Ölkə futbolu
Tahir Süleymanov: "Heç kim "Neftçi" rəhbərliyini 3-4 il gözləyən deyil"
Dünən "Neftçi"nin Müşahidə Şurasının …
Dünən "Neftçi"nin Müşahidə Şurasının (MŞ) iclası keçirilib. Gündəmdə dayanan məsələ Emil Mpenza ilə bağlı FİFA-dan daxil olan məktub olub.
Klubun sabiq vitse-prezidenti Tahir Süleymanovun saytımıza belçikalının 1 milyonluq iddiasına dair verdiyi müsahibədən sonra "ağ-qaralar"ın rəhbərliyində "ümid çırağı" yanıb. Dünənki toplantıya Süleymanov da dəvət olunub. Bu gün Tahir bəylə yenidən əlaqə saxlayaraq, "Mpenza düyünü" ilə bağlı hansı qərarların verilməsinə aydınlıq gətirməsini xahiş etdik.
Təvazökarlıqdan uzaq olsa da, razılaşaq ki, "Neftçi" rəhbərliyi məhz dünənki müsahibədən sonra CAS-a müraciət etməyi qərara alıb. Süleymanovla söhbətə də məhz bu mövzudan başladıq: "Təəssüf ki, mətbuatın ölkə idmanına verdiyi xeyri hələ də qiymətləndirməyənlərin sayı az deyil. Hesab edirəm ki, mətbuata daim diqqət yetirmək, dəyər vermək olduqca vacibdi. Dünən Müşahidə Şurasına dəvət olunduğum üçün "Neftçi" rəhbərliyinə də təşəkkürümü bildirirəm. Olduqca demokratik qaydada keçirilən iclasda hər bir iştirakçı azad şəkildə fikirlərini ifadə edə bildi".
Əlbəttə, "hər bir iştirakçı"dan söhbət gedirsə, ilk növbədə klubun sabiq vitse-prezidentinin fikirləri maraqlıdı. Çünki, yeni rəhbərlik indiyədək nə CAS tanıyıb, nə də klub səviyyəsində məhkəmə çəkişmələri yaşayıb. Bəs Süleymanovun fikirləri necə, o, "Neftçi" başbilənlərinə də bu yöndə yardımçı olmaq istəyini bildiribmi? Dünənki müsahibədə bunu dilə gətirən həmsöhbətimiz sabiq klubuna da bu yöndə yardımçı olmaq istəyib: "Bəli, saytınıza verdiyim müsahibədə də bildirmişdim ki, belçikalı futbolçunun lehinə çıxarılan qərarla razılaşmaq olmaz. Korrupsiya bataqlığına düşən qurumla mübarizə aparmaq lazımdı. Bunun üçün də bütün lazımı sənədləri CAS-a ünvanlamaq gərəkdi".
Klub Süleymanovun təklifini qəbul etsə də, deyəsən, onun "lazım gəlsə, İsveçrəyə uçub, məsələni həll edərəm", deməsinə ilıq münasibət bəsləyib. Süleymanov isə dediklərində israrlıdı: "FİFA-nın tövsiyəsinə uyğun olaraq, futbolçulara dair mübahisəli məsələləri mətbuata çıxarmaq olmaz. Məhz buna görə biz vaxtilə Vladimir Burduli ilə bağlı məhkəmə çəkişməsini gündəmə gətirməmişdik. Gürcü yarımmüdafiəçiylə yollarımızı ayırmışdıq. Lakin o, FİFA-ya şikayət etmişdi. Biz bütün sənədləri ali futbol qurumuna yollayaraq, məsələni lehimizə həll etdik. Daha sonra Burduli CAS-a müraciət etdi. Lakin bu məhkəmə də "Neftçi"ni haqlı çıxardı. Ancaq maraqlıdı ki, FİFA tərəfindən yanvarda qaldırılan məsələ Avropa Liqasının startına 2 həftə qalmış mətbuata sızdırılır".
Sonda Süleymanov "Neftçi"nin hazırkı durumu ilə bağlı da ilginc açıqlama verdi: "Bu, xalq komandasıdı. "Neftçi"də daim minimal vəzifə çempion olmaqdı. Yəni, heç kim komanda formalaşdırılmasını 3-4 il gözləyən deyil. Nəticə dərhal verilməlidi. Fərq etməz, heyət yerli gənclərdən qurulub, yoxsa başdan-ayağa təcrübəli legionerlərdən ibarətdi. Biz Elvin Yunuszadəni üzə çıxardıq. Əgər o, pis futbolçudursa, hazırda ölkənin ən güclü klubu olan "Qarabağ" onu niyə transfer etdi? Bütün hallarda, "Neftçi"yə qarşıdakı mövsümdə uğurlar arzu edirəm".
CEYHUN ƏLİYEV
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”