Ölkə futbolu
Kamran Ağayevin “Kayserispor” karyerası başa çatdı
Azərbaycanda “Xəzər Lənkəran”, “Bakı”, &…
Azərbaycanda “Xəzər Lənkəran”, “Bakı”, “Qəbələ” kimi iddialı komandalarda çıxış etdikdən sonra Türkiyənin “Kayserispor” klubuna yollanan millimizin qapıçısı Kamran Ağayevin gələcək karyerası sual altındadı. Futbolinfo.az xəbər verir ki, ölkənin 1 nömrəli qolkiperinin Kayseri təmsilçisi ilə bağladığı 4 aylıq müqavilənin müddəti bu ayın 31-də başa çatır.
Əldə etdiyimiz məlumata görə, PTT 1-ci Liqanın çempionu kimi Superliqaya vəsiqə qazanan “Kayserispor” Ağayevlə başa çatacaq müqavilənin müddətini uzatmaq fikrində deyil. Bunun üçün bir sıra səbəblər də var. Məsələ burasındadı ki, 23 may 2015-ci il tarixində Kayseri təmsilçisinin idarə heyəti bir araya gələrək klubun yeni prezidentini seçəcək. Maraqlıdı ki, “sarı-qırmızılar”ın yenidən Superliqaya qayıtmasında əməyi olan indiki başqan Bəkir Yıldız bu seçkilərdə namizədliyini irəli sürməyəcəyini rəsmi şəkildə bəyan edib. O, bunun səbəbini yorğunluqla əlaqələndirir.
Əldə etdiyimiz bilgiyə görə, komanadanın meneceri Süleyman Hurma və baş məşqçisi Cüneyt Dumlupınar seçkilərdən sonra “Kayserispor”dan ayrılması istisna deyil. Prezident, menecer və baş məşqçinin klubdan ayrılacağını nəzərə alsaq, onların dönəmində heyətə cəlb olunan futbolçuların göndəriləcəyi, komandanın Superliqada mübarizə aparaca biləcək oyunçularla güclənəcəyi gözlənilir.
“Kayserispor”un Kamranı istəməməsinin digər səbəblərindən biri azərbaycanlı qapıçının zədədən əziyyət çəkməsidi. Bundan başqa türk klubunun qapısını qorumağa artıq yetərincə əlcək sahibi də var. Belə ki, icarə əsasında “Trabzonspor”da çıxış edən təcrübəli Hakan Arıkan mövsüm başa çatdıqdan sonra “Kayserispor”a qayıdacaq. Elitada da ”sarı-qırmızılar”ın qapısını onun qoruyacağı heç kimdə şübhə doğurmur.
İkinci qapıçı kimi isə “Fənərbaxça”dan tanıdığımız Sərdar Kulbilgəyə etimad göstəriləcək. Kamranın zədəli olduğu müddətdə 4 oyunda qapısını toxunulmaz saxlayan Ərdoğan Kayacan da artıq özünü yaxşı tərəfdən göstərə bildi. Butün bu amillər Kamranın əlehinədi. Bundan Ağayevin özü də xəbardardı. Bu səbəbdən 29 yaşlı qapıçının indidən özünə yeni iş yeri axtardığı bildirilir. Çox güman ki, təcrübəli qolkiper yenə türk klublarının birində çıxış etməli olacaq. Çünki onun yenidən Azərbaycana qayıtması real görünmür. Klublarımızın maddi böhran yaşadığını, onların həm də Kamranın xarakterinə bələd olduğunu nəzərə alsaq, hansısa komandanın Ağayevə bir ətək pul verəcəyi inandırıcı deyil. Bundan başqa millimizin üzvünün özü də legioner həyatı yaşamaqda maraqlıdı. O, həm də müsahibə və açıqlamalarında Azərbaycandan bezdiyini bildirmişdi axı…
Maraq üçün qeyd edək ki, Ağayev “Kayserispor”da çıxış etdiyi müddət ərində 6 çempionat və 1 kubok matçına çıxıb. Ağayevin debüt matçı ölkə kuboku uğrunda “Beşiktaş”la matça təsadüf etsə də, o qapısını toxunulmaz saxlaya bilmişdi. O, bu müddət ərzində qapısından 2 qol buraxıb ki, bu da “Dənizlispor” və “Alanyaspor” matçlarına təsadüf edir. Ağayev “Girəsunspor”la matçda da penalti zərbəsini dəf etməklə yadda qalmışdı.
Onu da qeyd edək ki, PTT 1-ci Liqasının çempionu olan “Kayserispor” mayın 17-də 33-cü tur çərçivəsində Mahir Şükürovun duruş gətirə bilmədiyi “Karşıyaka”nı qəbul edəcək. Kayserilər məhz bu matçdan sonra qazandığı çempionluq kubokunu başı üzərinə qaldıracaq. Kamran Ağayevin də bu tədbirdə iştirak edəcəyi, Türkiyə Futbol Federasiyasının prezidenti Yıldırım Dəmirörəndən öz qızıl medalını alacağı gözlənilir. Bu, böyük ehtimalla Ağayevin “sarı-qırmızılar”ın futbolçusu kimi “Kadir Has” stadionuna son çıxışı olacaq.
EMİN SƏFƏROV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?