgilərimi göndərirəm. Əslində, mənim atamın anası da azərbaycanlıdı. Adı isə Nədimə Zülaloğlu idi. Babamla ailə qurduqdan sonra onun soyadını götürmüşdü. Dünyasını dəyişənə qədər Ankarada yaşayırdı. Düzü, onun hansı bölgədən olması ilə bağlı bir məlumatım yoxdu. Bunu öyrənib sizə deyə bilərəm. Mən də babamın adını daşıyıram. Onun da adı Bayram idi”.
Zülaloğlu “Karşıyaka”nın heyətindən uzaqlaşdırılan komanda yoldaşı Mahir Şükürov haqda da danışdı. O, Şükürov haqda elə açıqlama verdi ki… “Düzdü, Mahir heyətdən uzaqlaşdırılıb. Buna səbəb isə milli komandanızın heyətindən klubun düşərgəsinə xəbər etmədən gec qayıtması olub. Şükürovun açıqlamasında “türklər bizi erməni gözündə görür” deməsi isə sadəcə, gülməlidi. O, özü bizdən soyudu, özünü bizdən fərqli gördü. Düzü, onun bu cür açıqlama verməsinə təəccübləndim. Azərbaycanlılar bizim qardaşımızdı və bu, hər zaman da belə olacaq. Günah Mahirin özündədi. Onun söylədikləri çox axmaqcasınadı. Özünü elə aparırdı ki, elə bil Premyer Liqa oyunçusudu. Burada mən də daxil olmaqla bir sıra komanda yoldaşlarımın superliqa təcrübəsi var. Bəlkə də Azərbaycanda güclü ola bilər. Amma burada o yetərincə gücə sahib olmadığı üçün başqa şeylərə əl atır. Öz səhvlərini başqasının üzərinə atması düzgün deyil. İki dövlətin – Türkiyə ilə Azərbaycanın vətəndaşları qardaşdı. Belə şeylərə inanmayın. Düzdü, klubda maddi sıxıntılar var. Ancaq buna görə komanda yoldaşlarınla münasibəti pozmaq olmaz. Sıxıntı hər klubda var”.
33 yaşlı qolkiper Azərbaycanda çıxış edən futbolçu ilə dost olduğunu da söylədi. Zülaloğlu millimizdə çıxış etməyin əlehinə olmadığını da bildirdi: “Milli komandanızda çıxış edən Cihan Özkaranı tanıyıram. Onunla “Ərciyəsspor”da (Kayseri) bir yerdə çıxış etmişik. Məni ondan soruşa bilərsiniz. Cihanın xətrini çox istəyirəm. Azərbaycanla bağlılığı olanlar milli komandanızda oynaya bilirsə, mən də bundan yararlanmaq istəyərdim. Amma mənim türk pasportum var. Bunun mümkün olacağına inanmıram”.
EMİN SƏFƏROV